އާޒިމް ވަކިކުރީ ފަސް އަހަރު ވަންދެން ޕާޓީގެ ޓިކެޓުގައި އިންތިހާބެއްގައި ވެސް ވާދަނުކުރެވޭ ގޮތަށް!

މެދުހެންވޭރު ދާއިރާގެ މެމްބަރު އަލީ އާޒިމު އެމްޑީޕީން ވަކިކުރުމުގެ އިތުރުން ކުރިއަށް އޮތް ފަސް އަހަރު ޕާޓީގެ އެތެރޭގެ އެއްވެސް އިންތިހާބެއްގައި އޭނާއަށް ވާދަ ނުކުރެވޭނެ ކަމަށް ވެސް ކަނޑައަޅައިފި އެވެ.

އާޒިމް ޕާޓީން ވަކިކުރަން ނިންމީ އިއްޔެ ބޭއްވި ފިޔަވަޅު އަޅާ ކޮމިޓީގެ ބައްދަލުވުމުގަ އެވެ. ނަމަވެސް ނަމަވެސް އެހެން ފިޔަވަޅުތައް އަޅަން ނިންމީ މިއަދު ބޭއްވި އެ ކޮމިޓީގެ ބައްދަލުވުމުގަ އެވެ.

ޕާޓީގެ ޗެއާޕާސަން ނައިބު އިދާރީ އިބްރާހިމް ވަހީދު "އަދަދު" ނޫހަށް ވިދާޅުވީ އާޒިމަށް އަޅަން ނިންމި ފިޔަވަޅުތަކުގެ ތެރޭގައި ތިން ކަމެއް ހިމެނޭ ކަމަށެވެ.

އެ ފިޔަވަޅުތަކަކީ:

• އެއް އަހަރު ދުވަހުގެ މުއްދަތަށް ޕާޓީގެ މެންބަރުކަމުން ވަކިކުރުން
• އެއް އަހަރުގެ މުއްދަތަކަށްފަހު ޕާޓީއާ ގުޅެން އެދޭނަމަ، މެންބަރުކަމަށް އެދޭ ފޯމާއެކު ޕާޓީއަށް އަލަށް ގުޅެން ބޭނުންވާ 100 މެންބަރުންގެ ފޯމު ހުށަހެޅުން
• ފިޔަވަޅު އެޅި ތާރީހުން ފެށިގެން ފަސް އަހަރުގެ ތެރޭގައި ޕާޓީގެ އެއްވެސް މަގާމަކަށް އަދި ޕާޓީގެ އެއްވެސް ޕްރައިމަރީއެއްގައި ކުރިމަތި ނުލެވުން

ޕާޓީގެ އެތެރޭގެ އެއްވެސް އިންތިހާބަކަށް ވާދަނުކުރެއްވޭނެ ގޮތަށް އެޅި ފިޔަވަޅާއެކު، އާޒިމު ޕާޓީއާ އަލުން ގުޅިވަޑައިގެންނެވި ނަމަވެސް، އަންނަ އަހަރު ބާއްވާ ރައްޔިތުންގެ މަޖިލީހުގެ އިންތިހާބުގައި އެމްޑީޕީގެ ކެންޑިޑޭޓެއްގެ ގޮތުގައި ވާދައެއް ނުކުރެއްވޭނެ އެވެ.

އެޅި ފިޔަވަޅުތަކާ ގުޅޭ ގޮތުން އާޒިމް މިއަދު "އަދަދު" ނޫހަށް ވިދާޅުވީ އޭނާ އެމްޑީޕީން ވަކިވެފައިވާ ކަމަށް ފިޔަވަޅު އަޅާ ކޮމިޓީން ނިންމިޔަސް، އެ ކޮމިޓީ ބާއްވާފައިވަނީ ގޯސްކޮށް ކަމަށެވެ. "ހިއެއް ނުވޭ ތިޔައީ ރަނގަޅު ވާހަކައެއް ހެން ވެސް" ކަމަށް އޭނާ ވިދާޅުވި އެވެ.

"އަސާސީ ގަވާއިދުގައި އޮންނާނެ، ޕާޓީގެ ނައިބު ރައީސް އެއީ ކޮމިޓީގެ މުގައްރިރު، ކޮމިޓީގެ މުގައްރިރު ހުރެގެން ކޮމިޓީ ބޭއްވޭނީ ވެސް، މުގައްރިރު އަންގަވާނީ ވެސް ބައްދަލުވުންތަކަށް ވެސް، އެހެންވީމަ ކޮމިޓީ ނުވެސް ބޭއްވޭނެ ނޫންތޯ،" ކުރިން އެމްޑީޕީގެ ޕާލިމެންޓްރީ ގްރޫޕުގެ ލީޑަރުކަން ވެސް ކުރެއްވި އާޒިމް ވިދާޅުވި އެވެ.

އާޒިމު ޕާޓީން ވަކިކޮށް ފިޔަވަޅު އެޅީ ސަރުކާރު ހިންގާ މައި ޕާޓީން އާޒިމް ވަކިކުރީ، ފޯޅަވައްސާއި އައްޑޫއާ ދެމެދު އޮތް ކަނޑުގެ އިގުތިސޯދީ ސަރަހައްދުގެ އިން ވަކިކުރި މައްސަލާގައި އިދިކޮޅު ސިޔާސީ ޕާޓީތަކުން އުފައްދާފައިވާ "ފޯޅަވަހި ކޯލިޝަން"ގެ ބައްދަލުވުންތަކާއި ޕްރެސް ކޮންފަރެންސްގައި ބައިވެރިވެވަޑައިގެންނެވި މައްސަލަ އާއި ބަންޑާރަ ނައިބު އިބްރާހިމް ރިފްއަތުގެ އިތުބާރު ނެތްކަމުގެ މައްސަލައިގައި ސޮއިކުރެއްވުމާ ގުޅިގެންނެވެ.

ކަނޑުގެ އިންވަކިކުރި މައްސަލައިގައި ރާއްޖޭގެ އިގުތިސޯދީ ސަރަހައްދުން ބައެއް ގެއްލިފައިވާ ކަމަށް ބުނެ، ރައީސް އިބްރާހިމް މުހައްމަދު ސޯލިހު އަޒުލުކުރުމާއި ސަރުކާރާ ދެކޮޅަށް އަންނަ މަހު ދެ ވަނަ ދުވަހު ބޮޑު އެއްވުމެއް ބޭއްވުމަށް ވެސް ފޯޅަވަހި ކޯލިޝަނުން ދަނީ ތައްޔާރުވަމުންނެވެ.