ދުބާއީ، ޔޫއޭއީ (އެޕްރީލް 28) - އެމެރިކާއަށް ދަތުރު ކުރަމުން ދަނިކޮށް އިރާނުން ހުއްޓުވި ތެޔޮ ޓޭންކަރުގައި ތިބީ އިންޑިއާގެ 24 މީހުން ކަމަށް ރިޕޯޓުތައް ބުނެފި އެވެ.
އިރާނުގެ ދައުލަތުގެ ޓީވީން އާއްމުކުރި މަންޒަރުތަކުން ފެންނަނީ ނޭވީ ސިފައިން ހެލިކޮޕްޓަރުގައި ގޮސް "އެޑްވާންޓޭޖް ސްވީޓް" ޓޭންކަރަށް ފައިބާ ތަނެވެ.
އިރާނުން ބުނީ ބުރާސްފަތި ދުވަހު އެ ޓޭންކަރު ހިފެހެއްޓީ އޮމާންގެ އައްސޭރިފަށާ ދިމާލުން އިރާނުގެ އުޅަނދެއްގައި ޖެހި އެކްސިޑެންޓުވުމުން މަޑުނުކޮށް ދާން އުޅެނިކޮށް ކަމަށެވެ.
އެ ޓޭންކަރު އޮޕަރޭޓް ކުރާ "އެޑްވާންޓޭޖް ޓޭންކާޒް" އިން އޭއެފްޕީއަށް ބުނީ މީގެ ކުރިން އެފަދަ ހާލަތްތައް ދިމާވި ކްރޫ މެމްބަރުންނަށް އެއްވެސް ނުރައްކަލެއް ދިމާވެފައި ނުވާ ކަމަށެވެ.
އޮޕަރޭޓަރު ނެރުނު ބަޔާނެއްގައި ބުނީ މާޝަލް އައިލެންޑްސްގެ ދިދަ ނަގާފައިވާ އުޅނދު ހުއްޓުވީ "ބައިނަލްއަގްވާމީ ހިޔާލު ތަފާތުވުމަކާ" ހެދި އެވެ.
އެކަމަކު އިރާނުން ބުނީ އެ ޓޭންކަރާއި އިރާނުގެ އުޅަނދެއް ޖެހި ހިނގި އެކްސިޑެންޓުގައި އިރާނުގެ ދެ މީހުން ގެއްލި އިތުރު ބަޔަކަށް އަނިޔާވެފައިވާ ކަމަށެވެ.
ޓޭންކަރު ހުއްޓުވަން މުއާމަލާތް ކުރުމުން ރައްދެއް ނުދޭ ކަމަށާއި ހިފަހައްޓަން ޖެހުނީ ޖަވާބު ނުދިނުމުން ކަމަށް އިރާނުން ބުންޏެވެ.
އެ މައްސަލައިގައި އެމެރިކާއިން ބުނީ ގަލްފުގެ ކަނޑުގެ ސަރަހައްދުގައި އިރާނުން ތަކުރާރުކޮށް "ފުރައްސާރަ ކުރަމުންދާ" ކަމަށާއި އެ ޓޭންކަރު ވަގުތުން ދޫކޮށްލަން ގޮވާލާ ކަމަށެވެ.
ކުވެއިތުން ތެޔޮ ބަރުކުރި އުޅަނދު ޗާޓަރު ކުރީ ޗެވްރޯން ކޯޕް ކުންފުނިންނެވެ. އޭގެ މިސްރާބު ހުރީ ޓެކްސަސްގެ ހިޔުސްޓަންއަށެވެ.
