ކިޔެވް، ޔޫކްރެއިން (މޭ 11) - ރަޝިއާގެ ފައުޖާ ދެކޮޅަށް ބޮޑު ހަމަލާއެއް ދެވޭނީ ވަގުތު ލިބި ރަނގަޅަށް ތައްޔާރުވެގެން ކަމަށް ޔޫކްރެއިންގެ ރައީސް ވޮލޮޑިމިރް ޒެލެންސްކީ ވިދާޅުވެއްޖެ އެވެ.
"މިހާރު ހުރި ހަތިޔާރާ އެކު ކުރިއަށް ގޮސް ކާމިޔާބު ލިބޭނެ. އެކަމަކު ގިނަ ބަޔަކު މަރުވުމުގެ ފުރުސަތު ބޮޑު. އެއީ ބަލައިގަނެވޭނެ ކަމެއް ނޫން. އެހެންވީމާ މަޑުކުރަން އެބަ ޖެހޭ. އަޅުގަނޑުމެންނަށް އަދިވެސް ވަގުތުކޮޅެއް ބޭނުން،" ބީބީސީއަށް ދެއްވި އިންޓަވިއުއެއްގައި ޒެލެންސްކީ ވިދާޅުވި އެވެ.
ޔޫކްރެއިން ފައުޖުގައި މުޅިން އަލަށް ހިމެނި ސިފައިން ތަމްރީންކޮށް ހުޅަނގުގެ ހަތިޔާރު އެއްކުރަމުން ދާތާ ދުވަސްތަކެއް ވެއްޖެ އެވެ.
އެނެލިސްޓުން ބުނާ ގޮތުގައި ޔޫކްރެއިނުން ތައްޔާރު ވަނީ ގެއްލިފައިވާ ސަރަހައްދު އަނބުރާ ހޯދަން ބޮޑު ހަމަލާއެއް ދިނުމަށެވެ. އެއީ އިރުމަތީ ޑޮނެސްކް އާއި ލުހާންސްކް، ހާސަން އަދި ޒަޕޮރިއްޒިޒިއާގެ ހިސާބުތަކެވެ.
އެޕްރީލް މަހުގެ ފަހުކޮޅު ޔޫކްރެއިން ޑިފެންސް މިނިސްޓަރު އޮލެކްސީ ރެޒްނިކޯވް ވިދާޅުވީ ތައްޔާރީތައް ނިމެން ގާތްވެފައިވާ ކަމަށެވެ. އެކަމަކު އެމެރިކާއިން ފޯރުކޮށްދޭން އެއްބަސްވު އަބްރަމް ޓޭންކުތައް އަދިވެސް ނުލިބޭ ކަމަށް ވިދާޅުވި އެވެ.
ބެލެވޭ ގޮތުގައި އެ ޓޭންކުތައް ޔޫކްރެއިނަށް ލިބޭނީ މި އަހަރު ފަހުކޮޅު އެވެ. އެހެންވެ، ޔޫކްރެއިނުން ތައްޔާރު ވަނީ އެ ޓޭންކުތައް ނުލައި ވެސް ރަޝިއާއާ ދެކޮޅަށް ބޮޑު ހަމަލާއެއް ދިނުމަށެވެ.
