ޕެރިސް، ފްރާންސް (މޭ 10) - ޔޫކްރެއިން ހަނގުރާމައިގެ ތެރެއިން މަރުވި އޭއެފްޕީގެ ނޫސްވެރިޔާގެ ހަނދާނުގައި އޭއެފްޕީގެ މައި އިދާރާގައި ނޫސްވެރިން ޖަމާވެއްޖެ އެވެ.
ފްރާންސަށް ނިސްބަތްވާ އަރްމަން ސޯލްޑިން މަރުވި އިރު އުމުރުން 32 އަހަރެވެ. އޭނާ މަރުވީ ބަހްމޫތު ކައިރިން ދިން ހަމަލާއެއްގަ އެވެ. އޭނާއަކީ ޔޫކްރެއިންގައި އުޅުނު އޭއެފްޕީގެ ވީޑިއޯ ކޯޑިނޭޓަރެވެ.
ހަމަލާ ދިން އިރު ސޯލްޑިން އާއި އޭއެފްޕީގެ އެހެން ނޫސްވެރިންތަކެއް ދަތުރު ކުރަމުން ދިޔައީ ޔޫކްރެއިންގެ ސިފައިންނާ އެކު އެވެ. ސޯލްޑިން މަރުވި ނަމަވެސް، އިތުރު މީހަކަށް އަނިޔާއެއް ނުވެ އެވެ.
އޭއެފްޕީގެ ނިއުސް ޑިރެކްޓަރު ފިލް ޗެޓްވީންޑް ވިދާޅުވީ މުޅި ކުންފުންޏަށް ޝޮކެއް ލިބިފައިވާ ކަމަށާއި ހަނގުރާމައިގެ ނުރައްކާ އެނގުނު ނަމަވެސް، އެކުގައި މަސައްކަތް ކުރި މީހަކު ގެއްލިގެން ދިޔުމުން އެންމެންނަށް ވެސް އަސަރުކޮށްފައިވާ ކަމަށެވެ.
އޭނާ ވިދާޅުވީ ކުންފުނީގެ އަމާޒަކީ ސޯލްޑިންގެ ހަށިގަނޑު ކިޔެވްއަށް ގެންގޮސް، އާއިލާއާ ހަވާލުކުރެވޭނެ ގޮތް ހެދުން ކަމަށެވެ.
ފްރާންސްގެ ފޮރިން މިނިސްޓްރީން ނެރުނު ބަޔާނެއްގައި ބުނީ "ޔޫކްރެއިންއާ ދެކޮޅަށް ކުރާ ހަނގުރާމައިގައި ރަޝިއާގެ އެއް ޓާގެޓަކީ މައުލޫމާތު ފެތުރުމުގެ މިނިވަންކަން" ކަމަށެވެ.
މިދިޔަ އަހަރުގެ މޭ މަހު ވެސް ޔޫކްރެއިންގައި ފްރާންސްގެ ނޫސްވެރިޔަކު މަރުވި އެވެ. ބީއެފްއެމް ޓީވީގެ ފްރެޑެރިކް ލެކްލާކް އިމްހޯފް މަރުވީ ސިއެވިއެރޮޑޮނެސްކް ގަ އެވެ.
ރިޕޯޓާޒް ވިތައުޓް ބޯޑާޒްއިން ބުނީ ޔޫކްރެއިން ހަނގުރާމަ ރިޕޯޓުކުރަން އުޅުމުގެ ތެރޭގައި މިހާތަނަށް މީޑިއާގެ މަސައްކަތްތެރިންގެ ތެރެއިން މަދުވެގެން 10 މީހުން މަރުވެފައިވެ އެވެ.
