ޕެރިސް (މެއި 7) - ޕީއެސްޖީ އަށް ކުޅެމުންދާ އާޖެންޓީނާގެ ތަރި ލިއޮނެލް މެސީ ސަސްޕެންޑްކުރުމަށް އެ ކްލަބުން ނިންމިއިރު، އެކަމަކުގައި އެއްވެސް ދައުރެއް ނެތް ކަމަށް ޕީއެސްޖީގެ ކޯޗު ކްރިސްޓޮފް ގަލްޓިއޭ ބުނެފިއެވެ.
ޕީއެސްޖީން މެސީ ސަސްޕެންޑްކުރީ ހޯމަ ދުވަހު އޮތް ކްލަބުގެ ޓްރެއިނިން އަށް ހާޒިރުނުވެ، ކްލަބުގެ ހުއްދަ ނުހޯދައި ސައޫދީ އަރަބިއްޔާ އަށް ކުރި ދަތުރަކާ ގުޅިގެންނެވެ. މެސީ ސައުދީ އަށް ދިޔައީ ސައުދީގެ ޓޫރިޒަމް އެމްބެސަޑަރެއްގެ ގޮތުގައި ކުރަންޖެހޭ ދަތުރެއްގަ އެވެ. މެސީ ވަނީ މި ކަމާ ގުޅިގެން އިއްޔެ މާފަށް ވެސް އެދިފަ އެވެ.
މިކަމާ ގުޅިގެން، ޕީއެސްޖީގެ ކޯޗު ގަލްޓިއޭއާ ހުކުރު ދުވަހު ނޫސްވެރިން ގިނަ ސުވާލުތަކެއް ކުރި ނަމަވެސް، އެ ސުވާލުތަކަށް އޭނާ ޖަވާބުދޭން ބޭނުމެއް ނުވި އެވެ. ގަލްޓިއޭ ބުނީ މެސީ ސަސްޕެންޑްކުރުމަކީ މެނޭޖްމަންޓްގެ ނިންމުމެއް ކަމަށާއި އޭނާގެ އެއްވެސް ދައުރެއް އެ ނިންމުމުގައި ނެތް ކަމަށެވެ.
"މެނޭޖްމަންޓް އިން އަހަންނަށް އެންގީ މެސީ ސަސްޕެންޑްކުރަން ނިންމާފައިވާކަން. އަހަންނަކީ ވެސް ޕީއެސްޖީން މުސާރަ ދޭ މުވައްޒަފަކަށް ވާތީ އެކަމާ ގުޅޭގޮތުން އިތުރު ވާހަކައެއް ދައްކަން އަހަރެން ބޭނުމެއް ނުވޭ،" ގަލްޓިއޭ ބުންޏެވެ.
"މިއީ އަހަރެންގެ ނިންމުމެއް ނޫން. މެނޭޖްމަންޓް އިން ގޮތް ނިންމާފައި އަހަންނަށް އެންގީ،"
މީޑިއާ ރިޕޯޓްތަކުން ބުނާގޮތުގައި ޕީއެސްޖީގެ ފަރިތަކުރުންތަކުގައި ވެސް ބައިވެރިނުވެވޭ ގޮތަށް އެ ކްލަބުން މެސީ ސަސްޕެންޑްކުރީ ދެ ހަފުތާގެ މުއްދަތަކަށެވެ. އެކަމަކު، ސަސްޕެންޝަންގެ މުއްދަތު ކަށަވަރެއް ނުވެ އެވެ.
ފްރާންސް ލީގުގައި އާދިއްތަ ދުވަހު ޓްރޯއިސްއާ ދެކޮޅަށް ކުޅޭ މެޗުގައި މެސީ ނުފެންނާނެ އެވެ. މި މެޗަށް ފަހު ސީޒަންގައި ޕީއެސްޖީ އަށް އޮތީ ހަތަރު މެޗެވެ. ޕީއެސްޖީއާ އެކު މެސީ ހަދާފައިވާ ކޮންޓުރެކްޓް ޖޫން މަހު ހަމަވާނެ އެވެ.
ޕީއެސްޖީ އަށް ދެން މެސީ ކުޅުމުގެ ފުރުސަތު އޮތްތޯ ނޫސްވެރިން ސުވާލުކުރުމުން ގަލްޓިއޭ ބުނީ އޭނާ އަށް އެއްޗެއް ބުނެވޭނީ މެސީ އެނބުރި އައުމުން ކަމަށެވެ.
"މެސީ އެނބުރި އައީމަ އަހަންނަށް އެއްޗެއް ބުނަން އެނގޭނީ. ކްލަބާއެކު ވެސް މި ކަމާ ވާހަކަދައްކަންޖެހޭ. އެކަމަކު އެންމެ މުހިންމީ މެސީ. އޭނައާ ވެސް މި ކަމުގައި ވާހަކަ ދައްކަންޖެހޭ،" ގަލްޓިއޭ ބުންޏެވެ.
މެސީގެ ސޮއި ހޯދަން ބާސެލޯނާ އާއި ސައުދީ އަރަބިއްޔާ އަދި އިޓަލީގެ ކްލަބްތަކުން މަސައްކަތް ކުރެ އެވެ.
