ކޮލޮމްބޯ، ސްރީލަންކާ (އެޕްރީލް 28) - އިންޓަނޭޝަނަލް މަނިޓަރީ ފަންޑު (އައިއެމްއެފް) ގެ އެހީ ހޯދަން އަޅާފައިވާ ފިޔަވަޅުތަކާ އެކު ސްރީލަންކާގެ އިންފްލޭޝަން ރޭޓް 35.3 ޕަސެންޓަށް ވެއްޓިއްޖެ އެވެ.
މިއީ އަހަރެއްގެ ތެރޭގައި އިންފްލޭޝަން ރޭޓް އެންމެ ބޮޑަށް ދަށްވި ފަހަރެވެ. ތެލާއި ކާބޯތަކެތީގެ އަގުތައް ތިރިވާން ފެށުމާ އެކު އެޕްރީލް މަހު އިންފްލޭޝަން ދަށްވާން މަގުފަހިވި ކަމަށް ތަފާސްހިސާބުން ދައްކަ އެވެ.
އައިއެމްއެފްއިން އެއްބަސްވީ ހަތަރު އަހަރުގެ މައްޗަށް ބަހާލައިގެން ތިން ބިލިއަން ޑޮލަރުގެ ލޯނެއް ލަންކާއަށް ދިނުމަށެވެ. އޭގެ ފުރަތަމަ އިންސްޓޯލްމަންޓް ލިބުނުތާ އެއް މަސް ފުރުނީ އެޕްރީލް މަހު އެވެ.
ތަކެތީގެ އަގު އުފުލި އިންފްލޭޝަން އެންމެ މަތިވީ މިދިޔަ ސެޕްޓެމްބަރު މަހު އެވެ. އޭރު އިންފްލޭޝަން ހުރީ 69.8 ޕަސެންޓުގަ އެވެ.
އައިއެމްއެފްގެ ލޯނު އެހީ ކަށަވަރުވުމާ އެކު މާޗް މަހުގެ ފަހުކޮޅު ރައީސް ރަނިލް ވިކްރަމަސިންހަ ވިދާޅުވީ ލަންކާގެ 22 މިލިއަން މީހުން އިތުރު ގޮންޖެހުންތަކާ ކުރިމަތިލާން ޖެހުން އެކަށީގެންވާ ކަމަށެވެ.
ޑޮލަރު ހުސްވެ ތަކެތި އިމްޕޯޓް ކުރެވޭނެ ގޮތެއް ނެތުމުން، މިދިޔަ އަހަރު ލަންކާގެ ރައްޔިތުން އުޅުނީ ވަރަށް ދަތި ހާލުގަ އެވެ. އައިއެމްއެފްގެ އެހީ ކަށަވަރުވީ އިގުތިސާދު ރަނގަޅު ކުރަން ފިޔަވަޅުތަކެއް އަޅާ މަތިންނެވެ.
އެގޮތުން އިންކަމް ޓެކްސް މަތިކޮށް، ކަރަންޓުން ނަގާ ޓެރިފް އުފުލި އެވެ. އޭގެ އިތުރުން ތެލަށް ފޯރުކޮށްދޭ ސަބްސިޑީ އުވާލައި، އާމްދަނީ އިތުރު ކުރެވޭނެ އެހެނިހެން ބައެއް ފިޔަވަޅުތައް އެޅި އެވެ.
މިދިޔަ އަހަރު ލަންކާގެ އިގުތިސާދު ރެކޯޑު 7.8 ޕަސެންޓުން ކުޑަވި އެވެ. އެހެން ނަމަވެސް އަންނަ އަހަރު އިގުތިސާދު އަލުން ހިނގަން ފަށާނެ ކަމަށް މަރުކަޒީ ބޭންކުން އަންދާޒާ ކުރެ އެވެ.
ބުރާސްފަތި ދުވަހު ނެރުނު ރިޕޯޓުގައި ލަފާކޮށްފައި ވަނީ މި އަހަރު 2.0 ޕަސެންޓުން އިގުތިސާދު ކުޑަވި ނަމަވެސް، 2024 ގައި 3.3 ޕަސެންޓުގެ ކުރިއެރުމެއް ލިބޭނެ ކަމަށެވެ.
