ނޭޕްލްސް، އިޓަލީ (އޭޕްރީލް 24) - އިޓާލިއަން ލީގުގައި ރޭ ޔުވެންޓަސް އަތުން 1-0 އިން މޮޅުވެ، ނަޕޯލީ ލީގު ޗެމްޕިއަންކަން ހޯދުމާ ގާތަށް ޖެހިލައިފި އެވެ.
ތިރީސް ތިން އަހަރު ތެރޭ ފުރަތަމަ ފަހަރަށް އިޓަލީގެ ޗެމްޕިއަންކަން ހޯދަން މަސައްކަތް ކުރަމުން އަންނަ ނަޕޯލީ އަށް ދެން ލީގުގައި އޮތް މެޗުން މޮޅުވެެގެން، ވެސް ޗެމްޕިއަންކަން ހޯދުމުގެ ފުރުސަތު އެބައޮތެވެ. ނަޕޯލީ މި ވަގުތު އެއް ވަނައިގައި އޮތީ 17 ޕޮއިންޓުގެ ލީޑަކާ އެކު އެވެ.
ނަޕޯލީ އަށް 31 މެޗުން 78 ޕޮއިންޓް ލިބިފައިވާއިރު، ދެ ވަނައިގައި އޮތް ލާޒިއޯގެ އޮތީ 31 މެޗުން 61 ޕޮއިންޓެވެ. ތިން ވަނައިގައި އޮތް ޔުވެންޓަސް އަށް 31 މެޗުން 59 ޕޮއިންޓް ލިބިފައިވާއިރު، ހަތަރެއްގައި ރޯމާ އަށް ވަނީ 30 މެޗުން 56 ޕޮއިންޓް ލިބިފަ އެވެ. ފަސް ވަނައިގައި އޮތް އޭސީ މިލާނުން ވަނީ ލެޗޭ އަތުން 2-0 އިން ހޯދި މޮޅާ އެކު، 31 މެޗުން 56 ޕޮއިންޓް ހަމަކޮށްފަ އެވެ. އަދި ހަ ވަނައިގައި އިންޓަ މިލާން އޮތީ 31 މެޗުން 54 ޕޮއިންޓާ އެކު އެވެ. އިންޓަ އިން ވަނީ ރޭ އެމްޕޮލީ ދަނޑުގައި 3-0 އިން މޮޅުވެފަ އެވެ.
ޔުވެންޓަސް ދަނޑުގައި ރޭ ކުޅުނު މެޗު ފަށައިގެން އެ ޓީމުގެ ހުއާން ކުއަޑްރާޑޯ ޖެހި ޝޮޓް ނަޕޯލީ ކީޕަރު އަލެކްސް މެރެޓް ވަނީ މަތަކޮށްފަ އެވެ. ނަޕޯލީ އަށް ލީޑުނަގައިދޭން މެޗުގެ 70 ވަަނަ މިނިޓްގައި ޔުވެންޓަސްގެ އޭރިއާތެރެއިން ނަޕޯލީގެ ވިކްޓަ އޮސީމެން ޖެހި ބޯޅަ ބޭރުވީ ދަނޑީގައި ޖެހިފަ އެވެ.
މެޗުގެ 82 ވަނަ މިނިޓްގައި ޔުވެންޓަސްގެ އަންހެލް ޑި މާރިއާ ވަނީ ގޯލެއް ޖަހައިފަ އެވެ. އެކަމަކު، އެ އެޓޭކް ފެށުމުގެ ކުރިން ޔުވެންޓަސް އިން ފައުލެއް ކޮށްފައިވާތީ، ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި ނިންމީ ގޯލެއް ނޫން ކަމަށެވެ.
ނަޕޯލީ މެޗުން މޮޅުވީ އިތުރު ވަގުތުގެ ހަ މިނިޓްގެ ތެރެއިން ތިން ވަނަ މިނިޓްގައި ޖިއަކޯމޯ ރަސްޕަޑޯރީ ޖެހި ގޯލުންނެވެ. އަރިމަތިން ނަޕޯލީގެ އެލްޔިފް އެލްމާސް ނެގި ހުރަހަކުން އޭރިއާތެރެއިން ރަސްޕަޑޯރީ ޖެހި ވޮލީ ހުއްޓުވަން ޔުވެންޓަސްގެ ކީޕަރު ވޮޒްޝިއޭ ޝެޒްސްނީ އަށް މާ ބޮޑު ކަމެއް ނުކުރެވުނެވެ.
މިލާނުން ރޭ ލެޗޭ ބަލިކުރި މެޗުގައި އެ ޓީމުގެ ދެ ގޯލު ވެސް ޖެހީ މި ވަގުތު ރަނގަޅު ފޯމެއްގައި ހުރި ރަފައެލް ލެއާއޯ އެވެ. ގޯލުތައް ޖަހަން ފުރުސަތު ތަނަވަސްކޮށްދިނީ ސަންޑްރޯ ޓޮނާލީ އާއި ބްރަހީމް ޑިއާޒް އެވެ.
އެމްޕޮލީ ދަނޑުގައި ކުޅުނު މެޗުގައި އިންޓަ އިން ޖެހި ތިން ގޯލުގެ ތެރެއިން ދެ ލަނޑު ޖެހީ މި ސީޒަނުގައި އެއް ފޯމެއް ދަމަހައްޓަން އުނދަގޫތަކެއް ކުރިމަތިވެފައިވާ ފޯވާޑް ރޮމެލޫ ލުކާކޫ އެވެ. އިންޓަ އިން ޖެހި އަނެއް ގޯލުގައި ވެސް ލުކާކޫގެ ހިއްސާ ބޮޑެވެ. މެޗު ނިމެން ދެ މިނިޓަށް ވެފައި ވަނިކޮށް ލަޓާރޯ މާޓީނޭޒް އިންޓަގެ ފަހު ގޯލު ޖެހީ ލުކާކޫ ދިން ބޯޅައަކުންނެވެ.
