އަމީނީ މަގު ތަރައްގީ ކުރަން ރޯޑް ޑިވޮލޮޕްމެންޓު ކޯޕަރޭޝަން (އާރްޑީސީ) އަށް ބޭނުންވާ ތާރު މެޝިން ގެނެސް ހުޅުމާލޭ ދެ ވަނަ ފިޔަވަހީގައި ހުންނަ އެ ކުންފުނީގެ ސައިޓެއްގައި ބަހައްޓައިފި އެވެ.
އަމީނި މަގު ޒަމާނީ ފެންވަރަށް ތަރައްގީކުރުމުގެ ގޮތުން އެ މަގު ހެދުމުގެ މަސައްކަތް އާރުޑީސީން މިދިޔަ އޯގަސްޓު 30, 2022, ގައި ފެށި ނަމަވެސް، ތާރު އަޅަން ގެނައި މެޝިނުތައް ބަހައްޓާނެ ބިން ނުލިބުމުން މަސައްކަތް ލަސްވެ، މަގުގެ ފުރަތަަމަ ތިން ސެގްމަންޓުގައި ތާރު އެޅީ އާރްޑީސީން އެ މަސައްކަތް އެމްޓީސީސީއާ ހަވާލުކޮށްގެންނެވެ.
އެކަމަކު، އަމީނީ މަގުގައި ތާރު އަޅަން ބޭނުންވާ އާރްޑީސީގެ މެޝިނުތައް މިހާރު ހުޅުމާލޭގެ ދެ ވަނަ ފިޔަވަހީގެ ބިމެއްގައި ބަހައްޓާފައިވާއިރު، އެ މެޝިނުތައް ބޭނުންކުރަން ދަނީ ތައްޔާރުވަމުންނެވެ. އެކަން އާރްޑީސީގެ މީޑިއާ އޮފިޝަލަކު ވަނީ މި ނޫހަށް ކަށަވަރުކޮށްދެއްވައިފަ އެވެ.
އެ މެޝިނުތައް ބޭނުންކޮށްގެން، މިހާރު މަސައްކަތް ކުރިއަށްދާ މަގުގެ ސެގްމަންޓުތަކުގައި ތާރު އެޅުމުގެ މަސައްކަތް އެކީ އެއްފަހަރާ ކުރިއަަށްގެންގޮސް ވަރަށް އަވަހަށް ނިންމާލާނެ ކަމަށް އޮފިޝަލު ވިދާޅުވި އެވެ.
ދަރުބާރުގެ ކައިރިން ފަށައިގެން ސްޓެލްކޯއާ ހިސާބަށް އަމީނީ މަގުގައި ތާރު އަޅައި ނިންމައި އާންމުންނާ ހުޅުވާލީ މާޗު 6، ގަ އެވެ. ސްޓެލްކޯއިން ފެށިގެން ބިލަބޮން ހައި އިންޓަނޭޝަނަލް ސްކޫލާ ހިސާބަށް މަގުގެ އަޑީގައި ހޮޅިތައް އެޅުމާއި އެހެނިހެން މަސައްކަތްތައް މިހާރު ދަނީ ކުރިއަށެވެ.
އަމީނީ މަގު ހެދުމުގެ މަސައްކަތް އާރްޑީސީއާ ހަވާލު ކުރީ 210 ދުވަސް ތެރޭގައި ނިންމާ ގޮތަށެވެ. އެ މަސައްކަތް ހަވާލު ކުރީ 84 މިލިއަން ރުފިޔާއަށެވެ.
މެއި 28، 2023 އަށް މަސައްކަތް ނިންމުމުގެ މުއްދަތު ހަމަވާއިރު، މަޝްރޫއު ލަސްވެ އާންމުންނަށް އުނދަގޫވާ ކަމުގެ ޝަކުވާ ބޮޑެވެ. ޕްލޭނިން މިނިސްޓްރީއިން އެންމެ ފަހުން ބުނެފައި ވަނީ ހުރިހާ މަސައްކަތެއް ނިންމާލެވޭނެ ކަމަށް ބެލެވެެނީ މި އަހަރުގެ ސެޕްޓެމްބަރު 27، ގައި ކަމަށެވެ.
