ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު ރައީސް އިބްރާހީމް މުހައްމަދު ސޯލިހަށް ނިސްބަތްކޮށް، ހުތުރުބަހުން ވާހަކަދައްކަވާފައިވާ ކަމަށް ބުނެ، ސޯޝަލް މީޑިއާގައި ބަޔަކު އާއްމުކުރި އޯޑިއޯ އަކީ އަސްލެއް ނޫން ކަމަށް އޭނާ މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ޖާބިރު ދެއްކެވި ވާހަކައިގައި ރައީސަށް ތައުރީފުކުރައްވަން ފެށްޓެވުމުން، ޖާބިރުގެ އޯޑިއޯ ކަމަށް ބުނާ އޯޑިއޯގެ ވާހަކަ އެހެން މެމްބަރަކު ވިދާޅުވާ އަޑު އިވެ އެވެ. އެއާ އެކު އޭނާ އެ މެމްބަރަކަށް ރައްދު ދެއްވި އެވެ.
"ރާއްޖޭގެ ރައްޔިތުންނަށް އެނގިވަޑައިގަންނަވާނެ އޯޑިއޯއަކުން ދައްކާނެ ވާހަކައެއް ނޯންނާނެ. އޯޑިއޯ ހަދައިގެން މީހުން ޖަހަމުން ދަނީ މަދަކުން ނޫން. އެއީ ރާއްޖޭގައި ވަރަށް ޒަމާނުއްސުރެ ކުރަމުން އަންނަ ކަންކަން،" ޖާބިރު ވިދާޅުވި އެވެ.
އޭނާ ވިދާޅުވީ އެކި މީހުންގެ ނަމުގައި އޯޑިއޯ އާއި ފޮޓޯ ހަދައިގެން ވާހަކަތައް ދެއްކުމަކީ އާކަމެއް ނޫން ކަމަށެވެ.
ރައީސަށް ނިސްބަތްކޮށް ހުތުރުބަހުން ވާހަކަ ދައްކާ އޯޑިއޯގައިވާ އަޑަކީ ޖާބިރުގެ އަޑުކަން ނުވަތަ ނޫންކަމެއް ނޭނގެ އެވެ. އެހެން ނަމަވެސް އެކި މީސްމީހުންގެ އަޑުން އެހެން މީހުން ވާހަކަ ދެއްކުމަކީ ރާއްޖޭގައި ވެސް އަދި އެހެން ގައުމުތަކުގައި ވެސް ހިނގާ ކަމެކެވެ.
ޖާބިރުގެ އޯޑިއޯއެއް ކަމަށް ބުނެ، ސޯޝަލް މީޑިއާގައި އެ އޯޑިއޯ އާއްމުކުރި ހަފުތާގައި ވެސް މަޖިލީހުގެ ޖަލްސާތަކުގައި އޭނާ ވާހަކަ ދެއްކެވީ ރައީސް ސޯލިހާ އެއްކޮޅަށެވެ.
