ރިޔާދް (އޭޕްރީލް 30) - އޭއެފްސީ ޗެމްޕިއަންސް ލީގުގެ ފައިނަލްގެ ފުރަތަމަ ލެގުގައި ރޭ ސައުދީ އަރަބިއްޔާގެ އަލް ހިލާލް އާއި ޖަޕާނުގެ އުރާވާ ރެޑްސް ބައްދަލުކުރި މެޗު 1-1 އިން އެއްވަރުވެއްޖެ އެވެ.
ސައުދީ އަރަބިއްޔާގައި ކުޅުނު ފުރަތަމަ ލެގުގެ 13 ވަނަ މިނިޓުގައި މުބާރާތުގެ އެންމެ ފަހުގެ ޗެމްޕިއަން އަލް ހިލާލް އިން ލީޑު ނެގީ ސައުދީ ގައުމީ ޓީމުގެ ފޯވަޑް ސާލެމް އަލް ދައުސާރީ ޖެހި ލަނޑުންނެވެ.
އަލް ހިލާލްގެ އެންމެ މުހިންމު އެއް ކުޅުންތެރިޔާ ކަމަށްވާ އަލް ދައުސާރީ އަކީ ބޮޑެތި މެޗުތަކުގައި ވެސް މީގެ ކުރިން ވެސް ގޯލު ޖަހާފައިވާ ކުޅުންތެރިއެކެވެ. އެގޮތުން، މިދިޔަ ސީޒަންގެ ޗެމްޕިއަންސް ލީގުގެ ސެމީ ފައިނަލާއި ފައިނަލާއި ފީފާ ކްލަބް ވޯލްޑް ކަޕްގެ ސެމީ ފައިނަލްގެ އިތުރުން މިދިޔަ އަހަރުގެ ވޯލްޑް ކަޕްގައި އާޖެންޓީނާ އަތުން ސައުދީ މޮޅުވި މެޗު ވެސް ހިމެނެ އެވެ.
އެކަމަކު، މި އަހަރުގެ ޗެމްޕިއަންސް ލީގުގެ ފައިނަލްގައި އަލް ދައުސާރީ އަށް ކުރިމަތިވިީ ހިތި ނިމުމެކެވެ. މެޗުގެ 86 ވަނަ މިނިޓުގައި އުރާވާގެެ ކުޅުންތެރިއަކަށް ގަސްދުގައި ހަމަލާ ދިނުމާ ގުޅިގެން ރެފްރީ ވަނީ އަލް ދައުސާރީ އާށް ސީދާ ރަތްކާޑެއް ދައްކައިފަ އެެވެ.
ޗެމްޕިއަންސް ލީގު 2017 ވަނަ އަހަރު ކާމިޔާބުކުރި އުރަވާ އިން މެޗުގެ ނަތީޖާ ހަމަހަމަކުރީ 53 ވަނަ މިނިޓުގައި ސިންޒޯ ކޮރޯކީ ޖެހި ލަނޑުންނެވެ.
ޖަޕާނުގައި ހޮނިހިރު ދުވަހު ފައިނަލްގެ ދެ ވަނަ ލެގު ކުޅޭއިރު، ފުރަތަމަ ލެގުގެ ނަތީޖާއާ މެދު އެންމެ ހިތްހަމަޖެހޭނީ އުރާވާ އެވެ. ފުރަތަމަ ލެގުގައި އެ ޓީމަށް މާ ގިނަ ފުރުސަތުތަކެއް ނުލިބުނު ނަމަވެސް، ލިބުނު ފުރުސަތުތަކުގެ ބޭނުން އެ ޓީމުން ހިފި އެވެ.
މިއީ ޗެމްޕިއަންސް ލީގުގެ ފައިނަލެއްގައި އަލް ހިލާލް އާއި އުރާވާ ބައްދަލުކުރާ ތިން ވަނަ ފަހަރެވެ. މީގެ ކުރިން ކޮންމެ ޓީމެއް ވެސް ވަނީ އެއް ފައިނަލް ކާމިޔާބުކޮށްފަ އެވެ.
މިއީ ނުވަ އަހަރުގެ ތެރޭގައި އޭއެފްސީ ޗެމްޕިއަންސް ލީގުގެ ފައިނަލެއްގައި އަލް ހިލާލް ކުޅޭ ފަސް ވަނަ ފަހަރެވެ. އަލް ހިލާލްގެ އަމާޒަކީ ޗެމްޕިއަންސް ލީގުގެ ތަށި ޖެހިޖެހިގެން ހޯދާ ދެ ވަނަ ކްލަބަށް ވުމަށެވެ.
