ވެރިކަން ކުރާ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ތެރެއިން މަަސައްކަތްކުރާ "ފިކުރެއްގެ ދިރުން" ފެކްޝަނުގައި ހިމެނޭ މެދުހެންވޭރު ދާއިރާގެ މެމްބަރު އަލީ އާޒިމް އެ ޕާޓީގެ އަސާސީ ގަވާއިދާ ހިލާފުވެފައިވާ ކަމަށް ބުނެ އެ މައްސަލަ އެ ޕާޓީގެ ސެކްރެޓޭރިއެޓުގެ ސަމާލުކަމަށް ގެނެސްފި އެވެ.
އޭނާއަށް ފިޔަވަޅު އަޅަން ނިންމާފައިވާ އެޓާނީ ޖެނެރަލް އިބްރާހިމް ރިފްއަތުގެ އިތުބާރު ނެތް ކަމުގެ ވޯޓު މަޖިލީހަށް ވެއްދިއިރު އޭގައި ސޮއިކުރިކަމުގެ މައުލޫމާތު ލިބިފައިވާތީ ކަމަށް އެނގިފައިވެ އެވެ.
މި މައްސަލަ މަޖިލީހަށް ހުށަހަޅާފައިވަނީ ސަރުކާރާ އިދިކޮޅު ގުޅިފައިވާ ޕާޓީތަކުންނެވެ. އޭގެ ތެރޭގައި އިދިކޮޅު ޕީޕީއެމް/ ޕީއެންސީގެ އިތުރުން އެމްޑީޕީގެ ރައީސް މުހައްމަދު ނަޝީދުގެ ފިކުރެއްގެ ދިރުން ފެކްޝަންގެ މެންބަރުންނާއި އެމްއެންޕީ އާއި ޖުމްހޫރީގެ ޕާޓީ ހިމެނެ އެވެ. "އަދަދު" ނޫހަށް އެނގިފައިވާ ގޮތުގައި މި މައްސަލަ ވައްދާފައިވަނީ 15 މެމްބަރުންގެ ސޮޔާއެކު އެވެ.
އާޒިމްއަށް ފިޔަވަޅު އަޅަން އެދުނީ އެމްޑީޕީގެ ޕީޖީ ގްރޫޕްގެ ހިންގާ ގަވާއިދުގެ 48 ވަނަ މާއްދާ އާއި އެ ޕާޓީގެ އަސާސީ ގަވާއިދުގެ 16 ވަނަ މާއްދާއާ އޭނާ ހިލާފުވެފައިވާ ކަމަށް ބުނެ އެވެ.
އެކަމާ ގުޅިގެން އާޒިމްއަށް މައްސަލަ އެ ޕާޓީގެ ސެކްރެޓޭރިއެޓުގެ ސަމާލުކަމަށް ގެނައުމަށް އަސްލަމް ސިޓީއެއް ފޮނުވާފައިވާކަން އެމްޑީޕީން ވަނީ "އަދަދު" ނޫހަށް ކަށަވަރުކޮށްދީފަ އެވެ.
titledesc
އިތުބާރު ހުރި މަސްދަރަކުން "އަދަދު" ނޫހަށް މައުލޫމާތު ލިބިފައިވާ ގޮތުގައި ފޮރިން މިނިސްޓަރު އަބްދުالله ޝާހިދުގެ އިތުބާރު ނެތް ކަމަށް ވައްދަން އުޅޭ މައްސަލާގައި އާޒިމްގެ ސޮއި ދީފައި ނުވެ އެވެ. އެ މައްސަލަ މިހާރު އޮތީ މަޖިލީހުގަ އެވެ.
ރައީސް އަޒުލުކުރަން ވެސް "ފޯޅަވަހި ކޯލިޝަން" އިން މަސައްކަތް ފަށާފައިވާއިރު އެކަމުގައި ސޮއިކުރާ މެމްބަރުން ވަކިކުރާނެ ކަމުގެ އިންޒާރު އެމްޑީޕީން ވަނީ ދީފަ އެވެ.
ރާއްޖޭގެ ކަނޑުން ބައެއް "ވިއްކާލި" ކަމަށް ބުނެ އިދިކޮޅު ފަރާތްތަކުން އެކުލަވާލާފައިވާ "ފޯޅަވަހި ކޯލިޝަން" އިން ރޭ ބޭއްވި ނޫސްވެރިންގެ ބައްދަލުވުމުގައި ވެސް އާޒިމް ބައިވެރިވެވަޑައިގަތެވެ. އަދި, ރައީސް އަޒުލުކުރަން ސޮއިކުރައްވާނަންތޯ އެހުމުން ވިދާޅުވީ "ކަނޑުން ވިއްކާލި ބައި ހޯދަން ކުރަން ޖެހުނު ކޮންމެ ކަމެއް ކުރައްވާނެ" ކަމަށެވެ.
އާޒިމްގެ މައްސަލަ ސެކްރެޓޭރިއޭޓުން ދެން ފޮނުވާނީ އެ ޕާޓީގެ ފިޔަވަޅު އަޅާ ކޮމިޓީއަށެވެ. އޭނާއާ މެދު އަޅާނެ ފިޔަވަޅު ނިންމާނީ އެ ކޮމިޓީންނެވެ.
އަސާސީ ގަވާއިދުގައި މެމްބަރުން ވަކިވާނެ ކަމަށް އޮތް ނަމަވެސް އެ ގަވާއިދާ ހަވާލާދީ މެމްބަރުން ވަކިވިކަމަށް އެެމްޑީޕީއަކުން ނުނިންމާނެ ކަމަށް އެ ޕާޓީން ވަނީ ބުނެފަ އެވެ. އެކަން ކުރިއަށް ގެންދާނީ ފިޔަވަޅު އަޅާ ކޮމިޓީއަށް ހުށަހަޅައިގެން ކަމަށް އެ ޕާޓީން ކުރިން އޮތީ ބުނެފަ އެވެ.
ރައީސް މުހައްމަދު ނަޝީދު ލީޑުކުރައްވާ "ފިކުރެއްގެ ދިރުން" ފެކްޝަނުން މަޖިލީހުގައި މަސައްކަތް ކުރަމުންދަނީ އިދިކޮޅު ފަރާތްތަކާ ގުޅިގެންނެވެ. އެމްޑިޕީގެ ޕްރައިމަރީއަށް ފަހު ދެ ފެކްޝަންގެ ކޯޅުން ބޮޑުވެ ގިނަ ތުހުމަތުތަކެއް އެއްބަޔަކު އަނެއް ބަޔަކަށް ދަނީ އަމާޒު ކުރަމުންނެވެ.
