އޮޅުވާލައިގެން ފައިސާ ހޯދުމަށް އެކި ނަންނަމުގައި ކުރަމުންދާ ސްކޭމް ކޯލުތައް ހުއްޓުވަން ޓެލެކޮމް އޮޕަރޭޓަރުުންގެ ފުރިހަމަ އެއްބާރުލުން ލިބޭ ކަމަށް ކޮމިއުނިކޭޝަން އޮތޯރިޓީ އޮފް މޯލްޑިވްސް (ކޭމް)ގެ ސީއީއޯ އިލިޔާސް އަހުމަދު މިއަދު ވިދާޅުވެއްޖެ އެވެ.
މަޖިލީހުގެ މާފަންނު މެދު ދާއިރާގެ މެމްބަރު އިބްރާހީމް ރަޝީދު ކުރެއްވި ސުވާލަކަށް ލިޔުމުން ފޮނުއްވި ޖަވާބުގައި ހޯމް މިނިސްޓަރު އިމްރާން ވަނީ ޖަލުން ކުރާ ސްކޭމް ކޯލުތައް ހުއްޓުވުުމަށް ޓެލެކޮމް އޮޕަރޭޓަރުންގެ އެންމެ ފުރިހަމަ އެއްބާރުލުން ނުލިބޭ ކަމަށެވެ.
ކޭމްގެ ސީއީއޯ އިލިޔާސް "އަދަދު" އަށް ވިދާޅުވީ ސްކޭމް ކޯލުތައް މަދުކުރުމަށް ގިނަ މަސައްކަތްތަކެއް ކުރަމުން އަންނަ ކަމަށާއި އެކަމަށް ޓެލެކޮމް އޮޕަރޭޓަރުންގެ ފަރާތުން ލިބެންޖެހޭ އެންމެ ފުރިހަމަ އެއްބާރުލުންް ވެސް ލިބޭ ކަމަށެވެ.
"އަޅުގަނޑުމެން ހުރިހާ ފަރާތްތަކުން ގުޅިގެން މަޝްވަރާކޮށްގެން މިކަންތައްތައް [ސްކޭމް ހުއްޓުވުމަށް މަސައްކަތް] މި ކުރަނީ. އަޅުގަނޑުމެންނަށް ގުޅުން ހުރި ހުރިހާ ފަރާތްތަކުންވެސް އެއްބާރުލުން ލިބޭ،" އިލިޔާސް ވިދާޅުވި އެވެ.
އިލިޔާސް ވިދާޅުވީ އެކި ކުންފުނިތަކުގެ ނަމުގައި އޮޅުވާލައިގެން ގުޅުމާއި މެސެޖުކުރުން ހުއްޓުވުމަށް ވެސް ގިނަ މަސައްކަތްތަކެއް ކުރަމުންދާ ކަމަށެވެ. އެގޮތުން މިދިޔަ ޑިސެމްބަރު 1، އިން ފެށިގެން ސިމްކާޑު ދޫކުރުމުގެ އުސޫލަށް ބަދަލު ގެނެވިފައިވާކަން އޭނާ ފާހަގަކުރެއްވި އެވެ. އަދި ވަރަށް އަވަހަށް އެކަކަށް ސިމް ދޫކުރާ އަދަދު ކޮންޓްރޯލުކުރުމުގެ މަސައްކަަތް ވެސް ކުރާނެ ކަމަށް ވިދާޅުވި އެވެ.
މި ފަހަކަށް އައިސް އެކި އިދާރާތަކާއި ކުންފުނިތަކުގެ ނަމުގާ ގުޅާ މީޙުން އަތުން ފައިސާ ހޯދުމާއި އެކައުންޓުގެ މައުލޫމާތު ހޯދައިގެން އެކައުންޓުން ވައްކަން ކުރުމުގެ މައްސަލަ ވަަނީ އިންތިހާއަށް ގިނަވެފަ އެވެ. މިފަދަ މައްސަލަތަކުގައި ސްކޭމް ކޯލުތައް ކުރާ މީހުން އަތުލައިގަނެވެނީ މަދު ފަހަރެއްގަ އެވެ.
މިދިޔަ އަހަރު އެކަނިވެސް އޮޅުވާލައިގެން ބޭންކު އެކައުންޓުން ފައިސާ ހޯދުމުގެ 1087 މައްސަލަ ހުށަހެޅި ކަމަށް ފުލުހުން ބުނެ އެވެ. މިއަހަރުގެ މިހައިތަނަށް 155 މައްސަލަ ހުށަހަޅާފައިވާކަމަށް ވެސް ފުލުހުން ބުނެ އެވެ.
