ލަންޑަން (އޭޕްރީލް 22) - ޗެލްސީގެ ކޯޗުގެ މަގާމަށް އެ ކްލަބުން ޝޯޓް ލިސްޓްކުރި ދެ ކޯޗުންގެ ތެރޭގައި ވިންސެންޓް ކޮމްޕެނީ އާއި ޓޮޓެންހަމް ހޮޓްސްޕާގެ ކުރީގެ ކޯޗު މައުރީސިއޯ ޕޮޗެޓީނޯ ހިމެނޭ ކަމަށް މީޑިއާ ރިޕޯޓްތައް ބުނެފި އެވެ.
މީޑިއާ ރިޕޯޓްތަކުން ބުނާގޮތުގައި މެންޗެސްޓާ ސިޓީގެ ކުރީގެ ކެޕްޓަން ކޮމްޕެނީ އައި ޕޮޗެޓީނޯއާ އެކު އިތުރު ކޯޗެއް ވެސް ޝޯޓްލިސްޓްގައި ހިމެނެ އެވެ. އެކަމަކު، ތިން ވަނަ ކޯޗަކީ ކާކުކަމެއް މީޑިއާތަކުން ރިޕޯޓްކޮށްފައެއް ނުވެ އެވެ.
ބަޔާން މިއުނިކްގެ ކޯޗުކަމުން ދާދި ފަހުން ވަކިކުރި ޖަރުމަނުގެ ޒުވާން ކޯޗު، ހޫލިއަން ނާގަލްސްމަން ގެންނަން ކުރިން ޗެލްސީން ވިސްނި ނަމަވެސް، ޝޯޓްލިސްޓްކުރި ކޯޗުންގެ ތެރޭގައި ނުހިމެނެ އެވެ. ރިޕޯޓްތައް ބުނާގޮތުން ޗެލްސީން ހުށަހަޅާ ބައެއް ޝަރުތުތަކާ މެދު ނާގަލްސްމަން ނުރުހޭތީ އެ ޓީމާ ހަވާލުވާން ލިބުނު ފުރުސަތު ދޫކޮށްލީ އެވެ.
ބާންލީގެ ކޯޗުގެ ގޮތުގައި ހޭދަކުރި ފުރަތަމަ ސީޒަންގައި ކޮމްޕެނީ، 37، ވަނީ އެ ޓީމު ޕްރިމިއާ ލީގަށް ކޮލިފައިކޮށްދީފަ އެވެ.
ބާންލީއާ ހަވާލުވުމުގެ ކުރިން ކޮމްޕެނީ ހުރީ އެންޑަލެކްޓްގެ ކޯޗުގެ މަގާމުގަ އެވެ. ކޯޗިންގައި އަދި އެނާގެ ތަޖުރިބާ މަދެވެ.
މިދިޔަ އަހަރު ޕީއެސްޖީގެ ކޯޗުކަމުން ވަކިކުރި ފަހުން، ޕޮޗެޓީނޯ ހުރީ ޓީމަކާ ހަވާލުނުވެ އެވެ. ޓޮޓެންހަމްގެ ކޯޗުގެ ގޮތުގައި ހޭދަކުރި ފަސް އަހަރުގެ ތެރޭ ރަނގަޅު މަސައްކަތްތަކެއް ވަނީކޮށްފަ އެވެ. ޕޮޗެޓީނޯގެ އިރުޝާދުގެ ދަށުން 2019 ވަނަ އަހަރު ޗެމްޕިއަންސް ލީގުގެ ފައިނަލަށް ވެސް ޓޮޓެންހަމް ދަތުރުކުރި އެވެ.
ޗެލްސީގެ ކޯޗުކަމުން ގްރޭހަމް ޕޮޓާ ވަކިކޮށް، އެ ޓީމަށް ކުރިން ވެސް ކޯޗުކޮށްދިން ފްރޭންކް ލަމްޕާޑަށް ޗެލްސީގެ ކޯޗުކަން ހަވާލުކުރީ މި ސީޒަންގެ ނިޔަލަށެވެ. ލަމްޕާޑް ހަވާލުވި ފަހުން ޗެލްސީ ކުޅުނު ހަތަރު މެޗުން ވެސް ބަލިވިއިރު، އޭނާ އަށް ވަގުތީ ގޮތުން ވިޔަސް އެ ޓީމުގެ ކޯޗުކަން ހަވާލުކުރުމަކީ ރަނގަޅު ނިންމުމެއްތޯ މީޑިއާ އިން އަންނަނީ ސުވާލު އުފައްދަމުންނެވެ.
