ވޮޝިންޓަން، އެމެރިކާ (މޭ 15) - އިންޑިއާގެ ބޮޑު ވަޒީރު ނަރެންދްރަ މޯދީ އެމެރިކާއަށް ދަތުރު ކުރައްވަން ހަމަޖެހިފައި ވަނިކޮށް، ދީނީ ހަމަނުޖެހުންތައް ކުށްވެރި ކުރަން އެމެރިކާއިން އިންޑިއާގެ ސަރުކާރަށް ގޮވާލައިފި އެވެ.
ދީނީ މިނިވަންކަމާ ގުޅޭ އަހަރީ ރިޕޯޓު އެމެރިކާގެ ސްޓޭޓް ޑިޕާޓްމަންޓުން އާއްމުކުރީ ހޯމަ ދުވަހު އެވެ. އެ ރިޕޯޓުގައި ވަނީ މޯދީގެ ބަރަތިޔަ ޖަނަތަ ޕާޓީ (ބީޖޭޕީ) އަށް ނިސްބަތްވާ ހަރުކަށި ފިކުރުގެ ހިންދޫ މީހުން މުސްލިމުންނާއި ނަސާރާއިންނާ ދެކޮޅަށް ހިންގާފައިވާ އަމަލުތައް ލިސްޓުކޮށްފަ އެވެ.
އެ ރިޕޯޓާ ގުޅޭ ގޮތުން ނޫސްވެރިންނަށް މައުލޫމާތު ދެއްވި އެމެރިކާގެ އިސް އޮފިޝަލަކު ވިދާޅުވީ އިންޑިއާއަކީ ކުރިއަށް ދިޔުމުގެ ގާބިލްކަން އޮތް ގައުމެއް ނަމަވެސް، ދީނީ ހަމަނުޖެހުންތައް ދުވަހަކަށް ވުރެ ދުވަހެއް އިތުރުވުމަކީ ކަންބޮޑުވުން ހުރި މައްސަލައެއް ކަމަށެވެ.
"އަޅުގަނޑުމެން އިންޑިއާގެ ސަރުކާރަށް މި ބާރު އަޅަނީ ހަމަނުޖެހުން ކުށްވެރިކޮށް، އެފަދަ އަމަލުތައް ހިންގާ މީހުންނާއި މައިނޯރިޓީންގެ އަގު ވައްޓާލައި ވާހަކަދައްކާ މީހުންނާ މެދު ފިޔަވަޅު އަޅަން،" އެ އޮފިޝަލް ވިދާޅުވި އެވެ.
އެމެރިކާއިން ކުރި ސީދާ ދިރާސާތަކާއި ނޫސްވެރިންނާއި އަމިއްލަ ޖަމިއްޔާތަކުގެ ދިރާސާގެ މައްޗަށް އެކުލަވާލި ރިޕޯޓުގައި ވަނީ މުސްލިމުންގެ އިމާރާތްތައް ބިމާ ހަމަކުރާ މައްސަލަ އާއި ގުޖަރާތު ސްޓޭޓުގައި ކުށުގެ ތުހުމަތު ކުރެވޭ މުސްލިމުންނަށް އާއްމު ތަންތަނުގައި ފުލުހުން އަނިޔާ ކުރާ މައްސަލަ ފާހަގަކޮށްފަ އެވެ.
ދީނީ މިނިވަންކަމާ ގުޅޭ ކަންކަމުގައި އެމެރިކާއިން ފާޑުކިޔާތީ އިންޑިއާއިން ހިތްހަމަނުޖެހެ އެވެ. ދީނީ ހަމަނުޖެހުންތަކާ ހެދި އިންޑިއާ ބްލެކްލިސްޓު ކުރުމަށް ދީނީ މިނިވަންކަމާ ގުޅޭ އެމެރިކާގެ ކޮމިޝަނުން ވެސް ވަނީ ސަރުކާރަށް ބާރު އަޅައިފަ އެވެ.
