ޗައިނާގެ ޑިފެންސް މިނިސްޓަރު ލީ ޝިއަންގްފޫ އާއި ރަޝިއާގެ ރައީސް ލެޑިމިއަ ޕުޓިން އާދީއްތަ ދުވަހު މޮސްކޯގައި ބައްދަލުކުރައްވައިފި އެވެ.
"އަޅުގަނޑުމެންގެ ގުޅުން ވަރަށް ވަރުގަދަ. މިއީ ފިނި ހަނގުރާމައިގެ ޒަމާނުގައި އޮތް އަސްކަރީ-ސިޔާސީ ގުޅުމަށް ވުރެ މާ ވަރުގަދަ ގުޅުމެއް،" މިނިސްޓަރު ލީ ވިދާޅުވި އެވެ.
"މިއީ އަޅުގަނޑު ޑިފެންސް މިނިސްޓަރުކަމާ ހަވާލުވި ފަހުން ގައުމުން ބޭރަށް ކުރި ފުރަތަމަ ދަތުރު. މި ދަތުރު ރަޝިއާއަށް ކުރަން ނިންމީ އަޅުގަނޑުމެންގެ ގުޅުމުގެ ވަރުގަދަކަން ރަމްޒުކުރުމުގެ ގޮތުން."
ޕުޓިން އާއި ލީގެ ބައްދަލުވުމުގައި ރަޝިއާގެ ޑިފެންސް މިނިސްޓަރު ސާގެއި ޝޮއިގޫ ވެސް ބައިވެރިވެވަޑައިގެންނެވި އެވެ.
"އަޅުގަނޑުމެންގެ އަސްކަރީ ޑިޕާޓްމަންޓުތަކުން ގަވާއިދުން މައުލޫމާތު ބަދަލުކޮށް، އަސްކަރީ އަދި ޓެކްނިކަލް ގޮތުން ގުޅުން ބަދަހިކޮށް ހެދުމަށް އިސްކަމެއް ދޭ،" ޕުޓިން ވިދާޅުވި އެވެ.
ޗައިނާގެ ޑިފެންސް މިނިސްޓަރު ރަޝިއާއަށް ވަޑައިގެންފައިވާ އިރު، މިދިޔަ މާޗް މަހު އެ ގައުމުގެ ރައީސް ޝީ ޖިންޕިން ވެސް ރަޝިއާއަށް ވަޑައިގެން ޕުޓިންއާ ބައްދަލުކުރެއްވި އެވެ.
ރަޝިއާ އާއި ޗައިނާގެ ގުޅުން ވަރަށް ރަނގަޅެވެ. މިދިޔަ އަހަރުގެ ފެބްރުއަރީ މަހު ޔޫކްރެއިންގައި ހަނގުރާމަ ފެށި ފަހުން އެ ގުޅުން ވަނީ އިތުރަށް ވަރުގަދަވެފަ އެވެ.
ހަނގުރާމައިގައި ވަކި އަތަކަށް ނުޖެހޭ ގައުމެއްގެ ގޮތުގައި އޮންނަން ޗައިނާއިން ބޭނުންވި ނަމަވެސް، ދުވަހަކު ވެސް ރަޝިއާ ކުށްވެރިކޮށްފައެއް ނުވެ އެވެ.
ޔޫކްރެއިން ހަނގުރާމައިގައި ބޭނުންކުރަން ޗައިނާއިން ރަޝިއާއަށް ހަތިޔާރު ފޯރުކޮށްދޭން އުޅޭ ކަމަށް އެމެރިކާއިން ތުހުމަތުކުރެ އެވެ. އެކަމަކު ޗައިނާއިން އެކަން ދޮގުކުރެ އެވެ.
