ސައިޓާމާ، ޖަޕާން (މެއި 7) - އޭއެފްސީ ޗެމްޕިއަންސް ލީގުގެ ފައިނަލްގެ ދެ ވަނަ ލެގުގައި އިއްޔެ ސައުދީ އަރަބިއްޔާގެ އަލް ހިލާލް އަތުން 1-0 އިން މޮޅުވެ، ޖަޕާންގެ އުރާވާ ރެޑްސް އިން މުބާރާތުގެ ޗެމްޕިއަންކަން ހޯދައިފި އެވެ.
އުރާވާގެ ދަނޑުގައި ކުޅުނު މެޗުން އެ ޓީމު މޮޅުވީ މެޗުގެ ދެ ވަނަ ހާފުގެ ކުރީކޮޅު އަލް ހިލާލްގެ އަންދްރޭ ކަރީލޯ އަތުން ބައިކޮޅަށް ވަތް ލަނޑަކުންނެވެ.
ސައުދީ އަރަބިއްޔާގައި މިދިޔަ ހަފުތާ ކުޅުނު ފުރަތަމަ ލެގުގެ މެޗު 1-1 އިން އެއްވަރުވުމާ އެކު، އުރާވާ އަށް ތަށި ލިބުނީ 2-1 ގެ އެގްރިގޭޓް ނަތީޖާއަކުން ކުރި ލިބުމުންނެވެ.
މިއީ އޭއެފްސީ ޗެމްޕިއަންސް ލީގުގެ ތަށި އުރާވާ އިން ކާމިޔާބުކުރި ތިން ވަނަ ފަހަރެވެ.
އުރާވާގެ ދަނޑުގައި އެ ޓީމުގެ 50،000 ސަޕޯޓަރުންގެ ކުރިމަތީގައި ކުޅުނު ފައިނަލްގެ ދެ ވަނަ ލެގުގެ ފުރަތަމަ ހާފުގައި އަލް ހިލާލް އިން އެ ޓީމަށް ޕްރެޝަރުކުރި އެވެ. މިދިޔަ އަހަރުގެ ޗެމްޕިއަން އަލް ހިލާލް އިން މަސައްކަތްކުރީ ހަތަރު ސީޒަންގެ ތެރޭގައި ތިން ވަނަ ވަނަ ފަހަރަށް އޭއެފްސީ ޗެމްޕިއަންސް ލީގުގެ ތަށި ހޯދުމަށެވެ.
އެކަމަކު، މެޗުގެ 48 ވަނަ މިނިޓުގައި އުރާވާ ކޮޅަށް މެޗު އެނބުރުނީ އެ ޓީމުގެ މާރިއަސް ހޮއީބްރާޓަން ބޮލުން ފޮނުވާލި ބޯޅައެއް އަލް ހިލާލްގެ ކަރީލޯ އަތުން ބައިކޮޅަށް ވަނުމުންނެވެ.
އޭއެފްސީ ޗެމްޕިއަންސް ލީގުގެ ފައިނަލް މި ކުޅުނީ މުބާރާތް ފެށިތާ އަހަރަކަށް ވުރެ ގިނަ ދުވަސް ފަހުންނެވެ. ފީފާ ވޯލްޑް ކަޕާއި ކޮވިޑްގެ ސަބަބުން ދަތުރުފަތުރުތައް ކުރުމުގައި ހުރި ދަތިތަކާ ގުޅިގެން، މި މުބާރާތް އަހަރަކަށްވުރެ ގިނަ ދުވަހަށް ދިގުދެމިގެން ދިޔައީ އެވެ.
