އިންވެސްޓްމެންޓް ފައިނޭންސިން އާއި އެޑްވައިޒަރީ ސާވިސް އަދި ތަކަފުލް އޮޕަރޭޝަންތައް ހިންގަން ރާއްޖޭން ބޭރުގައި ހުރި ފުރުސަތުތައް ބަލައި ދަނެގަންނަން އިސްލާމިކް ކޯޕަރޭޝަން ފޯ ދަ ޑިވެލޮޕްމެންޓް އޮފް ދަ ޕްރައިވެޓް ސެކްޓާ (އައިސީޑީ) އާ ގުޅިގެން މަސައްކަތް ކުރުމުގެ އެމްއޯޔޫއެއްގައި މިއަދު ސޮއިކޮށްފި އެވެ.
އަމާނާތަކަފުލް އިން ބުނީ މިއަދު ސޮއިކުރި އެއްބަސްވުމުގެ ދަށުން ގާއިމްކުރީ ދެފަރާތަށް ވެސް ފައިދާވާނެ ގުޅުމެއް ކަމަށެވެ. އަދި އެއީ ޝަރީއާ ހުއްދަކުރާ ގޮތުގެ މަތިން އިޖުތިމާއީ އިގުތިސާދީ ތަރައްގީ ކުރިއަރުވަން ލިބޭ ފުރުސަތެއް ކަމަށް ވެސް އެ ކުންފުނިން ބުންޏެވެ.
އައިސީޑީގައި ބައިވެރިވާ ގައުމުތަކުަގައި ތަފާތު ގިނަ ދާއިރާތަކަކުން ދެ ފަރާތް ގުޅިގެން މަސައްކަތް ކުރަން މިއަދު ސޮއިކުރި އެމްއޯޔޫގައި އެއްބަސްވި އެވެ. އިސްލާމީ އިންޝުއަރެންސްގެ އެކިއެކި އިންސްޓްރޫމެންޓް ތައާރަފް ކުރުމުގައި މަޝްވަރާ އާއި ލަފާ ހޯދަން ވެސް އެ އެމްއޯޔޫގައި ވެ އެވެ.
އައިސީޑީއަކީ އިސްލާމިކް ޑިވެލޮޕްމެންޓް ބޭންކާ ގުޅިގެން އެ ބޭންކްގެ މެމްބަރު ގިނަ ގައުމުތަކެއް ބައިވެރިވާ ގޮތަށް އުފައްދާފައިވާ އޯގަނައިޒޭޝަނެކެވެ. ސައުދީ އަރަބިއްޔާގެ ޖިއްދާގައި މަރުކަޒު ހުންނަ އެ އޯގަނައިޒޭޝަން އުފެއްދީ 1999 ވަނަ އަހަރު އެވެ.
އައިސީޑީގެ މަސައްކަތަކީ އެ އޯގަނައިޒޭޝަންގެ މެމްބަރު ގައުމުތަކުގެ ޕްރައިވެޓް ސެކްޓާއިން އިގުތިސާދީ ކުރިއެރުމަށް ހިންގާ މަޝްރޫއުތަކަށް ޝަރީއާގެ އުސޫލުތަކާ އެއްގޮތަށް މާލީ އެހީތެރިކަން ދިނުމެވެ.
އަމާނާތަކަފުލް އާއި އައިސީޑީއާ ދެމެދު ގާއިމްކުރި އެމްއޯޔޫގައި އައިސީޑީގެ ފަރާތުން ސޮއިކުރެއްވީ އަމާނާ ބޭންކް، ސްރީލަންކާގެ މެނޭޖިން ޑިރެކްޓަރު މުހައްމަދު އަޒްމީރެވެ. އޭނާ ސޮއިކުރެއްވީ އަމާނާތަކަފުލް މޯލްޑިވްސްގެ ޑެޕިއުޓީ ޗެެއާމަން އުސްމާން ގާސިމްގެ ފަރާތްޕުޅުންނެވެ. އައިސީޑީގެ ފަރާތުން ސޮއިކުރެއްވީ އެކްޓިން ސީއީއޯ ހާނީ ސަމްބަލް އެވެ.
