ލަންޑަން، އިނގިރޭސިވިލާތް (މޭ 6) - ހަތްދިހަ އަހަރަށް ފަހު އިނގިރޭސިވިލާތުގައި ބޭއްވި ތަހުތަށް ވެޑުވުމުގެ ފުރަތަމަ ހަފުލާގައި ރަސްގެފާނު ޗާލްސްގެ އިސްތަށިފުޅުގައި ރަސްމީކޮށް ތާޖު އަޅުއްވައިފި އެވެ.
މިހާރު ރަސްގެފާނު ޗާލްސްއަކީ އިނގިރޭސިވިލާތާއި ކޮމަންވެލްތުގެ 14 ގައުމެއްގެ އެންމެ މަތީ ވެރިޔާ އެވެ. އުމުރުފުޅުން 74 އަހަރުގެ ޗާލްސްއަކީ ތަހުތާ ހަވާލުވެވަޑައިގެންނެވި އެންމެ އުމުރުން ދުވަސްވީ ވެރިޔާ އެވެ.
އޭގެ އިތުރުން އެމަނިކުފާނުގެ އަނބިކަނބަލުން، އުމުރުފުޅުން 75 އަހަރުގެ ކެމީލާ ވެސް ވަނީ ރަސްމީކޮށް ރާނީގެ ގޮތުގައި ކަނޑައަޅައިފަ އެވެ.
ލަންޑަންގެ ވެސްޓްމިންސްޓާ އަބޭގައި ކުރިއަށް ދިޔަ ތާރީހީ ހަފުލާގައި 2،300 އަށް ވުރެ ގިނަ މެހެމާނުން ބައިވެރިވި އިރު، އޭގެ ތެރޭގައި އެކި ގައުމުތަކުގެ ޝާހީ އާއިލާތަކުގެ މެމްބަރުންނާއި ސިޔާސީ ލީޑަރުން ހިމެނެ އެވެ.
ރަސްމިއްޔާތު ނިމުމާ އެކު މުޅި އިނގިރޭސިވިލާތުގައި އުފާ ފާޅުކުރުމުގެ ގޮތުން ބަޑީގެ ސަލާމް ދިނެވެ.
ޝާހީ އާއިލާގެ މެމްބަރުން ހާއްސަ އިއްޒަތުގައި ބަކިންހަމް ޕެލެސްއަށް ވަޑައިގެންނެވުމަށް ފަހު، ގަނޑުވަރުގެ ބެލްކަނީއިން އާއްމުންނަށް މަރުހަބާ ދެންނެވި އެވެ. މޫސުން ގޯސްކޮށް އޮތް ނަމަވެސް، އެތައް ހާސް ބަޔަކު އެ ސަރަހައްދުގައި ކޭމްޕު ހަދައިގެން ތިބޭތާ ދުވަސްތަކެއް ވެއްޖެ އެވެ.
އެހެން ނަމަވެސް، އިނގިރޭސި ރަސްކަމާ ދެކޮޅަށް ވެސް ގިނަ ބަޔަކު އަޑުއުފުލި އެވެ. އެގޮތަށް އަޑުއުފުލި ބައެއް މީހުން ހައްޔަރުކޮށްފައި ވާތީ، އިންސާނީ ހައްގުތަކަށް މަސައްކަތް ގްރޫޕްތަކުން ވަނީ ކަންބޮޑުވުން ފާޅުކޮށްފަ އެވެ.
