ކުރިއަށް އޮތް ރިޔާސީ އިންތިހާބުގައި މޯލްޑިވްސް ރިފޯމް މޫވްމަންޓު (އެމްއާރުއެމް) އިން ކޯލިޝަނެއްގައި ބައިވެރިވުމަށް ހުށަހަޅާ އެއް ޝަރުތަކީ ރިޔާސީ ނިޒާމުގެ ވެރިކަން ދެމެހެއްޓުމުގެ ޔަގީންކަން ދިނުން ކަން އެ ޕާޓީން ހާމަކޮށްފި އެވެ.
ސެޕްޓެމްބަރު މަހުގެ ނުވަވަނަ ދުވަހު އޮންނަ ރިޔާސީ އިންތިހާބުގައި ކޯލިޝަން ހެދުމަށް އެމްއާރުއެމަށް ދައުވަތު ފޮނުވާފައިވަނީ އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ސޯލިހުގެ އިތުރުން ޖުމްހޫރީ ޕާޓީގެ ރިޔާސީ ކެންޑިޑޭޓް ގާސިމް އިބްރާހިމެވެ.
ކުރީގެ ރައީސް މައުމޫން އަބްދުލްގައްޔޫމް އިސްވެ ހުންނަވައި އުފައްދަވާފައިވާ އެމްއާރުއެމްގެ މައިގަނޑު ހުށަހެޅުންތައް ހާމަކުރީ، އެމްޑީޕީއާއެކު ކޯލިޝަން ހެދުމަށް އެ ޕާޓީން ބޭއްވި ބައްދަލުވުމަށް ފަހުގަ އެވެ.
އެމްއާރުއެމްގެ ހުށަހެޅުންތައް؛
- ރާއްޖޭގެ ވެރިކަން ކުރާ ނިޒާމަކީ ރިޔާސީ ނިޒާމުގެ ގޮތުގައި ދަމަހައްޓާނެ ކަމުގެ ޔަގީންކަން
- ގައުމަށް ދިމާވެފައި ހުރި ބޮޑެތި ގޮންޖެހުންތައް ރިފޯމް ކުރާނެ ގޮތްތަކެއް ހޯދުން
- ކޯލިޝަން އެއްބަސްވުމަށް އަމަލުކުރާނެ ކަމުގެ ޔަގީންކަން ރައްޔިތުންނަށް ދިނުން
- މިނިވަންކަމާއި ސިޔާދަތާއި އަދި އިސްތިޤުލާލަށް އެއްވެސް އުނިކަމެއް ނާންނާނެކަން ކަށަވަރުކޮށްދިނުން
މި ސިޔާސަތުތަކާ ގުޅޭ ގޮތުން އިތުރަށް ތަފްސީލްކޮށް މަޝްވަރާކުރުމަށް އެމްޑީޕީއާއެކު އިތުރަށް ބައްދަލުކުރުމަށް ވެސް ރޭގެ ބައްދަލުވުމުގައި ނިންމާފައިވާ ކަމަށް އެމްއާރުއެމުން ބުންޏެވެ.
މީގެ އިތުރުން ޖުމްހޫރީ ޕާޓީއާއެކު މަޝްވަރާ ކުރުމަށް ވެސް އެމްއާރުއެމުން ނިންމާފައިވެ އެވެ.
ރައީސް ސޯލިހާއެކު ކޯލިޝަން ހެދުމަށް މިހާތަނަށް އެއްބަސްވެ މަސައްކަތް ފަށާފައިވަނީ މިހާރު އޮތް ސަރުކާރު ކޯލިޝަންގައި ހިމެނޭ އަދާލަތު ޕާޓީގެ އިތުރުން އެމްޑީއޭއާ އެވެ. އެމްއާރުއެމަކީ ވެސް މިހާރު އޮތް ސަރުކާރު ކޯލިޝަންގެ ބައިވެރިއެއް ނަމަވެސް ކުރިއަށް އޮތް އިންތިހާބާ މެދު އަދި ގޮތެއް ނުނިންމަ އެވެ.
ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީން ރިޔާސީ އިންތިހާބުގައި ވާދަކުރުމަށް ނިންމާފައިވާއިރު، އެމްޑީޕީގެ އެތެރޭގައި އުފެދިފައިވާ "ފިކުރެއްގެ ދިރުން" ފެކްޝަނުން ވަނީ ޖޭޕީގެ ރިޔާސީ ކެންޑިޑޭޓް ގާސިމަށް ތާއީދުކުރުމަށް ނިންމައިފަ އެވެ.
