ޕެރިސް، ފްރާންސް (މޭ 10) - ޔޫކްރެއިން ހަނގުރާމައިގައި ރަޝިއާއަށް ކުރި ނުލިބޭނެކަން ވިސްނައިދޭން ފްރާންސުން ޗައިނާގައި އެދެފި އެވެ.
ހަނގުރާމައަށް ސުލްހައެއް ފެނޭތޯ މެދުވެރިއެއްގެ ދައުރު އަދާކުރަން ޗައިނާއިން ބޭނުންވާ އިރު، ފްރާންސްގެ ފޮރިން މިނިސްޓަރު ކެތެރީން ކޮލޮންނާ ވިދާޅުވީ "ސުލްހައަށް އެނބުރި ދިޔުމަށް" ރަޝިއާއަށް ބާރު އަޅަން ޖެހޭ ކަމަށެވެ.
"ޗައިނާއިން ރަޝިއާއާ އެކު ބާއްވާ ގާތް ގުޅުމުގެ ބޭނުންކޮށް، މި ހަނގުރާމައިން ކުރި ނުލިބޭނެކަން ވިސްނައިދިނުން މަޖުބޫރު،" އޭނާ ވިދާޅުވި އެވެ.
މިދިޔަ މަހު ފްރާންސްގެ ރައީސް އިމޭނުއެލް މެކްރޯން ވަނީ ޗައިނާއަށް ދަތުރު ކުރައްވައިފަ އެވެ. އޭގެ ފަހުން އެމަނިކުފާނު ވިދާޅުވީ ޓައިވާންގެ މައްސަލައިގައި ޔޫރަޕުން އެމެރިކާ ނުވަތަ ޗައިނާގެ ފަޅި އިހްތިޔާރު ކުރުން ބުއްދިވެރި ނޫން ކަމަށެވެ.
އެ ވާހަކައަށް ޔޫރަޕްގެ އެހެން ލީޑަރުންގެ ފާޑުކިޔުން އަމާޒުވި އެވެ. ޖަރުމަނު ޑިފެންސް މިނިސްޓަރު ބޮރިސް ޕިސްޓޯރިއަސް ވިދާޅުވީ ޔޫރަޕަކީ އެއް އިރެއްގައި ވެސް އެމެރިކާގެ "ދަށުގައި" އޮތުމުގެ ނުރައްކާ ކުރިމަތިވެފައިވާ ތަނެއް ނޫން ކަމަށެވެ.
މި ހަފުތާގައި ޗައިނާއިން ބުނީ އެ ގައުމުގެ ފޮރިން މިނިސްޓަރު ޗިން ގާންގް ޖަރުމަނާއި ނޯވޭއަށް ދަތުރު ކުރައްވާނެ ކަމަށެވެ.
