މޮސްކޯ، ރަޝިއާ (މޭ 13) - ޔޫކްރެއިންގެ ބޯޑަރު ކައިރިން ހޮނިހިރު ދުވަހު ރަޝިއާގެ ހެލިކޮޕްޓަރެއް ވެއްޓިފައިވާ ކަމަށް އިދާރާތަކުން ބުނެފި އެވެ.
ދެކުނު ރަޝިއާގެ ބްރިޔާންސްކް ސަރަހައްދުގެ ގަވަރުނަރު އެލެގްޒެންޑާ ބޮގޯމާޒް ޓެލެގްރާމް މެދުވެރިކޮށް ވިދާޅުވީ ހެލިކޮޕްޓަރު ވެއްޓުނީ ކްލިންޓްސީ އަވަށަށް ކަމަށެވެ.
އޭގައި ތިބި ކްރޫ މެމްބަރުންނަށް ވީ ގޮތެއް ސާފެއް ނޫނެވެ. އެހެން ނަމަވެސް އަަންހެނަކަށް އަނިޔާވެ ހޮސްޕިޓަލުގައި ފަރުވާ ދޭން ޖެހުނު ކަމަށް ބޮގޯމާޒް ވިދާޅުވި އެވެ.
"ފަސް ގެޔަކަށް ގެއްލުން ލިބުނު،" އޭނާ ވިދާޅުވި އެވެ. ހެލިކޮޕްޓަރު ވެއްޓެން ދިމާވީ ކީއްވެގެން ކަމެއް ރަޝިއާއިން ނުބުނެ އެވެ.
ބޯޑަރު ކައިރިން ހެލިކޮޕްޓަރެއް ވެއްޓުނު އިރު، ދެކުނު ޔޫކްރެއިންގެ ޒަޕޮރިއްޒިޒިއާ ސަރަހައްދުގައި ހުންނަ ރަޝިއާގެ އިސް އޮފިޝަލް ވްލެޑިމިއާ ރޮގޯވް ވިދާޅުވީ އެ ތަނުގައި ހަތަރު ވައިގެ އުޅަނދު ވެއްޓުނު ކަމަށެވެ.
އެއީ ދެ ހެލިކޮޕްޓަރާއި ދެ ޖެޓެވެ. އެ އުޅަނދުތައް ވެއްޓުނީ ޔޫކްރެއިނުން ބަޑި ޖެހުމުން ކަމަށް ވެސް އޭނާ ވިދާޅުވި އެވެ. އެ އުޅަނދުތަކުގައި ތިބި މީހުން މަރުވި ކަމަށް އޭނާ ފާހަގަކުރެއްވި އެވެ.
ރަޝިއާގެ އުޅަނދުތަކެއް ވެއްޓޭ މަންޒަރު ފެންނަ ވީޑިއޯ ސޯޝަލް މީޑިއާގައި ވަނީ ދައުރުވެފަ އެވެ. އެކަމާ ގުޅޭ ގޮތުން ރަޝިއާގެ ޑިފެންސް މިނިސްޓްރީން ވަކި އެއްޗެއް ނުބުނެ އެވެ.
