އޮންނަ އުސޫލުތަކުގެ ތެރެއިން އެދުމުން ގާނޫނު ތަންފީޒު ކުރާ އިދާރާތަކަށް އެ ކުންފުނިން މައުލޫމާތި ފޯރުކޮށްދޭ ކަމަށް އުރީދޫ މޯލްޑިވްސް އިން ބުނެފި އެވެ.
މީހުންނަށް ގުޅައިގެން މަކަރުން ފައިސާ ހޯދާ މައްސަލަ ހައްލު ކުރަން ޓެލެކޮމް އޮޕަރޭޓަރުންގެ އެއްބާރުލުން ނުލިބޭ ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެފައި އޮއްވައި، އުރީދޫގެ ޗީފް ކޮމާޝަލް އޮފިސަރު ހުސެއިން ނިޔާޒު މި ނޫހާ ވާހަކަދައްކަވަމުން ވިދާޅުވީ ގާނޫނު ތަންފީޒު ކުރާ އިދާރާތަކުން ބޭނުންވާ މައުލޫމާތު އެ ކުންފުނިން "އަބަދުވެސް ފޯރުކޮށްދޭނެ" ކަމަށެވެ.
"އަޅުގަނޑުމެންނަށް ލިބިފައިވާ ރެގިއުލޭޓަރީ އުސޫލުތަކުގެ ތެރެއިން ޤާނޫނު ތަންފީޒުކުރާ ފަރާތްތަކުން އެދޭ އެއްވެސް މަޢުލޫމާތެއް ފޯރުކޮށްދޭން އެދިއްޖެނަމަ އެ މައުލޫމާތު އުރީދޫއިން އަބަދުވެސް ފޯރުކޮށްދޭނެ،" ނިޔާޒު ވިދާޅުވި އެވެ.
މަކަރުން ފައިސާ ހޯދާ މައްސަލަ ހައްލު ކުރަން ދިރާގާއި އުރީދޫގެ އެއްބާރުލުން ނުލިބޭ ކަމަށް ހޯމް މިނިސްޓަރު ވިދާޅުވީ މެމްބަރަކު ކުރެއްވި ސުވާލަކާ ގުޅިގެން ރައްޔިތުންގެ މަޖިލީހަށް ފޮނުއްވި ސިޓީއެއްގަ އެވެ.
"މި މައުލޫމާތުތައް ރައްކާކުރެވިފައި ހުންނަނީ ދިރާގާއި އުރީދޫގައި ކަމުގައި ވާތީ އެފަރާތްތަކުން ދިވެހި ފުލުހުންގެ ހިދުމަތަށް ކޯލް ރެކޯޑް ތަކުގެ ފުރިހަމަ މައުލޫމާތު ފޯރުކޮށްދެމުން ނުދާތީއާއި އަދި ފޯރުކޮށްދޭ މައުލޫމާތުތައް އެކި ފޯމެޓްގައި ހުރުމުން ، އެކަމުގެ ސަބަބުން އެ މަސައްކަތުގައި ގިނަ ގޮންޖެހުންތަކަކާ ކުރިމަތިވާކަން ފާހަގަކޮށް، އެފަދަ މައުލޫމާތުތައް ފުލުހުންނާ ހިއްސާކުރުން ލާޒިމުވާ ފަދަ ގާނޫނީ މިންގަނޑެއް އޮތުން މުހިއްމުކަމުގައި އަޅުގަނޑު ދެކެން،" އެ ސިޓީގައި އިމްރާން ވިދާޅުވި އެވެ.
އެހެންނަމަވެސް، މަކަރުން ފައިސާ ހޯދުމުގެ މައްސަލަތައް ހައްލު ކުރަން އޮޕަރޭޓަރުންގެ އެއްބާރުލުން ލިބޭ ކަމަށް ޓެލެކޮމިނިއުކޭޝަން އޮތޯރިޓީން ވެސް ފަހުން ބުންޏެވެ. އެތަނުގެ ސީއީއޯ އިލްޔާސް އަހުމަދު މި ނޫހާ ވާހަކަ ދައްކަވަމުން ބުދަ ދުވަހު ވިދާޅުވީ ކުށް ކުރުމުގެ އެއްވެސް ކަމެއް ހުއްޓުވަން އޮޕަރޭޓަރުންގެ ފަރާތުން އެއްބާރުލުން ނުލިބި ނުދާ ކަމަށެވެ.
"އަޅުގަނޑުމެން ހުރިހާ ފަރާތްތަކުން ގުޅިގެން މަޝްވަރާކޮށްގެން މިކަންތައްތައް [ސްކޭމް ހުއްޓުވުމަށް މަސައްކަތް] މި ކުރަނީ. އަޅުގަނޑުމެންނަށް ގުޅުން ހުރި ހުރިހާ ފަރާތްތަކުންވެސް އެއްބާރުލުން ލިބޭ،" އޭނާ ވިދާޅުވި އެވެ.
