ޔޫކްރެއިން ހަނގުރާމައަށް "ސިޔާސީ ހައްލެއް" ހޯދުމަށް އެހީވެދިނުމުގެ ގޮތުން ޗައިނާގެ ވަފުދެއް ޔޫކްރެއިނަށް ދަތުރުކުރަން ހަމަޖެހިއްޖެ އެވެ.
ބުދަ ދުވަހު ޗައިނާގެ ފޮރިން މިނިސްޓްރީން ބޭއްވި ޕްރެސް ކޮންފެރެންސެއްގައި ބުނީ ޗައިނާގެ ފަރާތުން ވަފުދުގައި އިސްކޮށް ހުންނަވާނީ ޔޫރޭޝިއަން ކަންކަމަށް ހާއްސަ ސަރުކާރުގެ މަންދޫބެއް ކަމަށެވެ.
ޔޫކްރެއިނާއި ރަޝިއާގެ ހަނގުރާމައަށް "ސިޔާސީ ހައްލެއް" ހޯދަން އެ ވަފުދުން ޔޫކްރެއިންގެ އިތުރުން އެހެން ގައުމުތަކަށް ދަތުރު ކުރާނެ ކަމަށް ޗައިނާގެ ފޮރިން މިނިސްޓްރީން ބުންޏެވެ.
ޗައިނާއިން އެކަން އިއުލާނު ކުރިއިރު، ޗައިނާގެ ރައީސް ޝީ ޖިންޕިން އާއި ޔޫކްރެއިން ރައީސް ވޮލޮޑިމިރް ޒެލެންސްކީ ވަނީ ހަނގުރާމަ ފެށި ފަހުން ފުރަތަމަ ފަހަރަށް މަޝްވަރާ ކުރައްވައިފަ އެވެ.
ބެލެވޭ ގޮތުގައި ޗައިނާގެ ވަފުދެއް ޔޫކްރެއިނަށް ފޮނުވަން ނިންމީ އެ މަޝްވަރާގެ ތެރެއިންނެވެ. މީގެ ކުރިން ޔޫކްރެއިންގެ ރައީސް ވަނީ ޝީ ޖިންޕިން ޔޫކްރެއިނަށް ވަޑައިގެންނެވުމަށް ދައުވަތު ދެއްވައިފަ އެވެ.
ޝީ ޖިންޕިން އާއި ޒެލެންސްކީގެ މަޝްވަރާއާ ގުޅިގެން ރަޝިއާއިން ބުނީ ސުލްހަ ހޯދަން ކުރާ ކޮންމެ މަސައްކަތަކަށް ޔޫކްރެއިނުން ހުރަސް އަޅާނެ ކަމަށެވެ.
އެހެން ނަމަވެސް ސުލްހަ ގެނައުމަށް ޗައިނާއިން ކުރާ މަސައްކަތް ބަލައިގަންނަ ކަމަށް ރަޝިއާގެ ފޮރިން މިނިސްޓްރީން ބުންޏެވެ.
މީގެ ކުރިން ޗައިނާއިން ވަނީ ސުލްހަ ގެނެވޭނެ މަގުޗާޓެއް އާއްމުކޮށްފަ އެވެ. އެކަމަކު ޔޫކްރެއިނާއި ހުޅަނގުގެ ގައުމުތަކުން އެ ރޭވުމަށް މާ ބޮޑު ސަމާލުކަމެއް ނުދެ އެވެ.
