ލަންޑަން، އިނގިރޭސިވިލާތް (މޭ 6) - އިނގިރޭސި ރަސްކަމާ ދެކޮޅު ގްރޫޕް "ރިޕަބްލިކް" ގެ ގިނަ އަދަދެއްގެ މެމްބަރުން ހައްޔަރު ކުރުމާ ގުޅިގެން ފާޑުކިޔުން އަމާޒުވެއްޖެ އެވެ.
ހޮނިހިރު ދުވަހު ރަސްގެފާނު ޗާލްސް ތަހުތަށް ވެޑުވުމުގެ ހަފުލާއާ ދިމާކޮށް ގިނަ ބަޔަކު މުޒާހަރާ ކުރި އެވެ. އޭގެ ތެރޭގައި "ރިޕަބްލިކް" ގެ މެމްބަރުން ވެސް ހިމެނެ އެވެ.
ލަންޑަންގެ ފުލުހުން ހައްޔަރު ކުރި 52 މީހުންގެ ތެރޭގައި "ރިޕަބްލިކް" ގެ ލީޑަރު ގްރަހަމް ސްމިތު އަދި އެ ހަރަކާތް އިންތިޒާމް ކުރުމުގައި އިސްކޮށް އުޅުނު މީހުން ހިމެނެ އެވެ.
ހިޔުމަން ރައިޓްސް ވޮޗްއިން ކަންބޮޑުވުން ފާޅުކޮށް ނެރުނު ބަޔާނެއްގައި ބުނީ ސުލްހަވެރިކަމާ އެކު ހިޔާލު ފާޅުކުރަމުން ދިޔަ ބަޔަކު ހައްޔަރު ކުރުން ބަލައިނުގަނެވޭނެ ކަމަށެވެ.
މުޒާހަރާ ކުރި މީހުން ހައްޔަރު ކުރި އިރު، މިދިޔަ ހަފުތާގައި އަވަސް އަރުވާލައިގެން ފާސްކުރި ގާނޫނެއްގެ ދަށުން އިނގިރޭސި ފުލުހުންނަށް މުޒާހަރާތައް ކޮންޓްރޯލް ކުރަން އިތުރު ބާރުތައް ލިބިދެ އެވެ.
އިނގިރޭސި ރަސްކަމާ ދެކޮޅަށް އިނގިރޭސިވިލާތުގެ ބައެއް މީހުން އަޑު އުފުލާ އިރު، ކޮމަންވެލްތުގެ ދަށުގައި ހިމެނޭ ބައެއް ގައުމުތަކުން އިނގިރޭސިވިލާތާ ވަކިވާން އުޅޭކަމުގެ އިޝާރާތްތައް ވެސް ވަނީ ކޮށްފަ އެވެ.
ޗާލްސްއަކީ އިނގިރޭސިވިލާތުގެ އިތުރުން ކޮމަންވެލްތުގެ 14 ގައުމެއްގެ އެންމެ އިސް ވެރިޔާ އެވެ. އޭގެ ތެރެއިން ޖެމެއިކާ އާއި ބެލީޒޭއިން މިދިޔަ ހަފުތާގައި ބުނީ ވަކި ޖުމްހޫރިއްޔަތަކަށް ވާން ބޭނުން ކަމަށެވެ.
ރިޕޯޓުތައް ބުނާ ގޮތުން އޮސްޓްރޭލިއާ އާއި ކެނެޑާ ހިމެނޭ ގޮތަށް، އެހެން ގައުމުތަކުގައި ވެސް ވަކި ޖުމްހޫރިއްޔަތަކަށް ބަދަލުވުމުގެ ވިސްނުން ދަނީ ފެތުރެމުންނެވެ.
