ކުރީގެ ރައީސް މައުމޫން އަބްދުލްގައްޔޫމު އިސްވެ ހިންގަވާ ޕާޓީ، އެމްއާރުއެމްގެ އިސް 11 ބޭފުޅަކު ޕާޓީން ވަކިވާން ހުށަހަޅައިފި އެވެ.
މި ބޭފުޅުން އެމްއާރުއެމް ދޫކޮށްލަން ނިންމީ ކުރިއަށް އޮތް ރިޔާސީ އިންތިހާބުގައި މިހާރު ވެރިކަމުގައި ހުންނެވި ރައީސް އިބްރާހިމް މުހައްމަދު ސޯލިހަށް ދެވަނަ ދައުރެއް ހޯދައިދިނުމަށް މަސައްކަތް ކުރުމަށް ކަމަށްވެސް ވަނީ މައުލޫމާތު ލިބިފަ އެވެ.
"އަދަދު" އަށް ކަށަވަރުވެފައިވާ ގޮތުގައި މި ބޭފުޅުންގެ ތެރޭގައި ހެރިޓޭޖް މިނިސްޓަރު އަދި މައުމޫނުގެ ދަރިކަނބަލުން ޔުމްނާ މައުމޫންގެ ފިރިކަލުން މުހައްމަދު ނަދީމު ވެސް ހިމެނެ އެވެ.
ނަދީމުގެ އިތުރުން އެމްއާރުއެމް ދޫކޮށްލަން ނިންމި ބޭފުޅުންގެ ތެރޭގައި، މޯލްޑިވް ގޭސްގެ މެނޭޖިން ޑިރެކްޓަރު ޝަޒައިލް ޝިިޔާމް، އެމްއައިޓީޑީސީގެ މެނޭޖިން ޑިރެކްޓަރު މުހައްމަދު ރާއިދު، އެމްޓީޑީސީގެ މެނޭޖިން ޑިރެކްޓަރ ތަޒްމީލް އަބްދުއްސަމަދު، ޔޫއޭއީގައި ހުންނަވާ ރާއްޖޭގެ ޑެޕިއުޓީ އެމްބެސަޑަރު މުހައްމަދު ފައިސަލްގެ އިތުރުން ޓޫރިޒަމް މިނިސްޓްރީގެ ސީނިއަ ޕޮލިސީ ޑިރެކްޓަރު ފަރުހާދު އިބްރާހިމް ވެސް ހިމެނެ އެވެ.
މައުލޫމާތު ލިބިފައިވާ ގޮތުގައި މި ބޭފުޅުން ހިމެނޭހެން ސަރުކާރުގެ މަގާމުތަކުގައި ތިބި އެމްއާރުއެމްގެ އިސް ބައެއް ބޭފުޅުން ރޭ ވަނީ މައުމޫނާ ބައްދަލުކޮށްފަ އެވެ.
ކުރިއަށް އޮތް ރިޔާސީ އިންތިހާބުގައި ރައީސް ސޯލިހާއެކު ކުރިއަށް ދިއުމާ މެދު އެމްއާރުއެމުން އަދި ވަކި ގޮތެއް ނުނިންމަ އެވެ. ނަމަވެސް, އެ ޕާޓީއިން ވަނީ ރިޔާސީ އިންތިހާބުގައި ވާދަކުރައްވާނެކަން އިއުލާންކުރައްވާފައިވާ ޖޭޕީގެ ލީޑަރު ގާސިމް އިބްރާހިމާ އެކު މަޝްވަރާތަކެއްވެސް ކުރިއަށް ގެންގޮސްފަ އެވެ.
އަދި، ޗާގޮސް މައްސަލާގައި ސަރުކާރާ ދެކޮޅު ޕާޓީތަކާއި ކުރީގެ ބަންޑާރަ ނައިބުން އަދި މިނިސްޓަރުން އެއްވެ އިއްޔެ ބޭއްޕި ޕްރެސް ކޮންފަރެންސްގައިވެސް އެމްއާރުއެމުން ވަނީ ބައިވެރިވެފަ އެވެ. އެ ޕާޓީގެ ފަރާތުން އިއްޔެގެ ޕްރެސްގައި ބައިވެރިވެވަޑައިގަތީ ނައިބު ރައީސް އައިމިނަތު ނާދިރާ އެވެ.
