ބިދޭސީން އަޑީގައި ތިބެ ދިވެހިންގެ ނަން ބޭނުންކޮށްގެން ހިންގާ ވިޔަފާރިތައް ހުއްޓުވުމުގެ ފިޔަވަޅުތަކާއެކު "ސޯލް ޕްރޮޕްރެއޭޓާޝިޕް" ނުވަތަ އަމިއްލަ ފަރުދުންގެ ވިޔަފާރި ރަޖިސްޓްރީ ކުރުމާއި ހިންގުމާއި ބާތިލުކުރުމުގައި އަމަލު ކުރާނެ ގޮތުގެ ގަވައިދެއް އެކުލަވާލައި މިއަދު އަމަލު ކުރަން ފަށައިފި އެވެ.
އިކޮނޮމިކް މިނިސްޓްރީއިން ބުނީ، "އަމިއްލަ ފަރުދުންގެ ވިޔަފާރީގެ ގަވައިދު"ގެ ނަމުގައި އެކުލަވާލި ގަވައިދުގެ އެއް މަގުސަދަކީ އެފަދަ ވިޔަފާރި ރަޖިސްޓަރީކުރާ ފަރާތްތަކަށް އޮންލައިންކޮށް ހުރިހާ ހިދުމަތްތަކެއް ދިނުމަށް މަގުފަހިކޮށްދީ، އެފަދަ ވިޔަފާރިތައް ރަޖިސްޓަރީކޮށް ހިންގުމުގައި، އަދި ގަވާއިދަށް އަމަލުކުރުމުގައި ލުއި ފަސޭހަ ގޮތްތަކެއް ކަނޑައެޅުން ކަމަށެވެ.
މި ގަވާއިދުގެ މައިގަނޑު އެއް ބޭނުމަކީ ދިވެއްސަކު ނިވާފަތްގަނޑަކަށްވެހުރެ، ބިދޭސީ ފަރާތަކަށް ވިޔަފާރީގެ މަންފާ ލިބިދިނުމަށް ހިންގާ ވިޔަފާރިތަކުގެ ސަބަބުން ކުދި އަދި މެދު ފަންތީގެ ވިޔަފާރިތަކަށާއި، ރައްޔިތުންނަށް ލިބޭ އިގްތިސާދީ ފުރުސަތުތައް ހަނިވިޔަ ނުދިނުމަށްޓަކައި ފިޔަވަޅު އަޅާނެ ދެފުށްފެންނަ އިންތިޒާމެއް ގާއިމް ކުރުން ކަމަށް ވެސް މިނިސްޓްރީން ބުނެ އެވެ.
އެގޮތުން ސީދާ އަދި ނުސީދާ ގޮތުން ބިދޭސީންނަށް މަންފާ ލިބޭ ގޮތަށް ހިންގަމުންދާ އަމިއްލަ ފަރުދުންގެ ވިޔަފާރިތަކަށް ވާގިވެރިވާ ފަރާތްތަކުގެ ވިޔަފާރި ރަޖިސްޓަރީ ބާތިލުކޮށް އެފަދަ މީހުން 100,000ރ. އިން ޖޫރިމަނާކޮށް ފަސް އަހަރު ދުވަހުގެ މުއްދަތަށް އަމިއްލަ ފަރުދުންގެ ވިޔަފާރިއެއް ރަޖިސްޓްރީނުކުރެވޭނެ ކަމަށް ކަނޑައެޅޭނެ ކަމަށް މިނިސްޓްރީއިން ބުންޏެވެ.
ވިޔަފާރި ކުރާ ތަނުގެ ބޭރުގައި ދުވާރު މަތީގައި މުދާ ބަހައްޓައިގެން ވިޔަފާރިކުރާތީ، އާންމު ރައްޔިތުންނަށް ކުރިމަތިވާ އުނދަގޫތައް ހައްލުކުރުމަށް ވެސް އާ ގަވައިދުގައި ފިޔަވަޅު އަޅާފައިވެ އެވެ. އެގޮތުން ބޭރުގައި މުދާ ބަހައްޓައިގެން ވިޔަފާރި ކުރާ މީހުން 1,000ރ. އާއި 100,000ރ. އާ ދެމެދުގެ އަދަދަކުން ޖޫރިމަނާ ކުރެވޭނެ ކަމަށް ގަވައިދުގައިވެ އެވެ.
މި ގަވައިދާއެކު އަމިއްލަ ވިޔަފާރިތަކުން އެހެން އިދާރާތަކަށް ރަޖިސްޓްރީއާ ބެހޭ މައުލޫމާތު ހިއްސާކުރުމަށް، ރަޖިސްޓަރީކޮށްފައިވާ ވިޔަފާރިއެއްކަން އަންގައިދިނުމަށް ބޭނުންކުރާ ރެޖިސްޓްރޭޝަން ސެޓްފިކެޓް ދޫކުރުން ހުއްޓާލާނެ ކަމަށެވެ. އޭގެ ބަދަލުގައި ބޭނުންކުރަން ފަށާނީ ވިޔަފާރިތަކަށް އޮންލައިންކޮށް ދޫކުރާ ކޯޕަރޭޓް ޕްރޮފައިލް ޝީޓެކެވެ.
ގަވާއިދުގައި ބުނެފައިވަނީ ފަރުދުންގެ ވިޔަފާރިތަކުން ހިންގާ ވިޔަފާރި ހަރަކާތްތަކާއި، އެ ވިޔަފާރި ހަރަކާތްތައް ހިނގާ ނުހިނގާ ގޮތް ދެނެގަންނަން ބޭނުންވާ އަސާސީ މައުލޫމާތު އަހަރަކު އެއްފަހަރު ހުށަހަޅަންޖެހޭނެ އެވެ. އެއީ ބިޒްނަސް ސެންޓާ ކޯޕަރޭޝަނާއި އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން މެދުވެރިކޮށް، އަލަށް ފަށާ ވިޔަފަރިތަކާއި ޅަފަތުގައިވާ ވިޔަފާރިތަކާއި ފުޅާކުރަން ބޭނުންވާ ވިޔަފާރިތަކަށް މާލީ އަދި ފަންނީ އެހީތެރިކަން މެދުނުކެނޑި ފޯރުކޮށްދޭން ބޭނުންވާތީ ކަމަށް އިކޮނިމިކް މިނިސްޓްރީން ބުނެ އެވެ.
އެ މީހަކު ވިޔަފާރިއަށް ދޭން ބޭނުންވާ ނަން އޮންލައިން ޕޯޓަލް މެދުވެރިކޮށް ރިޒާވް ކުރުމުގައި އަމަލު ކުރަން ޖެހޭ ގޮތް ވެސް އެ ގަވައިދުގައިވެ އެވެ.
ގަވައިދުގައިވާ ގޮތުން އަމިއްލަ ފަރުދުންގެ ވިޔަފާރި ރަޖިސްޓަރީކުރަން އެދޭ ފަރާތަކ،ީ އޮންލައިން ޕޯޓަލް މެދުވެރިކޮށް ފޯމު ފުރިހަމަކުރުމަށް ދަތިވާ މީހެއް ނަމަ އެ މީހެއްގެ ފޯމު ފުރިހަމަކުރަންވާނ،ީ ރަށު ކައުންސިލް ނުވަތަ އަތޮޅު ކައުންސިލް މެދުވެރިކޮށް ކަމަށެެވެ. އެފަދަ ހިދުމަތެއްގެ ބަދަލުގައި، އާންމުކޮށް އިއުލާނުކުރުމަށްފަހު، ކައުންސިލަށް 100ރ. އަށް ވުރެ ބޮޑު ނޫން ފީއެއް ނެގިދާނެ ކަމަށް ގަވައިދުގައިވެ އެވެ.
އެ މިނިސްޓްރީގެ ތަފާސްހިސާބުތަކުން ދައްކާ ގޮތުގައި، ރާއްޖޭގައި މިހާރު ވެސް 22،117 އަމިއްލަ ފަރުދުންގެ ވިޔަފާރި ރަޖިސްޓަރީކޮށްގެން ހިންގައެވެ.
އިކޮނޮމިކް މިނިސްޓްރީއިން ބުނީ އަމިއްލަ ފަރުދުންގެ ވިޔަފާރި ރަޖިސްޓަރީކޮށްފައިވާ ފަރާތްތައް އާ ގަވައިދަށް ހޭލުންތެރިކުރުވުމުގެ ގޮތުން ކޮންމެ ހަފްތާއަކު އެއް ފަހަރު އޮންލައިން ސެޝަންތަކެއް ބާއްވަން ހަމަޖެހިފައިވާ ކަމަށެވެ.
