ރިޔާދް، ސައުދީ އަރަބިއްޔާ (މޭ 15) - އަންނަ ހުކުރު ދުވަހު ފަށަން ހަމަޖެހިފައިވާ އަރަބި ސަމިޓަށް ތައްޔާރުވުމުގެ ގޮތުން ބޭއްވި ބައްދަލުވުންތަކުގައި 11 އަހަރަށް ފަހު ސީރިއާއިން ބައިވެރިވެއްޖެ އެވެ.
"އަރަބި ދައުލަތްތަކުގެ ލީގަށް އަލުން ސީރިއާއަށް މަރުހަބާ ކިޔަން،" ސައުދީ ފިނޭންސް މިނިސްޓަރު މުހައްމަދު އަލް ޖަދާން އެލް އެހްބަރިއްޔާ ޓީވީއަށް ދެއްވި އިންޓަވިއުގައި ވިދާޅުވި އެވެ.
އަރަބި ލީގުން ސީރިއާ ސަސްޕެންޑު ކުރީ ނޮވެމްބަރު 2011 ގަ އެވެ. މިއީ އޭގެ ފަހުން އެ ގައުމުގެ ވަފުދެއް އަރަބި ލީގުގެ ބައްދަލުވުމެއްގައި ބައިވެރިވި ފުރަތަމަ ފަހަރެވެ.
"މާޒީއަށް ނުބަލައި މުސްތަގުބަލާ މެދު ވިސްނަމުންދާކަން ބުނެދޭން މިއީ އަޅުގަނޑުމެންނަށް މުހިއްމު ފުރުސަތެއް،" ސީރިއާގެ ފޮރިން މިނިސްޓަރު ފައިސަލް މެކްދާދް ވިދާޅުވި އެވެ.
އަރަބި ލީގުން ސީރިއާ އެކަހެރި ކުރީ އެ ގައުމުގެ އިދިކޮޅު ފަރާތްތަކާ ދެކޮޅަށް ރައީސް ބައްޝާރުލް އަސަދް ކުރިއަށް ގެންދެވި ކެމްޕެއިނާ ގުޅިގެންނެވެ.
އަންނަ ހުކުރު ދުވަހު ޖިއްދާގައި އޮންނަ އަރަބި ލީގުގެ ލީޑަރުންގެ ބައްދަލުވުމުގައި ބައިވެރިވުމަށް ސައުދީއަށް ވަޑައިގެންނެވުމަށް ރަސްގެފާނު ސަލްމާން ވަނީ އަސަދަށް ދައުވަތު ފޮނުއްވައިފަ އެވެ.
އަރަބި ގައުމުތަކާއި ސީރިއާގެ ގުޅުން ރަނގަޅު ވާން ފަށާފައިވާ އިރު، ރިޔާދާއި ދިމިޝްކުގައި ހުންނަ ޑިޕްލޮމެޓިކް މިޝަންތައް ވެސް އަލުން ހުޅުވަން ވަނީ ނިންމައިފަ އެވެ.
ސީރިއާގެ ދާހިލީ ހަމަނުޖެހުމާ އެކު ހަނގުރާމަ ފެށުމުން، ބައްޝާރުލް އަސަދްގެ ސަރުކާރު އޮތީ އަރަބި ދުނިޔެއާ އެކަހެރިވެފަ އެވެ.
އެހެން ނަމަވެސް އިރާނާއި ސައުދީ އަރަބިއްޔާއިން ޑިޕްލޮމެޓިކް ގުޅުން ގާއިމްކުރި ފަހުން، އަރަބި ގައުމުތަކުން ސީރިއާއާ މެދު އަމަލުކުރާ ގޮތް ވެސް ވަނީ ބަދަލުވެފަ އެވެ.
ބައެއް އަރަބި ގައުމުތަކުން ސުލްހަ އިސްކޮށް، އެއްބައިވަންތަވަމުން ދިޔަ ނަމަވެސް، ގަތަރުން ބުނީ ސީރިއާއާ އެކު ގުޅުން ގާއިމް ނުކުރާނެ ކަމަށެވެ.
އޭގެ އިތުރުން ސީރިއާއާ އެކު ގުޅުން ގާއިމްކޮށް އަރަބި ލީގުގެ މެމްބަރުކަން ދޭން ނިންމުމުން، އެމެރިކާއިން ވަނީ ހިތްހަމަނުޖެހުން ފާޅުކޮށްފަ އެވެ.
