ސީދާ ތިން ސެޓުން ވޭސްޓް މެނޭޖްމަންޓް ކޯޕަރޭޝަން (ވެމްކޯ) ބަލިކޮށް، ފުރިހަމަ ރެކޯޑަކާ އެކު، ކްލަބް އާބަންކޯ އިން އޮފީސް/ކޮމްޕެނީ ވޮލީބޯޅަ މުބާރާތް ކާމިޔާބުކޮށްފި އެވެ.
ގިނަ އަަދަދެއްގެ ސަޕޯޓަރުންގެ ކުރިމަތީގައި ރޭ ސޯޝަލް ސެންޓަރު އެތެރެ ހޯލުގައި ކުޅުނު ފައިނަލް މެޗުގެ ސެޓުތައް އާބަންކޯ އިން ގެންދިޔައީ 25-21، 25-21 އަދި 25-16 އިންނެވެ.
ހަތަރު އަހަރުގެ މެދުކެނޑުމަކަށް ފަހު ބޭއްވި އޮފީސް ވޮލީބޯޅަ މުބާރާތުގެ ޗެމްޕިއަންކަން އާބަންކޯ އިން ހޯދީ ކުޅުނު ހުރިހާ މެޗަކުން މޮޅުވެގެންނެވެ. ހުޅުމާލޭ ޕާކް ވޮލީ ކޯޓުގައި އޮފީސް މުބާރާތުގެ ގްރޫޕް ސްޓޭޖުގެ މެޗުތައް ކުޅުމަށް ފަހު، ސެމީ ފައިނަލާއި ފައިނަލް ކުޅުނީ ސޯޝަލް އިންޑޯގަ އެވެ. އިންޑޯ އަށް ބަދަލުކުރީ ވިއްސާރައިގެ ސަބަބުން ސެމީ މެޗުތައް ފަސްކުރަން ޖެހުމުންނެވެ.
އާބަންކޯ އިން ރޭގެ ފައިނަލް މެޗުން މޮޅުވިއިރު، އެންމެ ބޮޑު ތަފާތެއް ދެއްކީ ޓީމުގެ ސެޓަރު އަދި ގައުމީ ޓީމުގެ ކުރީގެ ކެޕްޓަން، އިޝާން މުހައްމަދު (ބަޓިސް) އެވެ. ބަޓިސްގެ ސެޓިންތަކުގެ ފައިދާނަގައި، އާބަންކޯގެ އިސްމާއިލް ސާޖިދު (ކުޑަކާއްޓެ) އާއި ސްރީ ލަންކާ ކުޅުންތެރިޔާ ލަސިންދު ވަނީ ބާރު ބޯޅަތަކެއް ފޮނުވާލައިފަ އެވެ.
އާބަންކޯ ޓީމުގެ އާދަމް ފައިރޫޒްގެ ފަރާތުން ވެސް ފައިނަލްގައި ރަނގަޅު ކުޅުމެއް ފެނިގެންދިޔައިރު، މި މެޗުގައި އެ ޓީމުން ވަނީ ކޮންޓްރޯލް ގެއްލުނަނުދީ މޮޅު ކުޅުމެއް ދައްކައިފަ އެވެ.
ރޭގެ މެޗުގެ ތެރެއިން އާބަންކޯގެ ސަޕޯޓަރުން ޓީމަށް ހިތްވަރުދެނީ.--- ފޮޓޯ: އަބްދުﷲ އިޔާން/ އަދަދު
ތިން ވަނަ ސެމީ ފައިނަލުގައި މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) ބަލިކުރިއިރު، ވެމްކޯ އިން ދެއްކި ހިތްވަރު ރޭގެ މެޗުތަކުގައި ތަކުރާރު ނުކުރެވުނެވެ.
ވެމްކޯގެ ދެ އެޓޭކަރުން ކަމަށްވާ އަލީ ހުޒާމް (ހުޒަންޓެ) އާއި އިންޑިއާގެ ވިނީތު ކުމާރަށް ރޭގެ ފައިނަލުގައި އެންމެ ރަނގަޅު ކުޅުމެއް ދެއްކޭގޮތެއްނުވި އެވެ. ފުރަތަމަ ދެ ސެޓުގައި ކޮންމެ ވެސް ވަރަކަށް ވެމްކޯ އިން ކުޅެވޭތޯ ބެލި ނަމަވެސް ތިން ވަނަ ސެޓު ދިޔައީ ފަރަގު ބޮޑުކޮށެވެ.
މުބާރާތުގެ މޮޅު ކުޅުންތެރިއަކީ އާބަންކޯގެ ކުޑަކާއްޓެ އެވެ. އެންމެ މޮޅު ކޯޗަކީ އާބަންކޯގެ މުހައްމަދު ސާޖިދު (ކާއްޓޭ) އެވެ. އަދި އެންމެ މޮޅު ބިދޭސީ ކުޅުންތެރިއަކަށް އާބަންކޯގެ ލަސިންދު ހޮވުނުއިރު، އެންމެ މޮޅު ލިބަރޯ އަކީ އާބަންކޯގެ އަހުމަދު މުޒުލިފް އެވެ. މުބާރާތުގެ އެންމެ މޮޅު ހަ ކުޅުންތެރިންނަކީ، އާބަންކޯގެ ފައިރޫޒް އާއި ބަޓިސް، ވެމްކޯގެ ހުޒަންޓެ އާއި ހުސެއިން ޔޫސުފް (ޓޯއި) އަދި އެމްއެންޑީއެފްގެ އާދަމް ނަސީމް (އެޑަމް) އާއި ހުސެއިން ރައްޒާން އެވެ.
