ދިމިޝްކު، ސީރިއާ (މޭ 10) - ސީރިއާގެ ވެރިރަށް ދިމިޝްކު ކައިރީގައި ފުލުހުންގެ މަރުކަޒެއް ހުންނަ ސަރަހައްދެއްގައި ކާރެއް ގޮވައި އެކަކު މަރުވެ އިތުރު ބަޔަކަށް އަނިޔާވެއްޖެ އެވެ.
ސީރިއާގެ ދައުލަތުގެ މީޑިއާ ސަނާއިން ބުނީ މަރުވީ ފުލުހެއް ކަމަށާއި އިތުރު ހަތަރު މީހުންނަށް އަނިޔާވި ކަމަށެވެ. އެ ހާދިސާ ހިނގީ ދިމިޝްކުގެ އުތުރުން ބަރްޒެހް އަވަށުގަ އެވެ.
ސަނާ ނިއުސް އެޖެންސީއިން އާއްމުކުރި ފޮޓޯތަކުގައި ފެންނަނީ އަނދާފައި އޮތް ކާރަކާއި، ތަހުގީގީ ޓީމުން ކައިރީގައި ހަރަކާތްތެރިވާ މަންޒަރެވެ.
ސަރުކާރަށް ތާއީދު ކުރާ ރޭޑިއޯ ސްޓޭޝަނަކުން ފުލުހުންނާ ހަވާލަދީ ބުނީ ގޮވީ ޕްރައިވެޓް އުޅަނދެއް ކަމަށެވެ. އެކަމުގެ ޒިންމާ އުފުލީ އިސްލާމިކް ސްޓޭޓް (އައިއެސް) ގްރޫޕުންނެވެ.
އެހެން ނަމަވެސް، ސީރިއަން އޮބްޒަވޭޓަރީ ފޯ ހިޔުމަން ރައިޓްސްއިން ބުނީ އެއީ ޓާގެޓުކޮށްގެން ދިން ހަމަލާއެއް ކަމަށާއި ޖުމްލަ ހަތް ފުލުހުންނަށް އަނިޔާވި އިރު، ބައެއް މީހުންގެ ހާލު ސީރިއަސް ކަމަށެވެ.
ފުލުހުންގެ މަރުކަޒެއް ކައިރީގައި ކާރެއް ގޮވާފައިވާ އިރު، އަރަބި ގައުމުތަކުން މި ދަނޑިވަޅުގައި މަސައްކަތް ކުރަނީ ސީރިއާގެ ރައީސް ބައްޝާރުލް އަސަދްގެ ސަރުކާރާ އެކު އަލުން ގުޅުން ގާއިމްކުރުމަށެވެ.
ބާރަ އަހަރަށް ފަހު އަލުން އަރަބި ލީގުގެ މެމްބަރުކަން ސީރިއާއަށް ދިނީ މިދިޔަ ހޮނިހިރު ދުވަހު އެވެ. އޭގެ އިތުރުން ސީރިއާ އާއި ސައުދީގެ ފޮރިން މިނިސްޓްރީން ވަނީ ޑިޕްލޮމެޓިކް މިޝަންތައް ހުޅުވަން ނިންމައިފަ އެވެ.
