މޮސްކޯ، ރަޝިއާ (މޭ 20) - ޔޫކްރެއިންގެ އިރުމަތީގައި އޮންނަ ބަހްމޫތު ސިޓީގެ ފުރިހަމަ ކޮންޓްރޯލް ލިބިފައިވާ ކަމަށް ރަޝިއާގެ ޕްރައިވެޓް ސިފައިންގެ ވާގްނާ ގްރޫޕުން ހޮނިހިރު ދުވަހު ބުނެފި އެވެ.
ލޮނު މައިނު ކުރުމުގެ ސިނާއަތެއް އޮންނަ ބަހްމޫތުގައި ހަނގުރާމަ ފެށުމުގެ ކުރިން ދިރިއުޅުނީ 70،000 މީހުންނެވެ. މިހާރު ހަނގުރާމަ އެންމެ ވަރުގަދަކޮށް ކުރިއަށް ދަނީ އެ ސިޓީގަ އެވެ.
ބަހްމޫތުގެ މައިދާނުގައި ދެ ގައުމުން ވެސް ގިނަ އަދަދެއްގެ ސިފައިން މަރުވެ، އަސްކަރީ ގެއްލުން ލިބިފައިވެ އެވެ. އެހެންވެ، ރަޝިއާއަށް އެ ތަނުގެ ކޮންޓްރޯލް ލިބުން ވާނީ ޔޫކްރެއިނަށް ބޮޑު ދެރައަކަށެވެ.
ވާގްނާ ގްރޫޕްގެ ވެރިޔާ ޔެވްގެނީ ޕްރިގޯޝިން ޓެލެގްރާމް މެދުވެރިކޮށް ބުނީ އެ ގްރޫޕްގެ ސިފައިންގެ ދަށަށް ސިޓީ ގެނެސްފައިވާ ކަމަށެވެ. އޭނާ އާއްމުކުރި ވީޑިއޯގައި ރަޝިއާގެ ދިދަ ހިފައިގެން ތިބޭ ސިފައިން ފެނެ އެވެ.
ޕްރިގޯޝިން ބުނީ ވާގްނާ ގްރޫޕްގެ ސިފައިން މުޅި ސިޓީ ބަލައި ފާސްކުރުމަށް ފަހު ރަޝިއާގެ އަސްކަރިއްޔާއާ ރަސްމީކޮށް ހަވާލުކުރާނެ ކަމަށެވެ.
މި މަހުގެ ކުރީކޮޅު ޔޫކްރެއިނުން ވެސް ބުނީ ބަހްމޫތުގައި އެ ގައުމުގެ ސިފައިން ކުރި ހޯދަމުންދާ ކަމަށެވެ. ވާގްނާ ގްރޫޕަށް ކޮންޓްރޯލް ލިބިފައިވާ ކަމަށް ބުނި އިރު، ޔޫކްރެއިނުން ހޮނިހިރު ދުވަހު ބުނީ ހަނގުރާމަ އަދިވެސް ދަނީ ކުރިއަށް ކަމަށެވެ.
ޔޫކްރެއިންގެ ޑެޕިއުޓީ ޑިފެންސް މިނިސްޓަރު ގަންނަ މަލްޔާރް ޓެލެގްރާމް މެދުވެރިކޮށް ވިދާޅުވީ ބަހްމޫތުގެ ސިނާއީ ފެސިލިޓީތަކުގެ ކޮންޓްރޯލް އަދިވެސް އޮތީ ޔޫކްރެއިނަށް ކަމަށެވެ.
