ލަންޑަން (އޭޕްރީލް 16) - އިނގިރޭސި ޕްރިމިއާ ލީގުގައި މި މަހު އާސެނަލްއާ ދެކޮޅަށް ކުޅޭ މެޗަކީ މެންޗެސްޓާ ސިޓީ އަށް ފައިނަލެއް ކަމަށް އެ ޓީމުގެ ކޯޗު ޕެޕް ގާޑިއޯލާ ބުނެފި އެވެ.
އިނގިރޭސި ޕްރިމިއާ ލީގުގައި ރޭ ލެސްޓާ ސިޓީ އަތުން 3-1 އިން މޮޅުވެ، ސިޓީ ވަނީ ތާވަލްގެ އެއް ވަނައިގައި އޮތް އާސެނަލްއާ ދެމެދު އޮތް ފަރަގު ތިން ޕޮއިންޓަށް ކުޑަކޮށްފަ އެވެ. ލީގުގައި މިރޭ ވެސްޓް ހޭމާއި އާސެނަލް ބައްދަލުކުރާނެ އެވެ. މި މެޗުން މޮޅުވެއްޖެނަމަ، އާސެނަލްގެ ލީޑު ހަ ޕޮއިންޓަށް ފުޅާވާނެ އެެވެ.
ޕްރިމިއާ ލީގުގެ ޗެމްޕިއަންކަން ހޯދުމުގެ ރޭހުގައި މި މަހުގެ 26 ވަނަ ދުވަހު އާސެނަލް އާއި ސިޓީ ބައްދަލުކުރާ މެޗަކީ މުހިންމު މެޗެކެވެ. ސިޓީގެ ދަނޑުގައި މި ދެ ޓީމު ކުރިމަތިލާއިރު، މިއީ މި ސީޒަންގެ ލީގު ޗެމްޕިއަންކަން ލިބޭ ޓީމެއް ކަނޑައެޅޭ މެޗަށް އެ މެޗު ވެދާނެ އެވެ.
ލެސްޓާ އަތުން ރޭ މޮޅުވި މެޗަށް ފަހު ވާހަކަ ދައްކަމުން ގާޑިއޯލާ ބުނީ އާސެނަލްއާ ޗެކޮޅަށް ކުޅޭ މެޗަކީ ސިޓީ އަށް ފައިނަލެއް ކަމަށެވެ.
"މި މެޗުން މޮޅުވެގެން (އާސެނަލް) މެޗަށް ކުރިމަތިލުން ވަރަށް މުހިންމު ކަމެއް. މިއީ ސިޓީ އަށް ހަމަ ފައިނަލެއް،" ގާޑިއޯލާ ބުންޏެވެ.
"މި މެޗު ގެއްލިއްޖެނަމަ ސިޓީ އަށް ލީގު ހޯދުމުގެ ފުރުސަތު ގެއްލޭނެ. އެކަމަކު، މި މެޗަށް ކުރިމަތިލާންޖެހޭނީ އާސެނަލްއާ ގާތުގައި އޮވެގެން."
ސިޓީ އަށް ކުރިއަށް އޮތީ ވަރަށް މުހިންމު ތިން މެޗެވެ. އެއީ އާސެނަލްއާ ދެކޮޅަށް ކުޅޭ މެޗުގެ އިތުރުން، އެފްއޭ ކަޕްގެ ސެމީ ފައިނަލް މެޗާއި ޗެމްޕިއަންސް ލީގުގެ ކުއާޓާ ފައިނަލްގެ ދެ ވަނަ ލެގުގައި ބަޔާން މިއުނިކާ ދެކޮޅަށް ކުޅޭ މެޗު ހިމެނެ އެވެ.
