ރައީސް އިބްރާހިމް މުހައްމަދު ސޯލިހުގެ ސަރުކާރަށް ހޯދުނު އެންމެ ބޮޑު އެއް ކާމިޔާބީއަކީ ވެއެތުވެދިޔަ ހަތަރު އަހަރުގެ ތެރޭގައި ރާއްޖެ ދެކެމުންދާ ހަމަޖެހުމާއި އަމާންކަން ކަމަށް ޑިފެންސް މިނިސްޓަރު މާރިޔާ އަހުމަދު ދީދީ މިއަދު ވިދާޅުވެއްޖެެ އެވެ.
ސިފައިންގެ 131 ވަނަ އަހަރީ ދުވަހުގެ މުނާސަބަތުގައި ދެއްވި ހިތާބުގައި މިނިސްޓަރު މާރިޔާ ވަނީ ދުވަހުގެ ތަހުނިޔާ ދިވެހި ސިފައިންނަށާއި ގައުމުގެ އިސްވެރިންނަށް ރައްދުކުރައްވާ މި ހަތަރު އަހަރު ރާއްޖެއަށް ގެނެވިފައިވާ ތަރައްގީގެ މައިގަނޑު އެއް ސަބަބަކީ ގައުމުގައި ގާއިމުވެފައިވާ އަމާންކަން ކަމަށް ވިދާޅުވެފަ އެވެ.
"2008 ވަނަ އަހަރު މަލްޓިޕާޓީ ޑިމޮކްރަޓިކް ނިޒާމެއް ތައާރަފުކޮށް، ޑިމޮކްރަސީގެ މަގަށް ދިވެހިރާއްޖޭގެ ވެރިކަމުގެ ނިޒާމު ބަދަލުކުރި ފަހުން، ފާއިތުވެދިޔަ ހަތަރު އަހަރާއި ފަސް މަހަށްވުރެ ހަމަޖެހުމާއި ސުލްހަމަސަލަސްކަން ގާއިމުވެފައި އޮތް ދުވަސްތަކެއް ދިވެހިން ދެކިފައި ނުވާނެކަން އެއީ ދެބަސްވެވެން ނެތް ހަގީގަތެއް،" މިނިސްޓަރު ވިދާޅުވި އެވެ.
ފާއިތުވެދިޔަ ހަތަރު އަހަރުގެ ތެރޭގައި ސަރުކާރުން ހާސިލުކުރި އެންމެ ބޮޑު އެއް ކާމިޔާބީއަކީ ގައުމު ދެކެމުން މިދާ އަމާންކަމާއި ހަމަޖެހުން ކަމަށް ވެސް މާރިޔާ ވިދާޅުވި އެވެ.
"ގިނަ ގޮންޖެހުންތަކާއެކުވެސް، ތަރައްގީގެ ދުވެލީގައި، އަސްކަރީ ދާއިރާވެސް ހިމެނިގެން، ދިވެހިރާއްޖެ މިއަދު ދެކެމުން މިދަނީ މީގެ ކުރިން ރާއްޖެ ދެކެފައި ނުވާފަދަ ހިތްހަމަޖެހޭ ދުވަސްތަކެއް،" އޭނާ ވިދާޅުވި އެވެ.
އޭގެ އިތުރުން މާރިޔާ ވިދާޅުވީ މިއަހަރުގެ ސިފައިންގެ ޝިއާރަކީ "ސިފައިންގެ ބަދަހިކަން – ގައުމުގެ ހަމަޖެހުން" ކަމަށާއި އެ ޝިއާރުން ހަނދާންކޮށްދެނީ ސިފައިންގެ މަސްއޫލިއްޔަތާއި ވާޖިބު އެންމެ ފުރިހަމަގޮތުގައި އަދާކުރެވޭނީ ސިފައިން ބަދަހި ލަޝްކަރެއްގެ ގޮތުގައި އޮވެގެން ކަމަށެވެ.
ސިފައިންގެ ދުވަސް ފާހަގަކުރުމުގެ ގޮތުން މިއަދު ހެދުނު 6:00 ޖެހިއިރު ކަޅުތުއްކަލާ ކޮށީގައި ވަނީ ދިދަ ނެގުމުގެ ހާއްސަ ރަސްމިއްޔާތެއް ވެސް ކުރިއަށް ގެންގޮސްފަ އެވެ. އެ ރަސްމިއްޔާތު ޝަރަފުވެރިކޮށްދެއްވީ މިނިސްޓަރު މާރިޔާ އެވެ.
މިއަދު ސިފައިންގޭގައި ބޭއްވި ދިދަ ނެގުމުގެ ރަސްމިއްޔާތުގެ ތެރެއިން - ފޮޓޯ: އެމްއެންޑީއެފް
އޭގެ އިތުރުން އެ ރަސްމިއްޔާތުގައި ޗީފް އޮފް ޑިފެންސް ފޯސް މޭޖަރ ޖެނެރަލް އަބްދުﷲ ޝަމާލާއި ވައިސް ޗީފް އޮފް ޑިފެންސް ފޯސް ބްރިގޭޑިއާ ޖެނެރަލް އަބްދުއްރަހީމް އަބްދުއްލަތީފާއި ސިފައިންގެ ޖެނެރަލް އޮފިސަރުންނާއި އޮފިސަރުންނާއި ވޮރަންޓް އޮފިސަރުންގެ އިތުރުން އެންލިސްޓެޑް ރޭންކްތަކުގެ ގިނަ އަދަދެއްގެ ސިފައިން ވެސް އެ ހަފުލާގައި ބައިވެރިވި އެވެ.
ދިވެހިރާއްޖޭގައި ސިފައިންގެ ހިދުމަތް ފެށީ އޭޕްރީލް 21، 1892 ގަ އެވެ. ސިފައިންގެ ދުވަހުގެ ގޮތުގައި ފާހަގަ ކުރަމުން އަންނަނީ ކޮންމެ އަހަރެއްގެ ވެސް އެޕްރީލް މަހުގެ 21 ވަނަ ދުވަހެވެ.
