ޕެރިސް (އޭޕްރީލް 22) - ކީލިއަން އެމްބާޕޭ ޖެހި ދެ ގޯލާ އެކު، 2-1 އިން އެންޖާސް ބަލިކޮށް، ޕީއެސްޖީން ފްރެެންޗް ލީގުގެ ޗެމްޕިއަންކަން ކަށަވަރުކުރުމާ ގާތަށް ޖެހިލައިފި އެވެ.
ފްރެންޗް ލީގުގެ އެއް ވަަނައިގައި ޕީއެސްޖީ އޮތީ ބާކީ ހަ މެޗު އޮތްއިރު، 11 ޕޮއިންޓުގެ ލީޑަކާ އެކު އެވެ. ޕީއެސްޖީ އަށް 32 މެޗުން 75 ޕޮއިންޓް ލިބިފައިވާއިރު، ދެ ވަނައިގައި އޮތް މާސޭ އަށް 31 މެޗުން ވަނީ 64 ޕޮއިންޓް ލިބިފަ އެވެ. އަދި ތިން ވަނައިގައި އޮތް ލެންސްގެ 31 މެޗުން 63 ޕޮއިންޓް އެބައޮތެވެ.
ޕީއެސްޖީން ލީޑުނެގީ ލިއޮނަލް މެސީ ބައިވެރިވެގެން ކުރި އެޓޭކެއްގައި މެޗުގެ ނުވަ ވަނަ މިނިޓްގައި އެމްބާޕޭ ޖެހި ގޯލުންނެވެ. މިއީ ހުއާން ބެނާޓް ދިން ބޯޅައަކުން އެމްބާޕޭ ޖެހި ގޯލެކެވެ.
މެޗުގެ 26 ވަނަ މިނިޓްގައި މެސީ ދިން ބޯޅައަކުން އެމްބާޕޭ ވަނީ ހުސްކޮށް އަރައި، އެންޖާސްގެ ކީޕަރު ޕޯލް ބެނަޑޯނީ ކައިރިން ގޯލު ޖަހައިފަ އެވެ. މިއީ މި ފަހަރު ލީގުގައި އެމްބާޕޭގެ 22 ވަނަ ގޯލެވެ. އަދި މުޅި ސީޒަނަށް ބަލާއިރު، 34 ވަނަ ގޯލެވެ. މިއީ މި ސީޒަނުގައި ލީގުގައި މެސީ ދިން ބޯޅަތަކުން ޖެހި 15 ވަނަ ގޯލެވެ.
އެންޖާސް އަށް މެޗުގައި ޖަހައިދިން ހަމައެކަނި ގޯލު މެޗުގެ 87 ވަނަ މިނިޓްގައި ޖަހައިިދިނީ ސައީދު ތޯބް އެވެ.
މި މެޗަށް ފަހު ޕީއެސްޖީގެ ކޯޗު ކްރިސްޓޮފް ގަލްޓިއޭ ބުނީ މޮޅުވިޔަސް ހަގީގަތުގައި މިއީ މުޅި މެޗަށް ބަލާއިރު، ޕީއެސްޖީ ދަށް ދުވަހެއް ކަމަށެވެ. އަދި ހާއްސަކޮށް ދެ ވަނަ ހާފުގައި ޕީއެސްޖީ އަށް އަމިއްލަ ގޭމް ނުކުޅެވުމަކީ ކަންބޮޑުވާ ކަމެއްގެ ގޮތުގައި ގަލްޓިއޭ ފާހަގަކުރި އެވެ.
"ޕީއެސްޖީ އަށް އޮތީ ހަމައެކަނި ނަތީޖާއެއް ނެރެ މޮޅުވުމެއް ނޫން އަހަރެން ދެކޭ ގޮތުގައި، އެބަޖެހޭ ހަމަ މޮޅަށް ކުޅެގެން މޮޅުވާން،" ގަލްޓިއޭ ބުންޏެވެ.
ޕީއެސްޖީން 11 ވަނަ ފަހަރަށް ލީގު ޗެމްޕިއަން ހޯދުމާ ގާތުގައި އޮތްއިރު، އެ ކްލަބުން ނުވަ ފަަހަރު ލީގު ކާމިޔާބުކުރީ 2011 ވަނަ އަހަރު ގަތަރުގެ އިންވެސްްޓަރުން އެ ކްލަބް ގަތް ފަހުންނެވެ.
