ކިޔެވް، ޔޫކްރެއިން (މޭ 12) - ރަޝިއާ އާއި ޔޫކްރެއިންގެ ހަނގުރާމަ އެންމެ ވަރުގަދައަށް ކުރިއަށްދާ ބަހްމޫތު ސިޓީ ކައިރިން ގެއްލުނު ބިމުގެ ބޮޑު ސަރަހައްދުތަކެއް އަލުން ހޯދާފައިވާ ކަމަށް ޔޫކްރެއިނުން ހުކުރު ދުވަހު ބުނެފި އެވެ.
އެކަމަކު އެ ވާހަކަ ދޮގުކޮށް ރަޝިއާއިން ބުނީ ބަހްމޫތު ކައިރިން ދޭން އުޅުނު ބޮޑު ހަމަލާއެއް ހުއްޓުވައި ޔޫކްރެއިންގެ ސިފައިން ފަހަތަށް ޖައްސާފައިވާ ކަމަށެވެ.
އެހެން ނަމަވެސް ރަޝިއާގެ ސިފައިންނާ އެކު ޔޫކްރެއިން ހަނގުރާމައިގައި ބައިވެރިވާ ވާގްނާ އަސްކަރީ ގްރޫޕުގެ ވެރިޔާ ޔެވްގެނީ ޕްރިގޯޝިން ތުހުމަތު ކުރެއްވީ ރަޝިއާގެ ސިފަައިން ފިލަމުންދާ ކަމަށެވެ.
ގެއްލުނު ބިންތައް އަނބުރާ ހޯދަން ބޮޑު އޮޕަރޭޝަނަކަށް ޔޫކްރެއިނުން ތައްޔާރުވާތާ ދުވަސްތަކެއް ވެއްޖެ އެވެ. ޕްރިގޯޝިން ވިދާޅުވީ މިހާރު ކުރިއަށް ދަނީ އެ އޮޕަރޭޝަން ކަމަށެވެ.
އެކަމަކު ޔޫކްރެއިންގެ ރައީސް ވޮލޮޑިމިރް ޒެލެންސްކީ މި ހަފުތާގައި ވިދާޅުވީ އަދިވެސް އެ އޮޕަރޭޝަން ނުފަށާ ކަމަށާއި ސިފައިން ތައްޔާރުވުމަށް އިތުރު ވަގުތު ބޭނުންވާ ކަމަށެވެ.
ޔޫކްރެއިންގެ އިރުމަތީގައި ހަނގުރާމައިގެ ކުރީ ސަފުގެ ހަމަލާތައް ވަރުގަދަވަމުންދާ އިރު، މި ފެށޭ ހަފުތާގައި ޗައިނާގެ ހާއްސަ މަންދޫބެއް ޔޫރަޕަށް ދަތުރު ކުރާނެ އެވެ.
ހަނގުރާމައަށް ސިޔާއީ ހައްލެއް ހޯދުމުގެ މަޝްވަރާއަށް ރަޝިއާ އާއި ޔޫކްރެއިންގެ އިތުރުން ޕޮލޭންޑް، ފްރާންސް އަދި ޖަރުމަނަށް ވެސް ޑިޕްލޮމެޓް ލީ ހުއި ވަޑައިގަންނަވާނެ އެވެ.
