ލަންޑަން (އޭޕްރީލް 26) - ބްލެކްބާން ރޯވާސް އަތުން 1-0 އިން މޮޅުވެ، ވިންސެންޓް ކޮމްޕެނީ ކޯޗުކޮށްދެމުން އަންނަ ބާންލީ އިން އީއެފްއެލް ޗެމްޕިއަންޝިޕް (އިނގިރޭސި ދެ ވަނަ ޑިވިޝަން)ގެ ޗެމްޕިއަންކަން ހޯދައިފި އެވެ.
ގަދަ ދެ ޓީމުގެ ތެރޭގައި ހިމެނިގެން، އަންނަ ސީޒަނުގެ އިނގިރޭސި ޕްރިމިއާ ލީގުގެ ޖާގައެއް ބާންލީން ކަށަވަރުކުރީ ބާކީ ހަތް މެޗު އޮއްވައި މި މަހު ކުރީކޮޅުގަ އެވެ. ރޭ ފޯރިގަދަ މެޗަކަށް ފަހު، ބްލެކްބާން ބަލިކޮށް، ޗެމްޕިއަންޝިޕްގެ ޗެމްޕިއަންކަން ބާންލީން ކަށަވަރުކުރީ ބާކީ ދެ މެޗު އޮއްވަ އެވެ.
ގޯލު ޖަހާނެ ގިނަ ފުރުސަތުތަކެއް ލިބުނު ބާންލީ ޓީމުން މި މެޗުގައި ޖެހި ހަމައެކަނި ގޯލު ކާމިޔާބުކުރީ 66 ވަނަ މިނިޓްގައި މެނުއަލް ބެންސަން އެވެ. މިއީ ޓެކްނިކަލީ ބަލާއިރު ރަނގަޅު ގޯލެކެވެ. ބްލެކްބާނުން ވެސް ނަތީޖާއެއް ނެރެވޭތޯ ގިނަ މަސައްކަތްތަކެއް ކުރި ނަމަވެސް ބާންލީގެ ޑިފެންސް ލައިން ފެނިގެންދިޔައީ ވަރަށް ވަރުގަދަ ކޮށެވެ.
މެޗަށް ފަހު ކޮމްޕެނީ ދިން އިންޓަވިއުއެއްގައި ބުނީ ބާންލީން ޕްރިމިއާ ލީގަށްދާއިރު، އެއީ ޗެމްޕިއަންޝިޕްގެ ޗެމްޕިއަނުންނަށް ވުމަކީ ކުރިއަށްދާން ބަލާއިރު ބޮޑު ހިތްހަމަޖެހުމެކެވެ. އަދި އުންމީދަކީ މި ވަގުތު ބާންލީގައި ތިބި ކުޅުންތެރިންގެ މެޖޯރިޓީ އަންނަ ސީޒަނުގައި ޕްރިމިއާ ލީގުގައި ވެސް ރަނގަޅު ކުޅުމެއް ދެއްކުން ކަމަށް ކޮމްޕެނީ ވަނީ ބުނެފަ އެވެ.
ލަނޑު ޖަހާނެ ގިނަ ފުރުސަތުތަކެއް ބްލެކްބާން އަތުން ވެސް މި މެޗުގައި ގެއްލުނުއިރު، މެޗަށް ފަހު އެ ޓީމުގެ ކޯޗު ޔޮން ދާލް ތޮމަސަން ބުނީ ހަގީގަތަށް ވާހަކަ ދައްކާނަމަ މި މެޗުން މޮޅުވާން ހައްގު މިންވަރެއްގެ ކުޅުމެއް ދެއްކީ ބްލެކްބާނުން ކަމަށެވެ.
ތޮމަސަން ބުނީ ބްލެކްބާން ރަނގަޅަށް ކުޅެ، މިހާ ވަރުގަދަ މެޗެއް އެންމެ ގޯލެއްގެ ފަރަގުން ނިމިގެން ބަލިވުމަކީ މާޔޫސްވުމެއް ކަމަށެވެ.
ބްލެކްބާން އެންމެ ފަހުން ލީގުގެ މެޗަކުން މޮޅެއް ހޯދުނީ އަށް މެޗު ކުރިންނެވެ.
އާ ކޯޗެއް ހޯދަން ޗެލްސީ އާއި ޓޮޓެންހަމް އިން ހަދާފައިވާ ލިސްޓުގައި ކޮމްޕެނީގެ ނަން އެބައޮތެވެ. އެކަމަކު، ކޮމްޕެނީގެ ފޯކަސް މި ވަގުތު ހުރީ ބާންލީގައި އޮތް ޕްރޮޖެކްޓައިގެން ކުރިއަށް ދިއުން ކަމަށް ކޮމްޕެނީގެ އެޖެންޓާ ހަވާލާދީ މީޑިއާތަކުން ރިޕޯޓްކޮށްފައިވެ އެވެ.
