ޕެރިސް (މެއި 14) - ކްލަބްގެ ހުއްދަ ނުހޯދައި ސައުދީ އަރަބިއްޔާ އަށް ދިޔަ މައްސަލައިގައި ޕީއެސްޖީން ސަސްޕެންޑްކުރި ލިއޮނަލް މެސީ، އަލުން އެނބުރި އައި މެޗުގައި ރޭ ޕީއެސްޖީ ސަޕޯޓަރުންގެ ބަޔަކު މެސީއާ ދިމާކޮށްލިއިރު، ޕީއެސްޖީން އެޖަސިއޯ އަތުން 5-0 އިން މޮޅުވެއްޖެ އެވެ.
ދެ ހަފްތާ އަށް ސަސްޕެންޑްކުރި މެސީ، 36، ހަފްތާއެއްހާ ދުވަސްތެރޭ އަލުން އެނބުރި އައިސް ޓީމަށް މެޗެއް ކުޅެދިންއިރު، މި މެޗުގައި މެސީ އަށް ބޯޅަ ލިބޭ ކޮންމެ ފަހަރަކު ސަޕޯޓަރުންގެ ބަޔަކު ވަނީ އަޑުގަދަކޮށް، ނުރުހުމުގެ ޝުއޫރުތައް ފާޅުކޮށްފަ އެވެ. މިދިޔަ މަހު ކުރީކޮޅުގައި ލިޔޯން އަތުން ޕީއެސްޖީ ބަލިވި މެޗުގައި ވެސް އެ ޓީމުގެ ސަޕޯޓަރުންގެ ބަޔަކު ވަނީ މެސީއާ ދިމާކޮށްލައިފަ އެވެ.
ޕީއެސްޖީ ސަޕޯޓަރުން މެސީއާ މެދު ނުރުހުންވާ އެއް ސަބަބަކީ މި ސީޒަނަށް ފަހު ކޮންޓްރެކްޓް ހަމަވުމުން އެ ކްލަބް ދޫކޮށް މެސީ އެހެން ޓީމަކާ ގުޅޭ ވާހަކަތައް މީޑިއާގައި ދެކެވޭ މިންވަރު އިތުރުވަމުންދާތީ އެވެ.
އަމިއްލަ ދަނޑުގައި ރޭ ޕީއެސްޖީން ކުޅުނު މެޗުގައި އެ ޓީމުގެ ފަސް ގޯލުގެ ތެރެއިން ދެ ލަނޑު ޖަހައި، ކީލިއަން އެމްބާޕޭ ވަނީ ލީގުގައި 25 ގޯލު ހަމަކޮށްފަ އެވެ. މިއީ އެމްބާޕޭގެ ކެރިއަރުގައި ލީގުގައި 25 ގޯލު ހަމަކުރި ހަތަރު ވަނަ ފަހަރެވެ. ޕީއެސްޖީ އަށް ދެން ގޯލުތައް ޖަހައިދިނީ ފަބިއަން ރުއީޒް އާއި އަޝްރަފް ހަކީމީގެ އިތުރުން އެޖަސިއޯގެ މުހައްމަދު ޔޫސުފް އަތުން ބައިކޮޅަށް ވަން ގޯލެކެވެ.
ޕީއެސްޖީ އާއި އެޖަސިއޯ ވެސް މި މެޗު ނިންމާލީ ކުޅުންތެރިއަކު މަދުކޮށެވެ. މެޗުގެ ފަހު ކޮޅުގައި ޕީއެސްޖީގެ ހަކީމީ އާއި އެޖަސިއޯގެ ތޯމަސް މަންގާނީ އަށް ވަނީ ރަތް ކާޑެއް ދައްކައިފަ އެވެ.
ލީގުގެ އެއް ވަނައިގައި އޮތް ޕީއެސްޖީ އަށް 35 މެޗުން 81 ޕޮއިންޓް ލިބިފައިވާއިރު، ބާކީ ތިން މެޗުން ހަތަރު ޕޮއިންޓް ހޯދައިގެން ޕީއެސްޖީ އަށް 11 ވަނަ ފަހަރަށް ފްރެެންޗް ލީގު ކާމިޔާބު ކުރެވޭނެ އެވެ. މި ފަހަރު ތަށި ހޯދައިފިނަމަ ޕީއެސްޖީ ވެގެންދާނީ ފްރެންްޗް ލީގުގެ ތާރީހުގައި ވެސް އެންމެ ކާމިޔާބު ޓީމަށެވެ.
ރޭގެ މެޗުން ބަލިވެ، އެޖަސިއޯ ވަނީ ރެލިގޭޓްވެފަ އެވެ. އެ ޓީމު މި ވަގުތު ލީގުގެ 18 ވަނައިގައި އޮތީ 35 މެޗުން 23 ޕޮއިންޓް ހޯދައިގެންނެވެ.
