ރައީސް އިބްރާހީމް މުހައްމަދު ސޯލިހު އަޒުލުކުރަން ރައްޔިތުންގެ މަޖިލީހަށް ހުށަހެޅުމުގައި އެމްޑީޕީގެ މެމްބަރުން ބައިވެރިވެއްޖެ ނަމަ އެ މެމްބަރުން ޕާޓީން ވަކިކުރުމުގެ ކަންތައް ކުރިއަށް ގެންދާނެ ކަމަށް އެމްޑީޕީގެ ޗެއާޕާސަންގެ ނައިބު އިދާރީ އިބްރާހީމް ވަހީދު (މަދަނަ އިބުރޭ) ވިދާޅުވެއްޖެ އެވެ.
ރައީސް އަޒުލުކުރަން އިދިކޮޅު ޕީޕީއެމް/ޕީއެންސީ އާއި ޖުމްހޫރީ ޕާޓީ އާއި އެމްއެންޕީން ވަނީ ގުޅިފައިވާ ޕާލަމެންޓްރީ ގްރޫޕެއް އުފައްދައިފަ އެވެ. އެމްޑީޕީގެ އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ތާއީދުކުރާ "ފިކުރެއްގެ ދިރުން" ފެކްޝަނުން ވެސް އެ ގްރޫޕްގައި ބައިވެރިވެ އެވެ.
ރައީސް އަޒުލުކުރަން މަސައްކަތްކުރާ މެމްބަރުންނަށް އެެމްޑީޕީން ފިޔަވަޅު އަޅާނެތޯ "އަދަދު" ން ސުވާލުކުރުމުން އެޕާޓީގެ ޗެއާޕާސަން އަދި އިކޮނޮމިކް މިނިސްޓަރު ފައްޔާޒް އިސްމާއީލް ވިދާޅުވީ އެކަމާ ބެހޭ މައުލޫމާތު އަދި ލިބިވަޑައިގެންފައި ނުވާ ކަމަށެވެ. ފައްޔާޒް މިވަގުތު ހުންނެވީ ރާއްޖޭން ބޭރުގަ އެވެ.
އެމްޑީޕީގެ ޗެެއާޕާސަންގެ ނައިބު (އިދާރީ) އަދި ރައީސް އޮފީހުގެ މިނިސްޓަރު އިބްރާހީމް ވަހީދު (މަދަނަ އިބުރޭ) އާ އެ ސުވާލުކުރުމުން އޭނާ ވިދާޅުވީ "އެމްޑީޕީގެ އަސާސީ ގަވައިދު ބުނާ ގޮތުން މިހާރު ވެސް އެ މެމްބަރުން އެތިބީ ވަކިވެފައި" ކަމަށެވެ.
"އެމްޑީޕީގެ އަސާސީ ގަވައިދުގައި އެބަ އޮތް ޕާޓީން ވަކިވާނެ ގޮތް. އޭގެ ތެރޭގައި އޮންނަނީ ބުނެފައި އެހެން ޕާޓީއެއްގެ ހަރަކާތްތަކުގައި ބައިވެރިވުން [އެއީ ވަކިވާނެ ކަމެއް ކަމަށް]. މިހާރު އުސޫލެއްގެ ގޮތުން އެހެން ޕާޓީއެއްގެ ހަރަކާތްތަކުގައި ތާ އެ ބައިވެރިވަނީ،" އިބުރޭ ވިދާޅުވި އެވެ.
އޭނާ ވިދާޅުވި ގޮތުގައި މިހާރު ކުރަން ޖެހޭ ހަމަ އެކަނި ކަމަކީ އެ މެމްބަރުން ޕާޓީން ވަކިވެއްޖެ ކަން ރަސްމީކޮށްލުމެވެ.
އޭނާ ވިދާޅުވި ގޮތުގައި އަސާސީ ގަވާއިދުގައި އެހެން އޮތް ނަމަވެސް އެ ގަވާއިދާ ހަވާލާދީ މެމްބަރުން ވަކިވިކަމަށް އެެމްޑީޕީއަކުން ނުނިންމާނެ އެވެ. އެކަން ކުރިއަށް ގެންދާނީ ފިޔަވަޅު އަޅާ ކޮމިޓީއަށް ހުށަހަޅައިގެން ކަމަށް ވެސް އޭނާ ވިދާޅުވި އެވެ.
"އަޅުގަނޑުމެން ހަމަ ކޮމިޓީއަށް ފޮނުވައިގެން، ވަކިކުރަން ޖެހުނަސް ހަމަ އުސޫލުގެ ތެރެއިން ވަކިކުރާނީ. ކުރާނަން އެކަން،" އިބުރޭ ވިދާޅުވި އެވެ.
އެހެން ނަމަވެސް އެ މަރުހަލާ ފަށާނީ ރައީސް އަޒުލުކުރުމުގެ މައްސަަލަ މަޖިލީހަށް ވައްދާ ހިސާބުން ކަމަށް ވެސް އޭނާ ވިދާޅުވި އެވެ.
"ފޯޅަވަހި ކޯލިޝަން" ގައި އެމްޑީޕީއަށް ނިސްބަތްވާ މެމްބަރުން ތިއްބެވިއިރު އެ ކޯލިޝަން އިސްވެ އޮވެ ވަނީ ރައީސް ސޯލިހުގެ ބަންޑާރަނައިބު އިބްރާހިމް ރިފްއަތުގެ އިތުބާރު ނެތް ކަމަށް ހުށަހަޅާފަ އެވެ. ޖުމުލަ 15 މެމްބަރުންނާ އެކު އެ މައްސަލަ މިހާރު ވަނީ މަޖިލީހަށް ވައްދާފަ އެވެ.
