އެމްޑީޕީގެ ރިޔާސީ ޕްރައިމަރީގައި އެ ޕާޓީގެ ރައީސް، މުހައްމަދު ނަޝީދަށް ތާއީދު ކުރައްވައި، ކެމްޕޭން ހަރަކާތްތަކުގައި އިސްކޮށް އުޅުއްވި، މާލެ ސިޓީ ކުރީގެ މޭޔަރު ސަރަނގު އާދަމް މަނިކު (ސަރަނގޭ) ރިޔާސީ އިންތިހާބުގައި ރައީސް ސޯލިހަށް ތާއީދުކުރައްވަން ނިންމަވައިފި އެވެ.
ރައީސް ސޯލިހަށް ތާއީދު ކުރައްވަން ނިންމަވާފައި ވާކަން ކަށަވަރު ކޮށްދެއްވައި އާދަމް މަނިކު "އަދަދު" ނޫހަށް ވިދާޅުވީ ރައީސް ސޯލިހަށް ތާއީދު ކުރުމަށް ނިންމީ ރައީސް އަކީ އެމްޑީޕީގެ މައިގަނޑު އަސާސްތައް ގަބޫލުފުޅު ކުރައްވާ ބޭފުޅަކަށްވުމުން ކަމަށެވެ.
"ރައީސް ސޯލިހަކީ އެމްޑީޕީގެ 'ކޯ ބިލީފްސްތައް ގަބޫލު ކުރައްވާ ބޭފުޅެއް، އަޅުގަނޑަކީ ވެސް އެމްޑީޕީގެ ކޯ ބިލީފްސްތައް ގަބޫލު ކުރާ މީހެއް [އެހެންވީމާ މި ނިންމުން ނިންމީ]،" އޭނާ ވިދާޅުވި އެވެ.
ރިޔާސީ ޕްރައިމަރީ މިހާރު އެވަނީ ނިމިފައި ކަމަށާއި ޕްރައިމަރީގެ ނަތީޖާ ގަބޫލު ނުކުރާނަމަ، ޕާޓީއަކީ އެއްވެސް ތާކުންތާކުޖެހޭ އެއްޗަކަށް ނުވާނެ ކަމަށް ވެސް އޭނާ ވިދާޅުވި އެވެ.
"ޕްރައިމަރީ ނިމިއްޖެ، ޕާޓީ ނިޒާމު އޮންނަ ގޮތުން ޕާޓީގެ ހުރިހާ މެންބަރުންނަށް ވެސް މަޖުބޫރުވޭ އިންތިހާބު ކާމިޔާބު ކުރައްވާ ބޭފުޅެއްގެ ފަހަތަށް އަރަން، އެހެން ނޫނީ ޕާޓީއަކީ ތާކުންތާކުޖެހޭ އެއްޗަކަށް ނުވާނެ، ބޭނުން އެއްޗަކަށް ވެސް ނުވާނެ،"
އާދަމް މަނިކު އެހެން ވިދާޅުވިއިރު ނަޝީދު އުޅުއްވަނީ ޕްރައިމަރީގެ ނަތީޖާ ގަބޫލު ނުކުރައްވައި އެމްޑީޕީ ތެރޭގައި ވަކި ފެކްޝަނެއް އަފައްދަވައިގެންނެވެ. އަދި އެ ފެކްޝަނުން ގެންދަނީ ރިޔާސީ އިންތިހާބަށް އަމިއްލައަށް ނުކުތުމަށް ނިންމާފައިވާ ޖުމްހޫރީ ޕާޓީއާ އެކުވެސް މަޝްވަރާތައް ކުރިއަށް ގެންދަމުންނެވެ.
އޭގެއިތުރުން އެ ފެކްޝަނުން ދަނީ ފޯޅަވަހި ކޯލިޝަނުގައި ވެސް ބައިވެރިވެ ރައީސުލްޖުމްހޫރިއްޔާ އާއި އެޓާނީ ޖެނެރަލް އަޒުލުކުރުމުގެ މަސައްކަތް މަޖިލީހުގެ ތެރެއިން ކުރުމަށް ތައްޔާރުވަމުންނެވެ.
އެކަންކަމަށް އިޝާރާތް ކުރައްވައި އާދަމް މަނިކު ވިދާޅުވީ ނަޝީދު އުފަންކުރުވައިގެން އުޅޭ ފިކުރެއްގެ ދިރުމުގައި އެއްވެސް އިރެއްގައި ބައިވެރި ނުވާކަމަށާއި އެމަނިކުފާނަށް ތާއީދު ކުރެއްވީ ޕްރައިމަރީގެ ކެންޑިޑޭޓަކަށް ވީމާ ކަމަށެވެ.
"އަޅުގަނޑު އެއްވެސް އިރެއްގައި ގަބޫލެއް ނުކުރަން ޕާޓީއަކީ ވަކި މީހެއްގެ، ވަކި ވިސްނުމެއްގެ އެއްޗެއް ކަމަކަށް، ސިޔާސީ ޕާޓީއަކާއި ފޭން ކުލަބަކާ މިއީ ވަރަށް ތަފާތު ދެ އެއްޗެއް،" ޕާޓީ ހަލާކުވާ ފަދަ ނުވަތަ ހަލަބޮލިވާ ފަދަ ކަންކަމަކީ އެއްވެސް އިރެއްގައި ތާއީދު ކުރެއްވި ކަމެއް ނޫންކަން ފާހަގަ ކުރައްވަމުން އޭނާ ވިދާޅުވި އެވެ.
"އަޅުގަނޑު ހިތްހަމަ ނުޖެހޭ މީހެއް ނުވަތަ ތިބޭފުޅާ ހިތްހަމަ ނުޖެހޭ މީހެއް ވީމާ ނުކުމެގެން ދާން، އެކަހަަލަ ވިސްނުން ގެންގުޅޭ މީހެއް ނޫން އަޅުގަނޑަކީ،"
އޭނާ އިތުރަށް ވިދާޅުވީ ރައީސް ސޯލިހަށް ދެވަނަ ދައުރެއް ދޭންޖެހޭ ކަމަށް ގަބޫލުކުރައްވާ ކަމަށާއި މިހާރު އެ ހުންނެވީ ރައީސް އިބްރާހިމް މުހައްމަދު ސޯލިހަށް އެއްބުރުން ރިޔާސީ އިންތިހާބު ކާމިޔާބު ކުރެވޭވަރަށް މަސައްކަތް ކޮށްދެއްވުމަށް ތައްޔާރަށް ކަމަށެވެ.
އާދަމް މަނިކު ރައީސް ސޯލިހަށް ތާއީދު ކުރެއްވުމަށް ނިންމަވާފައިވާއިރު، އެމްޑީޕީ ތެރޭގައި ވަނީ ދެ ފެކްޝަނުގެ ވާދަ ވަރަށް ބޮޑުވެ މައްސަލަ އިންތިހާއަށް ގޯސްވެފަ އެވެ. އެ ވާދައިގެ ތެރެއިން ރައީސް ނަޝީދަށް ތާއީދު ކުރައްވާ މެންބަރުން ގެންދަނީ ރައީސް ސޯލިހަށް ރިޔާސީ އިންތިހާބު ކާމިޔާބު ނުކުރެވޭނެ ކަމަށާއި ރައްޔިތުންގެ ތާއީދެއް އެ މަނިކުފާނަށް ނެތް ކަމަށް ފާޅުގައި ވިދާޅުވަމުންނެވެ.
