ލަންޑަން (މެއި 3) - އިނގިރޭސި ޕްރިމިއާ ލީގުގައި ރޭ ޗެލްސީ 3-1 އިން ބަލިކޮށް، އާސެނަލް އިން އަލުން ލީގުގެ އެއް ވަނަ އަށް ޖެހިލައިފި އެވެ.
ދެ ވަނައިގައި އޮތް މެންޗެސްޓާ ސިޓީ އަށް ވުރެ ދެ މެޗު އިތުރަށް ކުޅެގެން އާސެނަލް އެއް ވަަނަ އަށް އެރީ 34 މެޗުން 78 ޕޮއިންޓް ހޯދައިގެންނެވެ. ސިޓީ އަށް 32 މެޗުން ލިބިފައިވަނީ 76 ޕޮއިންޓެވެ. ލީގުގައި މިރޭ ވެސްޓް ހޭމް އަތުން މޮޅުވެގެން، ސިޓީ އަށް އަލުން އެއް ވަނަ އަށް އެރޭނެ އެވެ.
އާސެނަލްގެ އެމިރޭޓްސް ސްޓޭޑިއަމްގައި ކުޅުނު މެޗުގައި އާސެނަލް އިން ވަނީ 34 މިނިޓް ތެރޭ ތިން ގޯލު ޖަހައިފަ އެވެ. އާސެނަލަށް ފުރަަތަަމަ ދެ ގޯލު ޖަހައިިދިނީ ޓީމުގެ ކެޕްޓަން މާޓިން އޮޑެގާޑް އެވެ. ދެ ގޯލަކީ ވެސް ދާދި އެއް ކަހަލަ ގޮތަކަށް ޖެހި ލަނޑުުތަކެކެވެ. އޭރިއާ ރޮނގުކައިރިން ލިބުނު ފުރުސަތުތައް އޮޑެގާޑް ވަނީ ވާތު ފައިން ހަމަޖެހިލައިފައި ގޯލުގެ ތެރެއަށް ފޮނުވާލައިފަ އެވެ. މި ގޯލުތަކާ އެކު، އޮޑެގާޑް މި ފަހަރު ލީގުގައި ޖެހި ގޯލުގެ އަދަދު ވަނީ 14 އަށް އަރައިފަ އެވެ.
މެޗުގައި އާސެނަލްގެ ތިން ވަނަ ލަނޑު ޖެހީ 34 ވަަނަ މިނިޓްގައި ގަބްރިއެލް ޖީސޫސް އެވެ. މިއީ ޗެލްސީގެ އޭރިއާތެރެއިން އެ ޓީމުގެ ޑިފެންޑަރުންނަށް ސަލާމަތް ނުކުރެވިދިޔަ ބޯޅައެއް ހޯދައި، ޖީސޫސް ޖެހި ގޯލެކެެވެ.
ފުރަތަމަ ހާފުގައި ޗެލްސީގެ ބެން ޗިލްވެލް އަށް ގޯލު ޖަހަން ހުސްކޮށް ލިބުނު ފުރުސަތު ބޭނުން ނުކުރެވިދިޔައިރު، ދެ ވަނަ ހާފުގައި އެ ޓީމުން ލަނޑެއް ޖެހި އެވެ. މި ގޯލު ޖެހީ ނޯނީ މަޑުއޭކޭ އެވެ. މަޓެއޯ ކޮވަސިޗް ދިން ބޯޅައަށް އަރަައި، މަޑުއޭކޭ ވަނީ ގޯލުގެ ކަނަށް ބޯޅަ ފޮނުވާލައިފަ އެވެ. މިއީ ޖެނުއަރީ މަހު، ފެޔަނޫޑް ދޫކޮށް ޗެލްސީ އަށް ބަދަލުވި މަޑުއޭކޭ އެ ޓީމަށް ޖަހައިދިން ފުރަތަމަ ގޯލެވެ.
އިތުރު ގޯލެއް ނުޖެހި، ޗެލްސީ މި މެޗުން ބަލިވިއިރު، އެ ޓީމުގެ ކޯޗުކަމާ ފްރޭންކް ލަމްޕާޑް ހަވާލުވި ފަހުން ކުޅުނު ހަ މެޗުން ވެސް ވަނީ ބަލިވެފަ އެވެ. ޗެލްސީ ލީގުގެ 12 ވަނައިގައި އޮތީ 33 މެޗުން 39 ޕޮއިންޓާ އެކު އެވެ. ޗެލްސީ މެޗަކުން މޮޅެއް ނުލިބި މިހާރު މި ވަނީ ނުވަ މެޗު ނިންމާލަން ޖެހިފަ އެވެ.
ރޭގެ މެޗަށް ފަހު ލަމްޕާޑް ބުނީ މިއީ ވަރަށް އުނދަގޫ ދަނޑިވަޅެއް ކަމަށާއި ރަނގަޅަށް ކަންކަން ކުރަން ބެލިޔަސް ގިނަ ކަންކަން ދަނީ ގޯސްކޮށް ކަމަށެވެ. އާސެނަލްގެ ކޯޗު އާޓެޓާ ބުނީ މެޗުގެ 60 މިނިޓަށް ބަލާއިރު ވަރަށް މޮޅަށް އެ ޓީމު ކުޅުނު ކަމަށާއި އެކަމަކު، ފަހުން ދިޔައީ ބޭނުންވި ގޮތަށް ނޫން ކަމަށެވެ. އެހެން ނަމަވެސް މެޗުން މޮޅުވެ، އަލުން ލީގު ތާވަލުގެ ކުރިއަށް ދެވުމަކީ ހިތްހަމަޖެހުމެއް ކަމަށް އާޓެޓާ ވަނީ ބުނެފަ އެވެ.
