ހިރޯޝިމާ، ޖަޕާން (މޭ 21) - ރަޝިއާއަށް ބަހްމޫތު ސިޓީގެ ކޮންޓްރޯލް ނުލިބޭ ކަމަށް ޔޫކްރެއިންގެ ރައީސް ވޮލޮޑިމިރް ޒެލެންސްކީ ވިދާޅުވެއްޖެ އެވެ.
ހޮނިހިރު ދުވަހު ރަޝިއާގެ ޕްރައިވެޓް ސިފައިންގެ ވާގްނާ ގްރޫޕުން ބުނީ ސިޓީގެ ފުރިހަމަ ކޮންޓްރޯލް ލިބިފައިވާ ކަމަށާއި މޭ 25 ގެ ކުރިން ރަޝިއާ ސިފައިންނަށް އެ ތަނުގެ ކޮންޓްރޯލް ދޭނެ ކަމަށެވެ.
އެހެން ނަމަވެސް ޒެލެންސްކީ ވިދާޅުވީ އަދިވެސް އެ ސިޓީގެ ހިސާބެއްގައި ޔޫކްރެއިންގެ ސިފައިން އެބަ ތިބި ކަމަށާއި މަޑުމަޑުން ކުރިއަށް ޖެހެމުންދާ ކަމަށެވެ.
ލޮނު މައިނު ކުރުމުގެ ސިނާއަތެއް އޮންނަ ބަހްމޫތުގައި ހަނގުރާމަ ފެށުމުގެ ކުރިން ދިރިއުޅުނީ 70،000 މީހުންނެވެ. މިހާރު ހަނގުރާމަ އެންމެ ވަރުގަދަކޮށް ކުރިއަށް ދަނީ އެ ސިޓީގަ އެވެ.
"އަޅުގަނޑުމެންގެ ސިފައިންނާ ގުޅޭ ޓެކްޓިކަލް މައުލޫމާތު ހާމަ ނުކުރެވޭނެ،" އެ ސިޓީގައި ޔޫކްރެއިނުން އަދިވެސް ހަނގުރާމަ ކުރަމުންދާ ކަމަށް ފާހަގަކުރައްވައި ޒެލެންސްކީ ވިދާޅުވި އެވެ.
ބަހްމޫތަކީ އެއްކޮށް ސުންނާފަތިވެފައިވާ ތަނެއް ކަމަށާއި އެ ތަން ރަޝިއާއަށް ލިބުނު ނަމަވެސް އެއީ އެއްވެސް ފައިދާއެއް އޮތް މޮޅަކަށް ނުވާނެ ކަމަށް ޒެލެންސްކީ ވިދާޅުވި އެވެ.
ބަހްމޫތުގެ މައިދާނުގައި ދެ ގައުމުން ވެސް ގިނަ އަދަދެއްގެ ސިފައިން މަރުވެ، އަސްކަރީ ގެއްލުން ލިބިފައިވެ އެވެ. އެހެންވެ، އެނެލިސްޓުން ދެކޭ ގޮތުގައި ރަޝިއާއަށް އެ ތަނުގެ ކޮންޓްރޯލް ލިބުން ވާނީ ޔޫކްރެއިނަށް ބޮޑު ދެރައަކަށެވެ.
