ރާއްޖެއާއި ބުރުންޑީ ސަރުކާރާ ދެމެދުގައި މިއުޗުއަލް އެކްޒެމްޕްޝަން އޮފް ވިސާ ރިކުއަރމަންޓްސް އެއްބަސްވުމެއްގައި ސޮއިކޮށްފި އެވެ.
މިއީ ދެގައުމުގެ ރައްޔިތުންނަށް އެއް ގައުމު އަނެއް ގައުމަށް 30 ދުވަހުގެ މުއްދަތަށް ވިސާ ނެތި ދަތުރު ކުރުމަށް މަގުފަހިވާ އެއްބަސްވުމެއް ކަމަށް ފޮރިން މިނިސްޓްރީން ބުންޏެވެ.
މީގެ ތެރޭގައި ސިންގަލް ނުވަތަ މަލްޓިޕްލް އެންޓްރީ، އެގްޒިޓް ނުވަތަ ޓްރާންސިޓް ވެސް ހިމެނޭ ކަމަށް މިނިސްޓްރީން އިތުރަށް ބުންޏެވެ. އެ އެއްބަސްވުމަށް އަމަލުކުރަން ފެށުމަށް ހަމަޖެހިފައި ވަނީ އެއްބަސްވުމުގައި ސޮއިކުރާތާ 30 ދުވަސް ފަހުންނެވެ.
ރާއްޖޭގެ ޕާސްޕޯޓް ބޭނުންކުރެވޭ ގައުމުތައް އިތުރުވުން
ބުރުންޑީއާއެކު ވެވުނު ވިސާ އެކްޒެމްޕްޝަން އެއްބަސްވުމާއެކު މިހާރު ދިވެހި ޕާސްޕޯޓުގައި 90 އަށްވުރެ ގިނަ ގައުމަށް ވިސާ ނެތި ފަސޭހަކަމާއެކު ދަތުރު ކުރެވޭނެ ކަމަށް މިނިސްޓްރީން ބުނެ އެެވެ.
ރާއްޖޭގެ ޕާސްޕޯޓުގައި ރަޝިޔާ، ޔޫއޭއީ އަދި ޗައިނާ ފަދަ ބޮޑެތި ގައުމުތަކަށް މިހާރުވެސް ވިސާ ނެތި ދަތުރުފަތުރު ކުރެވޭ ކަމަށާއި އަދި ރާއްޖޭގެ ޕާސްޕޯޓަކީ ދެކުނު އޭޝިޔާގައި އޮތް އެންމެ ވަރުގަދަ ޕާސްޕޯޓްކަން ވެސް މިނިސްޓްރީން ވަނީ ފާހަގަކޮށްފަ އެވެ.
މި އެއްބަސްވުމުން ވާނެ ފައިދާއަކީ ކޮބާ؟
މިނިސްޓްރީން ބުނީ ބުރުންޑީއާ އެކު މިވެވުނު އެއްބަސްވުމުގެ ސަބަބުން ރާއްޖޭގެ ޕާސްޕޯޓުގައި ވިސާ ނެތި ދަތުރުފަތުރު ކުރެވޭ ގައުމުތައް އިތުރުވަމުން ދިޔުމަކީ ރާއްޖޭގެ ޕާސްޕޯޓަށް އޮތް އިތުބާރާއި ޔަގީންކަން އިތުރަށް ވަރުގަދަވަމުން ދިޔުމުގެ ހެއްކެއް ކަމަށެވެ.
އަދި މިކަމުގެ ސަބަބުން ޝެންގެން ސަރަހައްދު ހިމެނޭހެން އިތުރު ގައުމުތަކަށް ވިސާ ނެތި ދިވެހި ޕާސްޕޯޓުގައި ދަތުރު ކުރުމުގެ ހުއްދަ ހޯދުމަށް ކުރާ މަސައްކަތަށް އިތުރު ކުރިއެރުމެއް ލިބިގެންދާނެ ކަމަށެވެ.
