ރާއްޖޭގައި ފަޅު ހިއްކައިގެން ރިސޯޓު ތަރައްގީކުރަން ހިންގި މަޝްރޫއަކުން ފަނާ ކުރަނިވި ބަދަލެއް ވެއްޓަށް އައިސްފައި ނެތް ކަމަށް ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެއްޖެ އެވެ.
ވ. އަތޮޅުގެ ފަޅުގެ ބައެއް، ރިސޯޓު ތަރައްގީ ކުރަން ދޫކޮށްލަން ނިންމާފައި ވަނީ މަޝްވަރާ ކުރުމެއް ނެތި ކަމަށް އެ އަތޮޅު ކައުންސިލުގެ ރައީސް ޝުޖާއު އަލީ ވިދާޅުވި ވާހަކައާ ގުޅޭ ގޮތުން މިނިސްޓަރު މައުސޫމް "އަދަދު" ނޫހަށް ވިދާޅުވީ ޓޫރިޒަމް ތަރައްގީކުރުމާ ގުޅޭ ގޮތުން ރައްޔިތުންގެ ހިޔާލާއި ވިސްނުން ހުރި ގޮތް ދެނެގަތުމުގެ މަސައްކަތް މިނިސްޓްރީން ކުރަމުން އަންނަ ކަމަށެވެ.
އެ މަސައްކަތުގައި 100 އަށް ވުރެ ގިނަ ރަށަށް މިނިސްޓްރީގެ ޓީމުތައް ޒިޔާރަތް ކުރިއިރު، ވ. އަތޮޅުގެ ހުރިހާ ރަށެއްގެ ކައުންސިލުން އަދި ރައްޔިތުން ވެސް އެ އަތޮޅުގައި ޓޫރިޒަމް ތަރައްގީ ކުރަން ބޭނުންވާ ކަމަށް މައުސޫމް ވިދާޅުވި އެވެ.
ޓޫރިޒަމަކީ ގުދުރަތީ ވަސީލަތުގެ މައްޗަށް ބިނާވެފައި އޮތް ސިނާއަތެއް ކަމަށާއި އިންވެސްޓަރުން މަލްޓި މިލިއަން ޑޮލަރު ހޭދަކުރަނީ ވެށި ހަލާކުކޮށްލަން ނޫން ކަމަށް ވެސް މައުސޫމް ވިދާޅުވި އެވެ.
"މުޅި މާލެ އަތޮޅުގެ ލޭންޑްސްކޭޕް މި ވަނީ ބަދަލުވެފައި. ވަލްޑޯފް އެސްޓޯރިއާ މޯލްޑިވްސް އިތާފުށި ތަރައްގީކޮށްފައި ވަނީ އެ ތަނުގެ ފަރަށް ގެއްލުން ނުވާނެ ގޮތަށް. ހިއްކި ރަށެއްގެ އިހުސާސެއް އެ ތަނުން ނުވޭ،" ވެއްޓަށް ގެއްލުން ނުވެ ޓޫރިޒަމް ތަރައްގީ ކުރެވޭނެ ކަމުގެ މިސާލެއްގެ ގޮތުގައި އެ މަޝްރޫއު ފާހަގަ ކުރެއްވުމުގެ ގޮތުން އޭނާ ވިދާޅުވި އެވެ.
ރާއްޖޭގައި ހިއްކައިގެން ފުރަތަމަ ތަރައްގީކުރި ރީތިރަށުގެ ގުދުރަތީ ވެށީގައި މުއްސަނދިކަން ހުރިއިރު، އެތަނަށް ޒިޔާރަތް ކުރާ ޓޫރިސްޓުންގެ ގޯސް ރިވިއުއެއް ލިބިފައި ނެތް ކަމަށް ފާހަގަ ކުރެއްވެވި އެވެ.
ރިސޯޓު ތަރައްގީ ކުރަން ވ. އަތޮޅުން ދޫކުރަނީ 12 ވަރަކަށް ފިނޮޅު އޮންނަ ގުދުރަތީ ރީތިކަން ލިބިފައިވާ ސަރަހައްދެކެވެ. އެހެން ދިރުންތައް ވެސް މުއްސަނދި އެ ސަރަހައްދު ހިމާޔަތްކުރުމުގެ ގޮތުން އެންވަޔަރަމަންޓު މިނިސްޓްރީއާއެކު މަޝްވަރާކުރަމުން އަންނަތާ ހަތަރު ވަރަކަށް މަސް ވެއްޖެ ކަމަށް ޝުޖާއު ވިދާޅުވި އެވެ.
މިނިސްޓަރު ގަބޫލު ކުރައްވާ ގޮތުގައި މި ޒަމާނުގައި ތަނެއް ހިމާޔަތް ކުރުމަކީ އެތަނެއް ބޭނުން ކުރަމުން، ވެށީގެ ރައްކާތެރިކަން ދެމެހެއްޓުމެވެ.
