ބެންކޮކް، ތައިލޭންޑް (މޭ 14) - އާދީއްތަ ދުވަހު ތައިލޭންޑުގައި ބޭއްވި އިންތިހާބުގައި އިދިކޮޅު ޕާޓީތަކަށް ކުރި ލިބިފައިވާ ކަމަށް ދައްކައިފި އެވެ.
ކެމްޕެއިންގައި ފެނިގެން ދިޔައީ ސިފައިންގެ ވެރިކަމާއި ޝާހީ ގަނޑުވަރުގެ ތާއީދު އޮތް ބޮޑު ވަޒީރު ޕްރަޔުތް ޗަން އޮޗާ އާއި ޒުވާން ޖީލެއްގެ ވާދަވެރިކަމެވެ.
ގިނަ ވޯޓު ފޮށިތަކެއް ގުނައި ނިމުނު އިރު، މޫވް ފޯވާޑް ޕާޓީ (އެމްއެފްޕީ) އަށް ފަސް މިލިއަން ވޯޓު އަދި ފިޔު ތައި ޕާޓީއަށް 4.2 މިލިއަން ވޯޓު ލިބިފައިވެ އެވެ.
އަސްކަރީ ބަގާވާތަކުން 2014 ގައި ވެރިކަމަށް ވަޑައިގެންނެވި ޕްރަޔުތްގެ ޔުނައިޓެޑް ތައި ނޭޝަން ޕާޓީއަށް ލިބުނީ 1.7 މިލިއަަން ވޯޓެވެ.
އިންތިހާބުން ބަލިވި ނަމަވެސް، އަސްކަރިއްޔާއިން ދޫނުދީ ވެރިކަމުގައި ތިބުމުގެ ބިރު އެބަ އޮތެވެ. އެހެން ވެއްޖެ ނަމަ، ތައިލޭންޑުގައި އަނެއްކާވެސް ހަމަނުޖެހުން ބޮޑު ވާނެ އެވެ.
ކުރީގެ ބޮޑު ވަޒީރު އަދި ބިލިއަނަރު ތަކްސިން ޝިނަވަތުރާގެ ފިޔު ތައި ޕާޓީގައި އިސްކޮށް ހުންނެވީ އެމަނިކުފާނުގެ ދަރިކަނބަލުން ޕައެޓޮންގްޓާން އެވެ.
އެއްވެސް ޕާޓީއަކަށް ވެރިކަމަށް އާދެވޭ ވަރަށް ވޯޓު ލިބޭނެ ކަމަށް ނުފެންނާތީ، އިދިކޮޅު ޕާޓީތަކުގެ ވިސްނުން ހުރީ ކޯލިޝަނެއް ހެދުމަށެވެ.
ޕާޓީތަކަށް ކަށަވަރުވާ ގޮނޑީގެ އަދަދުތައް އިލެކްޝަންސް ކޮމިޝަނުން ރަސްމީކޮށް އާއްމުކުރާނީ ހަފުތާތަކެއް ފަހުންނެވެ. އެކަމަކު ބޮޑަށް ބެލެވެނީ ކޯލިޝަންގެ ވާދަވެރިކަން އޮންނާނީ ފިޔު ތައި އާއި އެމްއެފްޕީއާ ދެމެދު ކަމަށެވެ.
