ލިވަޕޫލް (މެއި 1) - އިނގިރޭސި ޕްރިމިއާ ލީގުގައި ރޭ ފަހަތުން އަރައި ތިން ގޯލު ޖަހައިގެން ޓޮޓެންހަމް ހޮޓްސްޕާސް އިން އެއްވަރުކޮށްފައި ވަނިކޮށް، ޑިއޯގޯ ޖޮޓާ ޖެހި ގޯލުން ލިވަޕޫލުން 4-3 އިން ޓޮޓެންހަމްގެ މައްޗަށް ކުރިހޯދައިފި އެވެ.
މި ނަތީޖާއާ އެކު ލިވަޕޫލަށް ވަނީ ލީގުގެ ފަސް ވަނައިގައި އޮތީ 33 މެޗުން 56 ޕޮއިންޓް ހޯދައިގެންނެވެ. ހަ ވަނައިގައި އޮތް ޓޮޓެންހަމް އަށް ވަނީ 34 މެޗުން 54 ޕޮއިންޓް ލިބިފަ އެވެ.
ލިވަޕޫލްގެ އެންފީލްޑް ސްޓޭޑިއަމްގައި ރޭ އެ ޓީމުން ވަނީ 15 މިނިޓް ތެރޭ ތިން ގޯލު ޖަހައިފަ އެވެ. އެ ގޮތުން، ތިން ވަނަ މިނިޓްގައި ކާޓިސް ޖޯންސް ލިވަޕޫލަށް ލީޑުނަގައިދިންއިރު، އޭގެ ދެ މިނިޓް ފަހުން، ލުއިޒް ޑިއާޒް ވަނީ ލިވަޕޫލްގެ ލީޑުފުޅާކޮށްދީފަ އެވެ. އަދި މެޗުގެ 15 ވަނަ މިނިޓްގައި ލިވަޕޫލްގެ ކޯޑީ ގަކްޕޯ އަށް ކުރި ފައުލަކަށް ދިން ޕެނަލްޓީ ވައްދާލައި، މުހައްމަދު ސަލާހު ވަނީ ލިވަޕޫލަށް ތިން ގޯލުގެ ލީޑެއް ނަގައިދީފަ އެވެ.
ފުރަތަމަ ހާފުގައި ޓޮޓެންހަމްގެ ފޯވާޑް، ހެރީ ކޭން ވަނީ މެޗުގެ 39 ވަނަ މިނިޓްގައި އެ ޓީމަށް ގޯލެއް ޖަހައިދީ އުންމީދެއް ހޯދައިދީފަ އެވެ. މި ގޯލާ އެކު ކޭން ވަނީ ޕްރިމިއާ ލީގުގެ ތާރީހުގައި ދެ ވަނަ އަށް އެންމެ ގިނަ ގޯލު ޖަހައިގެން މެންޗެސްޓާ ޔުނައިޓެޑްގެ ކުރީގެ ފޯވާޑް، ވޭން ރޫނީގެ ރެކޯޑާ ހަމަކޮށްފަ އެވެ. ކޭން އާއި ރޫނީ ވަނީ ޕްރިމިއާ ލީގުގައި 208 ގޯލު ޖަހައިފަ އެވެ.
މެޗުގެ 77 ވަނަ މިނިޓްގައި ޓޮޓެންހަމްގެ ސޮން ހެއުން މިން އެ ޓީމަށް ދެ ވަނަ ގޯލެއް ޖަހައިދިންއިރު، އޭގެ ކުރިން މި ހާފުގައި އޭނާ ޖެހި ޝޮޓެއް ވަނީ ގޯލުގެ ދަނޑިއަށް ވެސް އަމާޒުވެފަ އެވެ.
ޓޮޓެންހަމަށް އެއްވަރުކޮށްދިން ގޯލު ޖެހީ ބަދަލަކަށް ކުޅެން އެރި ރިޗާލިސަން އެވެ. ސޮން ނެގި ހިލޭ ޖެހުމަކުން ރިޗާލިސަން މި ގޯލު ޖެހީ އިތުރު ވަގުތުގެ ގޮތުގައި ދެއްކި ހަ މިނިޓްގެ ތެރެއިން ތިން ވަނަ މިނިޓްގަ އެވެ. މިއީ ޕްރިމިއާ ލީގުގައި ރިޗާލިސަންގެ ފުރަތަމަ ގޯލެވެ. މި ލަނޑު ޖަހައި ޓޮޓެންހަމް އަށް ހަމަޖެހިނުލެވެނިސް، އެ ޓީމުގެ ފަހަތުން ހެދި ގޯހެއްގެ ފައިދާނަގައި، ޖޮޓާ ވަނީ ލިވަޕޫލް މޮޅުކޮށްދިން ގޯލު ޖަހައިފަ އެވެ.
