ޖެނީވާ، ސްވިޓްޒަލޭންޑް (މޭ 20) - ދުނިޔޭގެ 43 ގައުމެއްގައި އުޅޭ އެއް ބިލިއަން މީހުންނަށް ކޮލެރާގެ ނުރައްކާ އެބަ އޮތް ކަމަށް އދ. އިން ބުނެފި އެވެ.
އދ. އިން ބުނީ މިއީ ފަގީރުންނަށް އޮތް ބަލިމަޑުކަމެއް ކަމަށާއި އެކަމާ ދެކޮޅަށް މަސައްކަތް ކުރަން އެކަށީގެންވާ ވަސީލަތްތައް ނެތް ކަމަށެވެ.
އދ. އިން މަސައްކަތް ކުރަނީ ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އާއި ޔުނިސެފަށް 640 މިލިއަން ޑޮލަރު ހޯދައި، ކޮލެރާއާ ދެކޮޅު މަސައްކަތަށް އެ ފައިސާ ހާއްސަ ކުރުމަށެވެ.
މި އަހަރުގެ މިހާތަނަށް 24 ގައުމެއްގައި ކޮލެރާ ފެތުރިގެން ރިޕޯޓުކޮށްފަައިވެ އެވެ. އދ. ގެ ކަންބޮޑުވުމަކީ އާއްމު ގޮތެއްގައި ކޮލެރާގެ އަސަރު ނުކުރާ ގައުމުތަކަށް ވެސް މިހާރު އަސަރު ކުރަމުން ދިޔުމެވެ.
އޭގެ އިތުރުން މަރުވާ މީހުންގެ އަދަދު އިތުރުވުމަކީ ވެސް ކަންބޮޑުވުމެކެވެ. މަރުތައް އިތުރުވަނީ ފަގީރުކަަމާއި ހަމަނުޖެހުމުގެ ސަަބަބުން ފަރުވާ ހޯދަން ކުރިމަތިވާ ހުރަސްތަކުގެ ސަބަބުންނެވެ.
ކޮލެރާއަކީ ތަގައްޔަރުވެފައިވާ ކާބޯތަކެއްޗާއި ފެނުގެ ޒަރިއްޔާއިން ޖެހޭ ބައްޔެކެވެ. އެ ބަލީގައި ހޮޑުލައި ބޭރަށް ހިންގައި، ވަކިން ހާއްސަކޮށް ކުޑަކުދިންގެ ހާލު ދެރަވެ އެވެ.
ކޮލެރާއަށް އޮތް ފަރުވާއަކީ ހަށިގަނޑަށް އެކަށީގެންވާ މިންވަރަށް ފެން ބުއިމެވެ. އަދި ސީރިއަސް ކޭސްތަކުގައި އެންޓި ބަޔޮޓިކްސްގެ ފަރުވާ ދޭން ޖެހެ އެވެ.
އެހެން ނަމަވެސް، ފަގީރު ހާލަތުގައި އުޅޭ މީހުންނަށް ސާފުބޯފެނާއި ބޭސް ލިބުން ދަތިވާތީ ހާލު ދެރަވެގެން މަރުވެ އެވެ. ކޮލެރާ ހުއްޓުވާ ވެކްސިން ވެސް ހުރެ އެވެ.
އެކަމަކު މުއްސަނދި ގައުމުތަކުގައި އެއަށް މާ ބޮޑު މާކެޓެއް ނެތުމުން، ބޭސް ކުންފުނިތަކުން ކޮލެރާ ވެކްސިނަށް ސަމާލުކަމެއް ނުދެ އެވެ.
މި އަހަރު 18 މިލިއަން ކޮލެރާ ވެކްސިން ޑޯޒް ބޭނުންވެގެން އެދިފައިވާ އިރު، ކުންފުނިތަކުން އުފެއްދީ އެންމެ އަށް މިލިއަން ޑޯޒެވެ. އެހެންވެ، ވެކްސިނާ ގުޅުން ހުރި ކެމްޕެއިންތައް ނުހިންގެ އެވެ.
