ޕެރިސް (އޭޕްރީލް 16) - ޕީއެސްޖީ އަށް ފްރާންސް ލީގުގައި އެންމެ ގިނަ ގޯލު ޖަހައިދިން ކުޅުންތެރިޔާގެ ރެކޯޑް ކީލިއަން އެމްބާޕޭ މުގުރާލި މެޗުގައި 3-1 އިން ލެންސް ބަލިކޮށް ޕީއެސްޖީން ލީގުގެ ކުރީގައި ނުވަ ޕޮއިންޓަށް ލީޑުފުޅާކޮށްފި އެވެ.
ޕީއެސްޖީ ފްރެންޗް ލީގުގެ އެއް ވަނައިގައި އޮތީ 31 މެޗުން 72 ޕޮއިންޓް ހޯދައިގެންނެވެ. ދެ ވަނައިގައި އޮތް ލެންސަށް ވަނީ 31 މެޗުން 63 ޕޮއިންޓް ލިބިފަ އެވެ. ތިން ވަނައިގައި އޮތް މާސޭ އަށް 30 މެޗުން ލިބިފައިވަނީ 61 ޕޮއިންޓެވެ.
މި މެޗުގައި އެމްބާޕޭ ޖެހި ގޯލާ އެކު، ޕީއެސްޖީގެ ޖޯޒީގައި ފްރެންޗް ލީގުގައި އެންމެ ގިނަ ގޯލު ޖެހުމުގެ ރެކޯޑް އޭނާ އަށް ލިބުނީ އެވެ. ރޭގެ ގޯލަަކީ ޕީއެސްޖީ އަށް ލީގުގައި ކުޅެދިން 169 ވަނަ މެޗުގައި އެމްބާޕޭ އެ ޓީމަށް ޖަހައިދިން 139 ގޯލެވެ. މިއީ، މި ފަހަރު ލީގުގައި އެމްބާޕޭގެ 20 ވަނަ ގޯލެވެ.
ޕީއެސްޖީ ދަނޑުގައި ރޭ ކުޅުނު މެޗުގެ ލެންސްގެ މިޑްފީލްޑަރު ސަލީސް އަބްދުލް ސަމަދު އަށް ވަނީ ސީދާ ރަތް ކާޑެއް ދައްކައިފަ އެވެ. މެޗުގެ 19 ވަނަ މިނިޓްގައި ގާނާގެ އަބްދުލް ސަމަދަށް ރަތް ކާޑު ދެއްކީ ޕީއެސްޖީގެ އަޝްރަފް ހަކީމީ އަށް ނުރައްކާތެރި ފައުލެއް ކުރުމުންނެވެ.
މެޗުގެ 31 ވަނަ މިނިޓްގައި ލިއޮނަލް މެސީ އާއި ވިޓީނިއާ ގުޅިގެން ތަނަވަސްކުރި އެޓޭކެއްގައި އެމްބާޕޭ އަށް އޭރިއާތެރެއިން ލިބުނު ބޯޅަ ފޮނުވާލުމުން ގޯލަށް ވަނީ ދަނޑީގައި ޖެހިފަ އެވެ.
ލީޑުނެގިތާ ހަ މިނިޓް ފަހުން ނޫނޯ މެންޑޭސް ދިން ބޯޅައަކުން ވިޓީނިއާ ވަނީ ޕީއެސްޖީގެ ދެ ވަނަ ގޯލު ޖަހައިފަ އެވެ. މެޗުގެ 37 ވަނަ މިނިޓްގައި ކޯނަރަކުން ލިބުނު ބޯޅައެއްގައި އޭރިއާބޭރުން ވިޓީނިއާ ޖެހި ބާރު ބޯޅަ އަމާޒުވީ ގޯލުގެ ދުރު ކަނަށެވެ.
ފުރަތަމަ ހާފު ނިމުމުގެ ކުރިން މެސީ ވަނީ ޕީއެސްޖީގެ ތިން ވަނަ ގޯލު ޖަހައިފަ އެވެ. މެޗުގެ 40 ވަނަ މިނިޓްގައި އެމްބާޕޭ ދިން ބޯޅައެއް އޭރިއާތެރެއިން ކޮންޓްރޯލް ކޮށްލައި ޖާގައެއް ހޯދުމަށް ފަހު މެސީ ވަނީ ދުރު ކަނަށް ބޯޅަ އަމާޒުކޮށްލައިފަ އެވެ.
އެއް ކުޅުންތެރިއަކު މަދުކޮށް މެޗުގެ ބޮޑުބައި ކުޅުނު ލެންސްގެ ހަމައެކަނި ގޯލު، މެޗުގެ 60 ވަނަ މިނިޓްގައި ޖެހީ ޕެނަލްޓީ އަކުން ޕްޒެމިސްލޯވް ފްރަންކޯސްކީ އެވެ.
މެޗަށް ފަހު ޕީއެސްޖީގެ ކޯޗު ކްރިސްޓޮފް ގަލްޓިއޭ ބުނީ ލީގުގައި ބާކީ އަށް މެޗު އޮއްވައި، ލީގުގެ އެއް ވަނައިގައި ނުވަ ޕޮއިންޓްގެ ލީޑެއް ލިބުނު ނަމަވެސް އެއީ ހުރިހާ ކަމެއް ދޫކޮށްލައި، ލީގު ޔަގީންވީ ކަމަށް ދެކިގެން ތިބެވޭނެ ކަމެއް ނޫން ކަމަށެވެ.
