ޕެރިސް (މެއި 3) - އާޖެންޓީނާގެ ތަރި ލިއޮނަލް މެސީ، އޭނާ ކުޅެމުން އަންނަ ކްލަބް، ފްރާންސްގެ ޕީއެސްޖީގެ ހުއްދަ ނުހޯދައި ސައުދީ އަރަބިއްޔާ އަށް ގޮސްފައިވާތީ އޭނާ ދެ ހަފްތާ އަށް ސަސްޕެންޑްކުރަން ޕީއެސްޖީން ނިންމައިފި އެވެ.
އަންނަ މަހު 36 އަހަރު ފުރޭ މެސީ ވަނީ އާދިއްތަ ދުވަހުގެރޭ ޕީއެސްޖީން ފްރެންޗް ލީގުގައި ލޮރިއެންޓް އަތުން ބަލިވި މެޗުގައި 90 މިނިޓް ކުޅެފަ އެވެ. އެ މެޗަށް ފަހު މެސީ ވަނީ ސައުދީ އަރަބިއްޔާ އަށް އަމިއްލަ ދަތުރެއްގައި ގޮސްފަ އެވެ. ފްރާންސްގެ ބައެއް ނޫސްތަކުން ރިޕޯޓްކުރާ ގޮތުގައި މި ދަތުރު ދާން މެސީ ވަނީ ޕީއެސްޖީގައި އެދިފަ އެވެ. އެކަމަކު، ސަބަބެއް ހާމަކުރުމެއް ނެތި، މެސީގެ އެ އެދުމަށް އިޖާބަނުދޭން ޕީއެސްޖީން ނިންމީ އެވެ.
މިއީ، ޕީއެސްޖީގެ އޮފިޝަލުންގެ ހުއްދަ ނެގުމެއް ނެތި ކުރި ދަތުރެއް ކަމަށްވާތީ، ޕީއެސްޖީން މި މައްސަލަ ބަލައި، ޑިސިޕްލިނަރީ ފިޔަވަޅެއްގެ ގޮތުގައި ނިންމީ މެސީ ދެ ހަފްތާ އަށް ސަސްޕެންޑް ކުރާށެވެ.
ސަސްޕެންޝަނުގެ މުއްދަތުގައި މެސީ ޓްރެއިނިންތައް ގެންދާނީ ޓީމާ ވަކި އަމިއްލަ އަށެވެ.
ރިޕޯޓްތައް ބުނާގޮތުގައި މެސީ، ސައުދީ އަރަބިއްޔާ އަށް ކުރި ދަތުރަކީ އިސްތިހާރެއް ކުޅުމަށް ކުރަން ޖެހުނު ދަތުރެކެވެ. މެސީ އަކީ ސައުދީ އަރަބިއްޔާގެ ޓުއަރިޒަމް ޕްރޮމޯޓްކުރުމުގެ ކޮންޓްރެކްޓެއްގައި ހުރި އެމްބަސަޑަރެކެވެ.
ޕީއެސްޖީން މެސީ އަށް މި އެޅި ފިޔަވަޅުގެ ސަބަބުން އޭނާ އެ ކްލަބާ އެކު ކޮންޓްރެކްޓް އާ ނުކުރާނެކަން ޔަގީންވެފައިވާ ކަމަށް ފްރާންސްގެ މީޑިއާތަކުން ރިޕޯޓްކުރެ އެވެ. ބާސެލޯނާ ދޫކޮށް ޕީއެސްޖީ އަށް ބަދަލުވެ، ދެ އަހަރުގެ ކޮންޓްރެކްޓެއްގައި މެސީ ސޮއިކުރިއިރު، އެ އެއްބަސްވުން މި ސީޒަނުގެ ނިޔަލަށް ހަމަވާނެ އެވެ.
ބާސެލޯނާ އިން އަންނަނީ އަލުން މެސީ ގެނެވޭނެ ގޮތެއް އޮތްތޯ ބަލައި، އެ އަށް މަސައްކަތް ކުރަމުންނެވެ. ބާސެލޯނާގެ މާލީ ހާލަތު ގޯސްވެގެން އެ ޓީމަށް ކޮންޓްރެކްޓް އާ ނުކުރެވިގެން މެސީ ދޫކޮށްލީ 2021 ވަނަ އަހަރު އެވެ. ޕީއެސްޖީ އަށް ކުޅެދިން 69 މެޗުން މެސީ ވަނީ އެ ޓީމަށް 31 ގޯލު ޖަހައިފަ އެވެ.
