ރާއްޖޭގެ ރިސޯޓެއްގައި މަސައްކަތް ކުރާ ބިދޭސީއަކަށް ގުޅައި، މަސައްކަތް ކުރަމުން އައި ރިސޯޓުގެ އިސް މީހެއް ކަމަށް ބުނެ އޮޅުވާލައިގެން 6،000 އެއްހާ ރުފިޔާ ހޯދި މީހަކަށް އަދަބެއްގެ ގޮތުގައި 24،000ރ. ގެ ޖޫރިމަނާއެއްކޮށްފި އެވެ.
މި މައްސަލާގައި ދައުލަތުން އަބްދުﷲ މުއާޒު ސައީދު ނަމަކަށް ކިޔާ މީހެއްގެ މައްޗަށް އުފުލީ އެހެން މީހެއްގެ މުދަލަށް ހުއްދަ ނޫން ގޮތެއްގައި ބާރު ހިންގުމުގެ ކުށުގެ ދައުވާ އެވެ.
ދައުލަތުން ކޮށްފައިވާ ދައުވާގައި ބުނާ ގޮތުން ލ. އަތޮޅު ސިކްސް ސެންސާސް ރިސޯޓްގައި މަަސައްކަތް ކުރާ ތައިލެންޑް މީހަކަށް ގުޅައި، އެ ރިސޯޓްގެ ފައިނޭންޝަލް ޑިޕާޓްމަންޓްގައި މަސައްކަތްކުރާ މީހެއް ކަމަށް ބުނެ އޮޅުވާލައިގެން އަމިއްލަ ބީއެމްއެލް އެކައުންޓަށް 400 ޑޮލަރު (6،144 ރ.) ޖަމާކޮށްފައިވެ އެވެ.
ޝަރީއަތުގައި އަބްދުﷲ މުއާޒު ވަނީ ދައުވާއަށް އިއުތިރާފުވެފަ އެވެ. ކުށަށް އިއުތިރާފުވެފައިވާތީ ޖަލު އަދަބެއްގެ ބަދަލުގައި ޖޫރިމަނާގެ އަދަބަކަށް ލުއިކޮށްދޭން އޭނާ އެދިފައިވެ އެވެ. އަދި ވަޒީފާ އަދާކޮށް މުސާރަ ލިބޭ މީހަކަށް ވާތީ ޖޫރިމަނާ ދެއްކޭނެ ކަމަށް އޭނާ ޝަރީއަތުގައި ބުނެފައިވެ އެވެ.
ގާނޫނުގައި، އެ ދައުވާއަށް ކަނޑައަޅާފައިވާ އަދަބުގެ އަސާސީ މިންގަނޑަކީ ނުވަ މަހާއި 18 ދުވަހަށް ޖަލަށް ލުމެވެ. ކުށަށް އިއުތިރާފުވާ ނަމަ މިންގަނޑު އެއް ދަރަޖަ ދަށްކުރެވެ އެވެ. އެއީ ހަތަރު މަހާއި 24 ދުވަހަށް ޖަލަށް ލުމެވެ.
ފަނޑިޔާރަށް ލިބިދޭ އިހުތިޔާރުގެ ތެރެެއިން އަދަބުގެ އަސާސީ މިންގަނޑު ވަނީ އެއް ދަރަޖަ ކުޑަކޮށްފަ އެވެ. އަދި ހަތަރު މަހުގެ ޖަލު އަދަބު 24،000 ރ. ގެ ޖޫރިމަނާއަކަށް ބަދަލުކޮށް 24 ދުވަހުގެ ޖަލު އަދަބު ވަނީ 137 ގަޑިއިރަށް މުޖުތަމައަށް ހިދުމަތް ކޮށްދިނުމުގެ އަދަބަކަށް ބަދަލުކޮށްދީފަ އެވެ.
ޖޫރިމަނާ ކުރިއަށް އޮތް ހަތަރު މަސް ދުވަހުގެ ތެރޭގައި މީރާއަށް ދައްކައި ހަލާސްކުރުމަށް، މައްސަލަ ބެއްލެވި ގާޒީ ސަފްއަތު ހަބީބު އިއްވެވި ހުކުމުގައިވެ އެވެ.
