ސިޑްނީ، އޮސްޓްރޭލިއާ (މޭ 20) - ނިއު ކަލެޑޯނިއާގެ އިރުން ޕެސިފިކް ކަނޑަށް ހޮނިހިރު ދުވަހު 7.1 މެގްނިޓިއުޑްގެ ބާރުމިނުގައި ބިންހެލުމެއް އައިސްފައިވާ ކަމަށް އެމެރިކާގެ ޖިއޮލޮޖިކަލް ސާވޭއިން ބުނެފި އެވެ.
ހުކުރު ދުވަހު ވެސް އެ ސަރަހައްދަށް ބޮޑު ބިންހެލުމެއް އައެވެ. ހޮނިހިރު ދުވަހުގެ ބިންހެލުން އައީ ކަނޑުގެ 35 ކިލޯމީޓަރު އަޑުން ނިއު ކަލެޑޯނިއާގެ ޖަޒީރާތަކުގެ 300 ކިލޯމީޓަަރު އުތުރުންނެވެ.
ވަނުއަޓޫގެ ކާނާ ރަށުގެ ބީޗުގައި ގެސްޓުހައުސް ހިންގާ ފަރާތްތަކުން ބުނީ ބޮޑު ބިންހެލުމެއް ނަމަވެސް، މާ ގިނަ އިރު ނުވާ ކަމަށެވެ. ދެ، ތިން ސިކުންތު ތެރޭގައި ބިންހެލުން ނިމުނު ކަމަށް އެ މީހުން ބުންޏެވެ.
ސުނާމީގެ ނުރައްކާ އޮތް ނަމަވެސް، ބޮޑު ރާޅުތައް ނުފެންނަ ކަމަށް ވެސް އެ މީހުން ބުންޏެވެ. ބިންހެލުން އައިތާ އިރުކޮޅެއް ފަހުން 6.5 މެގްނިޓިއުޑްގެ ލޮޅުމެއް ވެސް އައެވެ.
ޕެސިފިކް ސުނާމީ ވޯނިން ސެންޓަރުން ބުނީ ސުނާމީގެ ރާޅުތަކެއް އުފެދޭ ނަމަ އުސްމިނުގައި ހުންނާނީ 0.3 މީޓަރު ނުވަތަ އެއް ފޫޓު ކަމަށެވެ.
ޕެސިފިކް ކަނޑުގެ ޖަޒީރާ ގައުމުތަކަށް ސުނާމީގެ އަސަރު ކުރުން އެކަށީގެންވެ އެވެ. އެއީ ފިޖީ، ކިރިބަޓީ، ވަނުއަޓޫ، ވަލިސް އަދި ފުޓޫނާ ޖަޒީރާތަކެވެ.
ހުކުރު ދުވަހު އެ ސަރަހައްދަށް އައީ 7.7 މެގްނިޓިއުޑްގެ ބިންހެލުމެކެވެ. އެ ބިންހެލުމާ އެކު ގިނަ ބަޔަކު ރައްކާތެރި ހިސާބުތަކަށް ބަދަލުވި އެވެ. އެހެން ނަމަވެސް ގަޑިއިރުތަކަކަށް ފަހު ސުނާމީގެ އިންޒާރު އުވާލި އެވެ.
