ލަންޑަން (މެއި 2) - އަންނަ ސީޒަންގެ ޗެމްޕިއަންސް ލީގުގެ ޖާގައެއް ޗެލްސީ އަށް ލިބޭނެކަމުގެ ފުރުސަތު ގެއްލި ޓީމުގެ ނަތީޖާތައް ގޯސްވުމުގެ ސަބަބުން ކުޅުންތެރިންގެ މުސާރަތައް ކުޑަކުރަން އެ ކުލަބުން ނިންމައިފި އެވެ.
އިނގިރޭސި ގަދަ ބާރު ޗެލްސީ އަށް އުނދަގޫ ހާލަތެއް ދިމާވެފައިވާ މި ދަނޑިވަޅަކީ އެ ކުލަބާ އެމެރިކާގެ މަހުޖަނު، ޓޮޑް ބޯލީ ހަވާލުވެ، ކުލަބު ހިންގުމަށް ބަދަލުތަކެއް ގެންނަން މަސައްކަތްކުރާ ދަނޑިވަޅެކެވެ. ބޯލީ، އިނގިރޭސި ކުލަބް، ޗެލްސީ 2022 ވަނަ އަހަރުގެ މެއި މަހު ގަތުމަށް ފަހު ބޮޑު ހޭދައެއް ވަނީ ކުލަބަށް ކޮށްފަ އެވެ.
އެ ގޮތުން، 5.25 މިލިއަން ޑޮލަރަށް ޗެލްސީ ގަތް، ބޯލީ، ވަނީ އެ ޓީމު ގަތުމަށް ފަހު ދުނިޔޭގެ އެންމެ ވަރުގަދަ ޓީމަށް ޗެލްސީ ހަދާނެ ކަމަށް އިއުލާނުކޮށްފަ އެވެ. އޭގެ ފަހުން، އޭނާ ވަނީ ޓްރާންސްފާ މާކެޓުގައިވެސް ބޮޑު ހޭދައެއް ކޮށްފަ އެވެ. އެ ގޮތުން ކުޅުންތެރިން ގަތުމަށް މިދިޔަ ޖެނުއަރީ ޓްރާންސްފާގައި އެކަނިވެސް އަށް ކުޅުންތެރިއަކު ގަތުމަށް އެކުލަބުން 400 މިލިއަން ޑޮލަރު ހޭދަކުރި އެވެ. އަދި ބޯލީގެ ދައުރުގައި ޗެލްސީން ކުރި ހަރަދު މިހާރު ވެސް 600 މިލިއަން ޑޮލަރަށް ވުރެ އިތުރެވެ.
އޭނާ ޗެލްސީ ގަތްއިރު ހުރި ކޯޗު ތޯމަސް ޓުޗެލް މަގާމުން ވަކިކޮށް ގްރަހަމް ޕޮޓާއާ ކޯޗުކަން ހަވާލުކުރި އެވެ. ޕޮޓާ އަށް ވެސް ރަނގަޅު ނަތީޖާތަކެއް ނުނެރެވުމުން އޭނާވެސް މަގާމުން ވަކިކުރި އެވެ. މި ވަގުތު ކުލަބުގެ ކޯޗުކަމުގެ މަގާމާ ވަގުތީގޮތުން ހަވާލުވެ ހުރީ ޗެލްސީގެ ކުރީގެ ތަރި ފްރެންކް ލަމްޕާޑު އެވެ. ނަމަވެސް ލަމްޕާޑުގެ ކޯޗުކަމުގެ ދަށުން ވެސް ޗެލްސީއިން ނެރެމުން އަންނަނީ ދަށް ނަތީޖާތަކެކެވެ. ލަމްޕާޑު މިހާތަނަށް އިރުޝާދުދިން ހުރިހާ މެޗެއްގައި ޗެލްސީ ވަނީ ބަލިވެފަ އެވެ. އެއީ ފަސް މެޗެވެ.
އަންނަ އަހަރުގެ ޗެމްޕިއަންސް ލީގުން ޖާގަ ގެއްލި ޔޫރޮޕާ ލީގުގެ ފުރުސަތު ވެސް ޗެލްސީ އަށް ހަނިވުމާ އެކު މިހާރު ކުލަބު ކުލަބުން އަންނަނީ އަނެއްކާ ވެސް ބަދަލުތަކަކަށް މިސްރާބު ޖަހައިފަ އެވެ. އެ ގޮތުން މި ވަގުތު އެންމެ ބޮޑު އިސްކަމެއްދެނީ މުސާރަތައް ކުޑަކުރުމަށެވެ.
އިނގިރޭސި މީޑިއާ ރިޕޯޓްތައް ބުނާ ގޮތުން ޗެލްސީއާ އެކު އެންމެ ފަހުން ކޮންޓްރެކްޓްތައް އާކުރި ކުޅުންތެރިންތެރިންގެ މުސާރަ ކުޑަކުރާނެ އެވެ. އަދި ކުލަބުން މި ސީޒަނަށް ދޭން ނިންމާފައި ހުރި ބޯނަސްތައް ވެސް ނުދޭން ވަނީ ނިންމައިފަ އެވެ.
ކުޅުންތެރިންގެ މުސާރަތައް ކުޑަކުރަން ނިންމާފައި މި ދަނޑިވަޅުގައި ދެން އެންމެ ބޮޑަށް ފެތުރޭ އަޑަކީ ގިނަ ކުޅުންތެރިންތަކެއް ކުލަބު ދޫކޮށްލަން ތައްޔާރުވެގެން ތިބުމެވެ. އެ ގޮތުން ޓީމުގެ ސީނިއާ ގިނަ ކުޅުންތެރިން މިހާރުގެ މެނޭޖުމަންޓާ އެހާ ގަޔާ ނުވާތީ ބޭނުންވަނީ އެހެން ކުލަބަކަށް ބަދަލުވާށެވެ.
ޗެލްސީގެ ސަޕޯޓަރުންގެ މެދުގައި އެންމެ މަގުބޫލު ކުޅުންތެރިޔާ މެސަން މައުންޓް އަކީ މި ސީޒަނަށް ފަހު ޗެލްސީ ދޫކޮށްލުން އެންމެ ގާތް ކުޅުންތެރިޔާ އެވެ. މީގެ އިތުރުން މި ސީޒަންގައި އެކުލަބުން ގެނައި ބައެއް ކުޅުންތެރިންވެސް ތިބީ ކުލަބުގެ ނިންމުންތަކާ މެދު ހިތްހަމަނުޖެހިފައި ކަމަށް މީޑިއާ ރިޕޯޓްތައް ބުނެ އެވެ.
ޗެލްސީ އަށް ދިމާވެފައިވާ މައްސަލަތައް ހައްލުކުރުމަށް އެޓީމުން އާ ކޯޗެއް ގެނައުމުގެ މަސައްކަތް އަންނަނީ ކުރަމުންނެވެ. އެ ގޮތުން އެޓީމާ ހަވާލުވުން އެންމެ ގާތީ ޓޮޓެންހަމް ހޮޓްސްޕާސް އާއި ޕީއެސްޖީގެ ކުރީގެ ކޯޗު މައުރީސީއޯ ޕޮޗެޓީނޯ އެވެ.
